Efeso 2 - Amazwi Yakwe Leza 2013

¹ Namwe mpiti mwali afwe ku mupasi pamulandu wa kuntayela kwinu na maifyo inu.

² Mwemo mwalondelile misango iipe iya muno nsi. Mwayelanga wino akateeka insi, nupya wakwata maka pa muntu wensi wino asyayela Leza.

³ Mu cumi naswe kwene avino twali lino twatungululwanga ni vilondwa vya civyalilwa citu, ala tukucita vintu vino mili na melenganyo itu yalondanga. Swemo twasosya Leza nupya twali nu kuvunukwa.

⁴ Lelo luse lwakwe Leza lwavulisya cuze, nga nu kutemwa kuno watutemwa nako ukukulu cuze,

⁵ cakuti lino twali afwe ku mupasi pa kuntayela wene watulenzile kuya aumi muli Klistu. Mwatuuzilwe ni cikuku cakwe Leza.

⁶ Muli Klistu Yesu, Leza uwatukatwisye nga atupela cifulo mwiyulu pamwi na Klistu.

⁷ Wene wacisile cii kuti mu myaka ikwiza alange ukama wa cikuku cakwe uiyele uno waya mu kutemwa kuno watulanga muli Klistu Yesu.

⁸ Pano mwatuuzilwe ni cikuku cakwe Leza lino mwataile.

⁹ Citali uku maka inu nanti kuombesya, lelo uwila wakwe Leza pakuti kutaya umwi uwakuitumika pali cico.

¹⁰ Leza watucita ndi vino tuli muli Klistu Yesu kuti twaikala ndi vino lyonsi akalonda, nu kuti twacita vintu visuma vino watuteyanyizizya.

Twalemana pamwi muli Klistu

¹¹ Caleka mwiusye vino mwemo mpiti mwali Akulukuwa. Nupya Ayuda yano akaitumika pano yasilamulwa yene yamanga mwemwe ukuti “Atasilamulwa.”

¹² Mu nsita ilya mwemo mwali mutali mumanye vyapali Klistu. Mwemo mwali ainamasi pakasi ka ina Izlaeli, nupya mutali antu asololwe yakwe Leza. Mutakweti mbali imwi mu vipangano vino vimikwe pa malayo yakwe Leza ku antu yakwe. Nupya mwatenzi munonsi kwaula upaalilo nanti Leza.

¹³ Lelo muli Klistu, mwe muno mpiti mwali kutali na Leza, wazi wa mpolelwa yakwe Klistu wamupalamika pipi.

¹⁴ Pano Klistu umwisikulu uwatuletela mutende pa kulenga Ayuda na Akulukuwa yaye mutundu onga. Umwili wakwe auno wene waomvizye pa koomola lung'umba lwa lupato luno lwatupatukinye mu kutulenga kuya anisi.

¹⁵ Wene wonona ivyalembwa mu mpapulo zyakwe Mose pamwi na Masunde nga ni nkonka zyonsi zyakweyo. Wacisile cii kuti awikizyanye Ayuda nga na Akulukuwa kuti tuye wa mutundu onga upya uno walemana munoli mu mutende.

¹⁶ Lyene kupitila mu mfwa yakwe ya pa lupanda Klistu wononyile lupato luno twakwatilana. Nupya kupitila mu lupanda amuno watulemanya Ayuda, na Akulukuwa tuye mwili onga, nga nu kutuwezya kuli Leza.

¹⁷ Acino Klistu wizile akosola Ilandwe Lisuma ilya mutende kuli mwe Akulukuwa, mwe muno mwali kutali na Leza. Nupya wizile akosola Ilandwe Lisuma ilya mutende kuli swe Ayuda swe muno twali na Leza.

¹⁸ Muli Klistu, swensi kwene Ayuda na Akulukuwa tungapalama kuli Tata kupitila mu Mupasi onga kwene.

¹⁹ Caleka mwe Akulukuwa mutacili ainamasi nanti aenyi. Lelo mwemwe akaya pamwi na antu yakwe Leza onsi, nupya mwaya vilundwa vyamu n'ganda yakwe Leza.

²⁰ Mwemo mukoline wa cikulwa cino mufula wakweco atumwa na yakasema, nga Klistu nawe ali iwe lya pitungi.

²¹ Klistu awino walundinkanya cikulwa nga nu kuleka kuti cikule nu kuya Ng'anda ikulu yakwe Leza yamuzilo, nupya iyapeelwa ku Mwene.

²² Munoli namwe kwene mukukulwa nu kulundinkanyiwa kuti muye wikalo wakwe Leza mukuomba kwakwe Mupasi Wamuzilo.