Danieli 6 - Amazwi Yakwe Leza 2013

Danieli yamusumbila mu ninga yakwe yacisama

¹ Cazanzizye Dalyusi kuti asonte alasi umwanda onga na makumi yaili kuti yateeka monsi mu wene wakwe.

² Ukulunda pali yayo, wene wasonsile Danieli nayauze yaili kuti yaangalila alasi yaya nu kuwaka ivintu vya mwene.

³ Lyene Danieli zuwazuwa aloleka ukuti angaluta angalizi yauze mu kuomba. Pamulandu wakwe cico, umwene welenginye uku mulasika pa cifulo ca kwangalila uwene wakwe onsi.

⁴ Lyene angalizi yauze pamwi na alasi yezya kulondelezya imilandu mu miombele yakwe Danieli, lelo yaposiwe kuzana umwi, pamulandu wakuti Danieli wali uwakutailwa nupya wene atacitanga cimwi ciipe nanti caucenjezi.

⁵ Mu kusyalikizya, antu yaa yavwanzyanya yati, “Tutalatala tuzane icili consi cakupeelelapo Danieli umulandu suka sile icikumile upefi wakwe.”

⁶ Acino angalizi na alasi yapita pamwi ku mwene nga yamunena yati, “We mwene Dalyusi, we musambazi si kalukuwala kunuli!

⁷ Swe aomvi swensi kwene, angalizi, alasi, angalizi ya alasi, ni ntunguluzi zyuze, twatituzumilizyanya ukuti we musambazi upele ilamulo nu kukonkomezya ukuti umuntu ali wensi wino alapepa kuli leza ali wensi nanti ku muntu umu manda amakumi yatatu akwiza, umu cifulo ca kupepa kunuli, we mwene, wene alasumbilwa mu ninga yakwe yacisama.

⁸ Acino, we mwene, si pela icipope nu kucilemba apakuti citangalembululwa, iviine na masunde ya ina Mede na ina Pesya yano yatangasenulwa.”

⁹ Acino umwene Dalyusi nawe alemba icipope.

¹⁰ Lyene lino Danieli wamanya ukuti icipope caticilembwa, aya ukwakwe, uku muputule wapapela, kuno amawindo yalozya ku Yelusalemu. Kuku kwene, ndi vino wacitanga lyonsi, Danieli afukama pansi apipi ni windo iliyulwe nga apepa kuli Leza wakwe, nu kumutaizya amaila yatatu umu wanda.

¹¹ Lyene lino anisi yakwe Danieli yaile kweneko wi umba nu kuzana kuno wene akupepa nu kulenga Leza kuti amwazwilizye,

¹² yonsi kwene yaile ku mwene ku kusitaka Danieli. Yavwanzile yati, “Musambazi, uzye wemo utalemvile icipope cakuti umu manda amakumi yatatu yano yaliza umuntu ali wensi wino alalenga icintu icili consi kuli leza ali wensi nanti uku muntu, suka sile kuli wewe, umuntu wiyo alinzile kusumbilwa mu ninga yakwe yacisama?” Umwene nawe aasuka ati, “Avivyo kwene, ilamulo lilyo lilinzile lyawakwa iviine amasunde ya ina Mede na ina Pesya, yayo atangasenulwa.”

¹³ Lyene antu yaya yanena umwene yati, “Danieli, wenga uwamu azya ukufuma ku Yuda, atacindika we musambazi, nanti ukuyela cipope kwene cino wemo walemba. Lelo wene akapepa amaila yatatu umu wanda.”

¹⁴ Lino umwene uvwile cii, asakamikwa wakwe cimwi nga aezya na maka ukuzana inzila yakupususizyamo Danieli. Wene watwalilile ukwezya ukumupususya mpaka ilanzi iliwa.

¹⁵ Lyene anisi yakwe Danieli nupya yiza ku mwene yamunena yati, “Musambazi, wemo umanyile ukuti ukulingana na masunde ya ina Mede na ina Pesya kusi icipope cino umwene wapeela icingasenulwa.”

¹⁶ Caleka umwene apeela ilamulo kuti yaleme Danieli nu kumusumbila mu ninga yakwe yacisama. Umwene anena Danieli ati, “Si Leza wako, wino ukatumikila lyonsi, ale akutuule.”

¹⁷ Alino yaleta iciliwe nu kuciika apa mulyango wa ninga ilya, nga umwene nawe aiika icimanyililo cakwe ca wene nga ni ca vilolo vyakwe apa ciliwe cici, apakuti kutaya umwi uwakutuula Danieli.

¹⁸ Lyene umwene aswilila kwisano lyakwe nga usiku onsi wene ataizi utulo awe, nanti ukulya icakulya nanti ukulola iviila vyakumuzanzya.

¹⁹ Apa macaca, umwene akatuka acincila aya ku ninga yakwe yacisama.

²⁰ Lyene lino wafika apipi ni ninga ilya, apunda ni zwi ilisakamale ati, “We Danieli, umuomvi wakwe Leza waumi! Uzye Leza wako, wino ukatumikila lyonsi nu mwenzo onsi, watakutuula kuli yacisama?”

²¹ Danieli nawe aasuka, ati, “We mwene, kalukuwala kunuli!

²² Leza wane waliwatuma umungeli wakwe, nga nawe wali wafumpika imilomo yakwe yacisama apakuti yatanduma. Wene watacita cico apamulandu wa kuzana ukuti nene wakaele apa manso yakwe nupya ntiifya kunuli, we mwene.”

²³ Apakuuvwa cii, umwene asansamuka wakwe cimwi nga apeela ilamulo kuti yafumye Danieli mu ninga ilya yakwe yacisama. Caleka yamufumya nga yataweni icilonda nanti cimwi apa mwili wakwe, pamulandu wakuti Danieli wataile muli Leza wakwe.

²⁴ Lyene umwene apeela ilamulo kuti yaleme antu yalya yonsi apile Danieli umulandu, nga aleka yayasumbila mu ninga yakwe yacisama, kumwi na aci yao na ana yao kwene. Lino yatatala yapona pansi umu ninga, yacisama yayanka nu kuyakokota amafupa yao yonsi.

²⁵ Lyene umwene Dalyusi alembela antu amu nko zyuze zyonsi, ni misango ya antu yonsi, ni ndimi zyonsi, ati, “Nkumulamuka!

²⁶ Nemo nkupeela ilamulo lyakuti umuntu wensi umu wene wane onsi alinzile ukoopa nu kucindika Leza wakwe Danieli. ‘Wene ali Leza waumi, nga amateekanga amanda pe. Uwene wakwe utalatala ononwe, nu utesi wakwe utalatala usile.

²⁷ Wene akapususya nu kutuula. Wene akacita ivizungusyo ni vinjelengwe. Wene watatuula Danieli kuli yacisama yatamukoma.’”

²⁸ Acino Danieli aya nu longo mu manda ya utesi wakwe Dalyusi na wakwe Kilusi umwina Pesya.