Danieli 9 - Amazwi Yakwe Leza 2013

Danieli wapepela antu yakwe

¹ Mu mwaka wakwe conga wakuteeka kwakwe Dalyusi umwana umonsi wakwe Aasuwelo, uwalasikwe uwene waku Babiloni,

² ne Danieli napitulwike mu Malembelo yamuzilo ukulingana na mazwi yano Mwene wanenyile kasema, nga niluka ukuti Yelusalemu alaya wa citalang'anda apa myaka amakumi cinimbali.

³ Acino napefile ku Mwene Leza, ala nkupapata kunoli, nu kuizilizya, nu kuzwala vizwalo vya ndosya, nu kwikala umwi twi.

⁴ Napefile ku Mwene Leza wane nu kulongwela amaifyo ya antu. Napefile inti, “Owe mwe, we Mwene Leza mukulu nupya uwakoofya, wemuno ukawaka upangano wako nu kulanga ukutemwa kuli yayo akutemwa, yano yakayela amasunde yako.

⁵ “Silola vino twifya nu kucita inkota. Twakutalamila nu kufutatila amalamulo na masunde yako.

⁶ Tutasumvileko amano ku kuvwa ku yaomvi yako yakasema, yano yasemile umwi zina lyako, kusemela yamwene, yakateeka ni vikolwe vitu, nga na antu yonsi amu luko lulu.

⁷ Mwene, wewe kacita wa vyaololoke, lelo swemo swe ikazi amu Yudeya nu mu Yelusalemu tukaipupanya lyonsi sweisikulu swemuno wasalanginye mu mpanga zya mupipi ni zya kutali pamulandu wakuti tusi acumi kunuli.

⁸ We Mwene, ala sweswe kumwi na yamwene itu, na yakateeka itu nga ni vikolwe vitu twaipupanya pamulandu wakuti twifya kunuli.

⁹ Wemo waya na mizu nupya ukatwelela uluse, nanti angala twakusangukila.

¹⁰ Swemo tutatezizye kunuli, we Mwene Leza witu nanti ukuwaka amasunde yako yano watupile kupitila mu yaomvi yako yakasema.

¹¹ Izlaeli wensi wavuna amasunde yako nu kukufutatila, nupya wene wakana ukukuyela. “Caleka swemo twifya kunuli nu kuiletelela intipu zino zyalembwa mu Masunde yakwe Mose, umuomvi wako we Leza.

¹² Wemo watufikilizya vino wavwanzile ukuti ulafikilizya ivyakupezya sweswe kumwi ni ntunguluzi zitu. Wavunwike Yelusalemu icikalale ukuluta umusumba uze uli onsi pano nsi.

¹³ Ndi vino calembwa mu Masunde yakwe Mose, uononesi uu onsi watuponela, lelo na ndakai kwene, we Mwene, tutezya ukukuzanzya apa kuzenzuka ku maifyo itu nu kusumbako amano ku cumi cako.

¹⁴ Wemo we Leza witu waiteinye ukutuvunuka, nga nu kucita wacisile cico, pamulandu wakuti lyonsi kwene ukacita vyaololoke, nupya swemo tutakutezizye.

¹⁵ “Caleka ndakai twatitwifya kunuli, we Mwene Leza witu, wemuno walumbwike lino wafumizye antu yako umu Eguputo, ku maka yako akulu, nga antu yacili iusya amaka yako.

¹⁶ We Mwene, uku mpiti watupokololanga, acino utatwalilila ukusokela Yelusalemu. Ala Yelusalemu umusumba wako, umwamba wako wamuzilo. Amaifyo itu ni nkota zya vikolwe vitu ivyalenga kuti antu atuzingulwike yasoweka Yelusalemu kumwi na swe antu yako.

¹⁷ We Leza, si angala uvwe ipepo nu kupapata kwane ne muomvi wako. Si leka Ng'anda yako ikulu ino yononwa iwelele vino yali, apakuti umuntu wensi amanye ukuti wewe uli Leza.

¹⁸ Teya ikutwi we Leza, nu kuvwa. Si celecensya pano tuli nu kulola intazi zino zyatuponela nu ucuzi uli mu musumba uno ukaamilwako izina lyako. Tukupepa kunuli pamulandu wakuti wewe Leza wa mizu, asi pamulandu wakuti twacita ivyaololoke, awe.

¹⁹ We Mwene, ule utuvwe! Mwene utwelele! Mwene, uvwa kunotuli nu kucitapo cimwi! Si cincila apakuti umuntu wensi amanye ukuti wewe uli Leza! Umusumba uu uwakwako kumwi na antu kwene yaa.”

Gabilieli walondolola usemo

²⁰ Lyene ntwalilila kulanda nu kupepa, ala nkuilongwela amaifyo yane na maifyo ya antu yane aina Izlaeli nga nu kupapata uku Mwene kuti awezezye Ng'anda yakwe ikulu vino yali.

²¹ Lino ncili nkupepa, Gabilieli, wino naweni mu cilolwa ca nkolelo, afuma akupapuka aiza pano nali. Yali insita yakupeela impolelwa ya manguzi.

²² Alino andondolwela ati, “We Danieli, natiniza kuno kuti nkwazwilizye ukwiluka usemo.

²³ Lilya kwene lino watandike ukupepa, Leza wakwaswike. Wene wakutemwa, nga acino natiniza ukukunena uwasuko. Acino ndakai usumbeko amano lino nkukulondolwela icilolwa.

²⁴ “Imyaka cinimbali amaila amakumi cinimbali ili nsita ino Leza wika iyakuleka antu yako kumwi nu musumba wamuzilo yaye antungwa ukufuma ku maifyo ni nkota. Amaifyo yalelelwa nu ulungi wa manda pe uye kweneko, apakuti cilolwa nu usemo vikafikiliziwe, nga ni Ng'anda ikulu yamuzilo yakwe Leza ikapelwe kuli Leza nupya.

²⁵ “We Danieli umanye nu kwiluka cii: Ukutandika apa nsita ino ilamulo lyapilwe ilya kukuula Yelusalemu cipya cipya mpaka ukufika nalino Musololwe Wilya aliza, palapita imyaka cinimbali amaila cinimbali. Umusumba wa Yelusalemu ulakuulwa cipya cipya nupya ulaya ni miseo nga namalinga akome, apa myaka cinimbali amaila amakumi mutanda na iili. Lelo insita iyo ilaya insita ya ntazi.

²⁶ Alino apa mpela ya nsita ilya Musololwe Wilya wakwe Leza alakomwa mu kufyengwa. Umusumba kumwi ni Ng'anda ikulu yakwe Leza yalavyonona ku vita vya mwene wa maka vino viliza. Impela iliza wa mukuku, nga ilaleta inkondo nu ononesi vino Leza wateyanya.

²⁷ Kateeka wilya alacita cipangano ningo na antu avule pa myaka cinimbali, nga lino citika wa nsita ii wapita, wene alaleta impela ku kupeela kwa mpolelwa na mawila. Caononyi Cawinyi cene cilimikwa pa kansonsi ka Ng'anda ikulu yakwe Leza nga cilasyala papa kwene ukufika lino impela ino Leza wamuteyanyizizya ilafika.”