Efeso 5 - Amazwi Yakwe Leza 2013

¹ Endi, pano mwemwe ana yakundwe yakwe Leza, mwaezya kukolana na aliwe.

² Lekini umi winu watungululwa nu kutemwa, wakwe vino Klistu watutemilwe nu kupeela umi wakwe pamulandu witu, kuti uye mununko usuma uwa mpolelwa ino ikazanzya Leza.

³ Mwemwe antu yakwe Leza. Acino ulenzyo nanti vya winyi nanti lwiswa vitatakwa munomuli.

⁴ Nupya cisi cisuma ukuti mwemo mwavwanga mazwi auwelewele, amasiku, akowele, nanti akutumpa. Lelo mwemo mulinzile kutaizya Leza.

⁵ Pano mulinzile kusininkizya ukuti antu akacita vii yatalaya amu Wene wakwe Klistu na Leza.

⁶ Mutaleka umuntu umwi amusombe na mazwi auwelewele, pano pamulandu wa vintu vii ukali wakwe Leza ukwiza pali yao asyamuyela.

⁷ Caleka mutuminkana nao mu micitile.

⁸ Mpiti mwali wa antu akaikala mu mfinzi, lelo ndakai mwemwe antu amu luswepo pano mwemwe antu ya Mwene. Acino mwacita vintu wa antu amu luswepo

⁹ nga nu kuleka luswepo lwinu lulete uzombozi ukulu cuze uwa micitile isuma, uwololoke, nga ni cumi.

¹⁰ Mwaezya kusambilila vintu vino vikazanzya Mwene.

¹¹ Mutaya nu utandano na yakacita ya milimo yamu mfinzi. Lelo mu cifulo cakwe cii mulinzile kuleta milimo iyo ku luswepo.

¹² Nupya cili ica nsonyi cuze ukulanda pali vino antu yaa yakacita mu nkama.

¹³ Lelo luswepo lulasokolola vintu vii ndi vino vili.

¹⁴ Luswepo lukasokolola vyonsi, wakwe vino calembwa mu malembelo cati, “Zyuka, we muno ukaswile, tutuluka nga Klistu amayengesa panuli.”

¹⁵ Caleka tekelini mu mikalile inu. Mutaikala wa antu awelewele, lelo wa antu yamano.

¹⁶ Mwaomvya insita zinu ningo pano manda ya ndakai aipe.

¹⁷ Caleka mutaya viwelewele, lelo mwaezya kumanya vintu vino Umwene akulonda kuti mwacita.

¹⁸ Mutakoleka waini pano wene angamonona. Lelo muzuziwemo na Mupasi Wamuzilo.

¹⁹ Mwalanzyanya mazwi amu Masamu, mu nyimbo zya kulumbanya Leza nga ni nyimbo zyuze zya kulumbanya Leza mu myenzo inu.

²⁰ Mwi zina lya Mwene witu Yesu Klistu, mwataizya Leza Tata lyonsi pa vintu vyonsi.

Aci na yaiya yao

²¹ Mwatontelana pamulandu wa kucindika Klistu.

²² Anaci yatontela yaiya yao, wakwe vino yakatontela Mwene.

²³ Pano iya ali mutwe wa muci. Wakwe vino Klistu ali mutwe wi uvi nupya ali Katuula wakwelyo.

²⁴ Caleka anaci yalinzile kutontela yaiya yao mu ufumaluke wakwe vino iuvi likatontela Klistu.

²⁵ Namwe mwe onsi mutemwe aci inu wakwe vino Klistu watemilwe iuvi nga nu kupeela umi wakwe pamulandu wakwelyo.

²⁶ Wene wacisile iuvi kuya ilyamuzilo kupitila mu kuliswefya na manzi nga na mazwi yakwe.

²⁷ Wacisile cii kuti aleke iuvi liloleke ilyalulumbi nupya ilyamuzilo, ilyaula mulandu nanti iyala nanti mikwinya nanti ndema zyuze.

²⁸ Mu musango uli onga kwene, yaiya yalinzile yatemwa aci yao wakwe vino yatemwa mili yao. Monsi wino watemwa muci wakwe ala waitemwa umwisikulu.

²⁹ (Pano kutaya umuntu umwi uwapata mwili wakwe. Mu cifulo cakwe cii, wene akawimula nu kuusunga ningo, wakwe vino Klistu akacitila iuvi lyakwe.)

³⁰ Pano sweswe vilundwa vya mwili wakwe.

³¹ Cili ndi vino calembwa mu malembelo cati, “Pamulandu ukwene, umonsi alasya isi na nyina nu kuilundanya ku muci wakwe. Lyene oili yalaya mwili onga.”

³² Mwi lembo lii muli nkama ikulu iya cumi ino yasokololwa mwenemo, nupya manyile ukuti yene ikwimilila Klistu ni uvi lyakwe.

³³ Caleka cila monsi alinzile kutemwa muci wakwe, ndi vino wene waitemwa umwisikulu. Cila mwanaci alinzile kucindika iya wakwe.