Efeso 6 - Amazwi Yakwe Leza 2013

¹ Mwe ana, mwemwe yakwe Klistu. Acino mulinzile kuyela akwasi inu, pano cili cisuma kucita.

² “Cindika so na nyoko” lili sunde lyankolelo ilyakwata ulayo ukati,

³ “Kuti vyonsi vikuzipile nga na manda yako yavule mu nsi.”

⁴ Mwe yakwasi namwe mutasosya ana inu, lelo mwayakuzya mu kuyasunda nu kuyasambilizya kwa wina Klistu.

Azya na asambazi yao

⁵ Namwe mwe azya mwayela asambazi inu mu coopo nu kuzakaza. Mwacita cii ni cumi wakwe vino mungatumikila Klistu.

⁶ Mutaomba sile ningo lino yakumwangalila, ngati mukulonda kutasiwa na antu. Lelo mwaomba milimo wa azya yakwe Klistu, kuomba ni myenzo inu yonsi kucita vino Leza akulonda.

⁷ Mwaomba milimo inu ni nsansa wa azya, ngati mukuombela Mwene, asi antu sile.

⁸ Iusyini ukuti Mwene alalambula umuntu ali wensi, aye muzya nanti muntungwa. Onsi yalalambulwa pa milimo isuma ino yaomba.

⁹ Namwe mwe asambazi, mwacita cili conga ku azya inu. Mutaezya kuyoofya. Iusyini ukuti mwemo na azya inu kwene, mwemwe antu ya Mwene ali umwi uwa mwiyulu, wino ataya na kasoozi pa kupingula umuntu.

Vyanzo vyakwe Leza vino akapeela antu yakwe

¹⁰ Mukusyalikizya, lekini maka yakwe Leza yamukomelezya.

¹¹ Mwaipangasya ni vyanzo vyonsi vyakwe Leza vino akumupeela, kuti muye azyansye ku citeyo cakwe Ciwa.

¹² Pano tusyakulwisya antu sile lelo tukulwisya mawene, mauteko, na maka yamfinzi amuno nsi nga ni mipasi yankota iya mulwelele.

¹³ Caleka ndakai muipangasye vyanzo vyakwe Leza. Lyene lino uwanda uwa uwipe uliza, mwemo mulaya na maka akuipokolola mukulolenkana nu mwanisi. Alino pacisila cakulwisya kufika nu kumpela, mulazyansya.

¹⁴ Acino muye aiteyanye! Lekini cumi ciye wa musipi unyepwe mu misana inu, nupya lekini wololoke uye wa cela ca kucinga visao vinu.

¹⁵ Alino ukuya aiteyanye ku kukosola Ilandwe Lisuma lya mutende, nako kuye wa nsapato ku ngazo zinu.

¹⁶ Lekini utailo winu uye wa cisyangu, mwakusiika mivwi yamoto kufuma ku Mwipe wilya.

¹⁷ Pokelelini ufyusi, uye wa ngowani, nga na mazwi yakwe Leza yano Mupasi Wamuzilo akamupeela, nayo yaye wa lupanga.

¹⁸ Mwacita vii vyonsi mu mapepo, ala mukuuzya Leza kuti amwazwe. Pepini lyonsi, ndi vino Mupasi Wamuzilo akumutungulula. Muye apempukile, nupya aula kunenuka. Nsita zyonsi mwapepela antu yakwe Leza onsi.

¹⁹ Nani kwene mwampepelako kuti Leza ampeele Landwe navwanga nu kupama apa kuleka kuti nkama i Landwe Lisuma imanyikwe.

²⁰ Pamulandu wi Landwe Lisuma nasololwa kuya nkombe, nanti ndakai indi mu n'ganda yaminyololo. Acino mwampepelako kuti nje mupame pa kukosola Ilandwe Lisuma wakwe vino ndinzile kucita.

Kulamuka kwakusyalikizya

²¹ Tikikasi, mwina witu mukundwe nupya muomvi uwa cumi mu mulimo wa Mwene, alamunena vyonsi vya pamulandu nani, kuti mumanye wikazi wane na vino nkucita.

²² Uli mulandu uno namutumila kunomuli kuti mumanye wikazi ni micitile itu vino ili, nga na kuti amutekezye myenzo.

²³ Mutende nu kutemwa nga nu utailo vipelwe ku ina Klistu kufuma kuli Leza Tata nu Mwene Yesu Klistu.

²⁴ Cikuku cakwe Leza ciye na antu yonsi yano atemwa Mwene witu Yesu Klistu nu kutemwa kwa pe.