Danieli 8 - Amazwi Yakwe Leza 2013

Cilolwa cakwe Danieli cakwe suuku na sawe

¹ Mu mwaka wakwe citatu uwakuteeka kwa mwene Belisyazali, nakweti icilolwa cakwe ciili.

² Umu cilolwa cici naizanyile ala indi mu musumba wa malinga uwa Susa, mu muputule wa mpanga ya Elamu. Naimi umu nkumba ya luzi lwa Ulai.

³ Lino nalingamile umupela, indola suuku uwa mpembe ziili izitali, longa lwali ulutali nupya ulupya kuluta uluze. Suuku wilya waimi pipi nu luzi.

⁴ Nalolekisye suuku wilya akusimula mu mwata wa kukunula ulunga nu ku uwondaka, ku katutu, nu ku kayeya. Kusi inyama imwi ino ingamulesyanya, nanti kuipususya ku maka yakwe. Wene wacisile ndi vino camuzanzizye nga wali ni cilumba.

⁵ Lino ncili elenganya pali cii, lilyo kwene ikwiza sawe ala watauwa ukufuma ku uwondaka, akusimula ulwilo cakuti inkamba zyakwe zyaula kukumya umusili. Wene wakweti ulupembe longa ulwalolike pakasi ka minso yakwe.

⁶ Wene wizile kulungatana na suuku uwa mpembe ziili wino naweni aimi umu mbali ya luzi nga amuzinganya icikalale.

⁷ Naweni kuno wene akukunula suuku. Wene wali umusoke wakwe cimwi cakuti amupuma nu kuvuna impembe zyoili. Suuku atakweti amaka akuitasya. Yamutamile pansi nu kumulyatola, nga kutali umwi uwa kumutuula.

⁸ Lyene sawe alunduluka kuya ni cilumba, lelo lino wafisizye apapela umusinku wa maka yakwe ulupembe lulu lwavunike. Nga mu ncende ya luko imutumba impembe zini, cila lupembe ala lulozizye mu ntunga ipusane ni zyuze.

⁹ Mu lupembe longa apa mpembe zizi zini mwafumile akalupembe, kano kalundulwike mu maka mpaka ukufika ku kayeya nu ku ufumondaka mpaka nu ku mpanga yalaiwa.

¹⁰ Lwene lwalundulwike ukuya na maka akulwisya amwiyulu, intanda kwene izisikulu, mpaka ilusumba zimwi pansi nu kuzilyatola.

¹¹ Lwaituumike kuti luye wa Mwanangwa wa vita vya mwiyulu, nu kulesya impolelwa zya cila wanda izyapeelwanga kunoli, nga nu konona Ng'anda ikulu yakwe Leza.

¹² Antu yaifizye kuku umu cifulo ca kupeela impolelwa izilinge zya cila wanda, nga nu upefi wacumi wasumvilwe pansi. Ulupembe lulu lutaposiwe ukucita consi cino lwacitanga.

¹³ Lyene nuvwile umungeli wenga akuuzya umuze ati, “Uzye ivintu vii ivyalolike mu cilolwa vimatwalilila ukufika lilaci? Uzye ukufika lilaci lino uyi wakofya ulatwalilila umu cifulo ca kupeela impolelwa zya cila wanda? Uzye amu mayulu kumwi ni Ng'anda ikulu yakwe Leza yalalyatolwa ukufika lilaci?”

¹⁴ Nuvwile kuno mungeli muze akwasuka ati, “Kulatwalilila apa myaka 2,300 cila manguzi na katondo, lilyo lino impolelwa zitalapeelwa. Lyene Ng'anda ikulu yakwe Leza ilaweziwa.”

Umungeli Gabilieli walondolola icilolwa

¹⁵ Lino ne Danieli nalolekisye icilolwa nu kwezya ukwiluka, lilyo kwene kuloleka umwi ala aimi apa nkolelo yane.

¹⁶ Lyene nuvwa izwi ukufuma mu luzi lwa Ulai, ala likwama liti, “Gabilieli, londolwela umuntu wi muno cilolwa cii calola.”

¹⁷ Lyene lino Gabilieli wizile aimilila apipi na pano naimi, nuvwile intete wakwe cimwi nga impona pansi. Alino anena ati, “We mwana wa muntu, iluka ukuti icilolwa cikumile insita ya mpelelekezyo.”

¹⁸ Lino acili akulanda, impona pansi ala na mano yatiyapaama. Lelo Gabilieli andema, ankatusya nimilila.

¹⁹ Alino avwanga ati, “Nkukulanga vino ivilatumbuka mu ukali wakwe Leza vilaya. Icilolwa cikumile insita iyasontwa yampelelekezyo.

²⁰ “Suuku wino waweni akweti impembe ziili calola ku mawene yaili, uwene wa Medya nu wa Pesya.

²¹ Sawe nawe ali mwene waku Gilisi, nu lupembe ulwali pakasi ka manso yakwe ali mwene wankolelo.

²² Impembe zini izizile zitumba lino ulupembe lwankolelo lwavunyilwe ali mawene yani alayako lino uwene uo ulankanyiziwa nupya yatalaya akome wa wene wankolelo.

²³ “Lino impela ya mawene yalya ilapalama nga na mawene yalya yipisya cakuti yalinzile kuvunukwa, alino lyene kulaya umwene umutalame, umwipe nupya umusomvi.

²⁴ Wene alaya umukome wakwe cimwi, lelo asi ku maka yakwe. Wene alaleta uononesi uwipisye nupya alafikilizya vyonsi vino alacita. Wene alaleta uononesi apa antu yamaka na antu yakwe Leza kwene.

²⁵ Alalenga ukuti usomvi ucitike pamulandu wakuti wene incenjezi. Wene alaya ni cilumba nga alonona antu avule ukwaula kuyasoka. Nupya alakatukila Umwene wakwe yonsi, lelo alononwa ukwaula kuomvya amaka ya muntu.

²⁶ Cilolwa cii ca pamulandu wa mpolelwa zya manguzi ni zya katondo cino calondololwa kunuli cilafikiliziwa. Lelo usunge inkama ya ciko, pamulandu wakuti cilasenda insita ntali lino citatala cafikiliziwa.”

²⁷ Ne Danieli natembosile nu kulambalala amanda avule ala nene mulwale. Lyene inkatuka nu kuya ku kuomba umulimo uno umwene wampile. Lelo icilolwa campezizye amano nupya naposiwe ukwiluka muno calola.