Danieli 3 - Amazwi Yakwe Leza 2013

Nebukadineza wapeela ilamulo kuli cila muntu kuti apepe iciluwi

¹ Umwene Nebukadineza wapanzile iciluwi cakwe zaabu, cino mu utali cali amafiti amakumi fundimbali nu mu kusalala namo cali amafiti fundimbali, nga alino aciika mu nyika ya Dula mu muputule wa mpanga ya Babiloni.

² Lyene apeela ilamulo kuti yame intunguluzi zyakwe zyonsi, yakateeka, alasi, angalizi, yampandamano, yakasunga ya cipao, yakapingula, yakaputula ya milandu, nga ni ntunguluzi zyonsi zyasyala zyamu muputule wa mpanga ilya.

³ Acino intunguluzi zizi zyonsi zikongana ku kwiza fukamila iciluwi cino umwene Nebukadineza wisile kuku, nga nayo yimilila inkolelo yakweco.

⁴ Lyene kuma wa mbila auma imbila ni zwi likulu ati, “Mwe antu amu nko zyonsi, mwe antu amisango yonsi, ni ndimi zyonsi!

⁵ Zuwazuwa lino muvwa ukulila kwa ntandala, nga palondelela nu kulila kwa visekese, utungoma, amazeze, ni mitolilo ya misango yonsi, lyene mwensi kwene mulinzile kupona pansi nu kupepa iciluwi cakwe zaabu cino Nebukadineza wika.

⁶ Umuntu ali wensi wino asikufukamila nu kupepa iciluwi cakwe zaabu amasumbwa zuwazuwa mwi lungu lya moto.”

⁷ Caleka lilyo kwene lino yuvwa ukulila kwa ntandala, nu kwa mitolilo, nu kwa visekese, nu kwa mapango nu tungoma nga ni vyakulizya vyonsi, antu anko zyonsi, ni ndimi pali pakufukama nu kupepa iciluwi cino umwene Nebukadineza wimike kuku.

Yacuza yakwe Danieli yatatu yapeelwa umulandu wakuntayela

⁸ Apa nsita kwene ilya aina Babiloni yamwi yiza inkolelo nu kupeela Ayuda umulandu.

⁹ Yanena umwene Nebukadineza yati, “Si kalukuwala kunuli we mwene Nebukadineza!

¹⁰ Musambazi wemo watupeela ilamulo lyakuti zuwazuwa lino ukwimbila kwatandika, cila muntu alinzile kufukama nu kupepa iciluwi cakwe zaabu,

¹¹ nu kuti wiyo uwakana ukufukama nu kucipepa alinzile wasumbilwa mwi lungu lya moto.

¹² Kuli Ayuda yamwi yano we mwene wika apa wangalizi mu muputule wa mpanga ya Babiloni. Antu yaa, a Syadilaki, Mesyaki, na Abedinego, yayo akukana ukuyela amalamulo yako we musambazi. Yene yasipepa nanti ukufukamila iciluwi cakwe zaabu cino wika kuku.”

¹³ Apakuvwa cico, umwene afuluma sile nu ukali nga apeela ilamulo lyakuleta antu yalya yatatu inkolelo yakwe.

¹⁴ Alino ayanena ati, “Syadilaki, Mesyaki, na Abedinego, uzye icacumi ukuti mwemo mukukana kufukamila nu kupepa iciluwi cane cakwe zaabu cino nika kuku?

¹⁵ Lyene, zuwazuwa lino muvwa ukulila kwa ntandala, imitolilo, ivisekese, amapango, ni viombelo vyuze vya kulizya nu kwimba, mulinzile ukufukama nu kupepa iciluwi cakwe zaabu. Ndi cakuti mwakana ukucita cico, lyene zuwazuwa yamamusumbila mwi lungu lya moto. Uzye mukwelenganya ukuti akunoli leza wino angamutuula?”

¹⁶ Syadilaki, Mesyaki, na Abedinego yaasuka umwene yati, “We mwene Nebukadineza, swemo tutalinzile ukuipokolola inkolelo yako uku mulandu uu.

¹⁷ Ndi cakuti Leza wino tukatumikila akweti amaka akututuula ku moto wa mwi lungu nu ku maka yako, ale lyene amacita cico.

¹⁸ Lelo nanti angala atakututuula, tukasi kuti we mwene umanye ukuti tutamatumikila tuleza twako nanti ukupepa iciluwi cako cakwe zaabu cino wika kuku.”

Yacuza yakwe Danieli yatatu yapingwilwa kukomwa

¹⁹ Lyene umwene Nebukadineza asokela Syadilaki, Mesyaki na Abedinego wakwe cimwi, nga afinya na pa manso ku mulandu nu ukali. Acino apeela ilamulo lyakuti yapembelele ilungu lili amaila cinimbali ukuluta vino yalipembelelanga lyonsi.

²⁰ Nga lyene apeela ilamulo ku asilika yamwi amu mpuka ya vita vyakwe kuti yanyepe Syadilaki, Mesyaki na Abedinego nu kuyasumbila mwi lungu lya moto.

²¹ Acino antu yaa, yano yazwite imingila yao, amatolozi, ni vizwalo vyuze vyasyala, yayanyepa nu kuyasumbila mwi lungu lya moto.

²² Lyene pamulandu wakuti umwene wapile ilamulo nu kukonkomezya ukuti yapembelele ilungu mpaka likaye wakwe cimwi, icimbilimbili ca moto cosile yakalinda yaya yano yatwazile Syadilaki, Mesyaki na Abedinego kwi lungu lya moto.

²³ Lyene Syadilaki, Mesyaki na Abedinego, alanga yacinyefilwe, yaponela mu cimbilimbili ca moto uwa lunkumanga.

²⁴ Lilyo kwene Nebukadineza avwandamuka nu kumangala nga auzya yampandamano yakwe ati, “Uzye tutali twanyepa antu yatatu nu kuyasumbila mwi lungu lya moto?” Nayo yaasuka yati, “We musambazi, ala vivyo kwene avino twali twacita.”

²⁵ Lyene umwene avwanga ati, “Lolini! Uzye pacani cino nkulola antu yani yakulyatokela mu moto, ala yatanyefilwe, nga na wakwe cini nawe akuloleka wa mungeli?”

Antu yalya yatatu yasapulwa nu kulasikwa pa vifulo

²⁶ Acino Nebukadineza aya ku mulyango wi lungu lya moto nga apunda ati, “Syadilaki! Mesyaki! Abedinego! Mwe aomvi yakwe Leza Wapapelapela, fumini mumo! Izini kuno!” Caleka lilyo kwene Syadilaki, Mesyaki na Abedinego yafuma mu moto.

²⁷ Lyene yakateeka yonsi, na alasi, na angalizi na yampandamano ya mwene yakongana kuti yalolekesye antu yaya yatatu, yano yatapiile nu moto ulya. Inyele zyao zitapiile, ni vizwalo vyao vitapiile, nayo yatanunsile icunsi.

²⁸ Lyene umwene Nebukadineza avwanga ati, “Lumbanyini Leza wakwe Syadilaki, Mesyaki, na Abedinego! Wene wali watuma umungeli wakwe nu kupususya antu yaa yano yakamutumikila nupya yataila munoli. Antu yaa yali yakana ukuyela amalamulo yane nupya yatemwa ukufwa ukuluta kupepa nanti kutumikila kaleza kali konsi suka sile Leza wao aisikulu.

²⁹ “Caleka ne mwene nkupeela ilamulo lyakuti umuntu ali wensi uwamu luko luli lonsi nanti indimi wino wavwanga amazwi amisuula kuli Leza wakwe Syadilaki, Mesyaki, na Abedinego, wene alinzile kuputolwa mu vimpilinsya ni ng'anda yakwe itamolwe mpaka iye citalang'anda. Pano kusi leza muze wino angatuula wakwe vino wii akacita.”

³⁰ Lyene umwene alasika Syadilaki, Mesyaki na Abedinego apa vifulo mu muputule wa mpanga ya Babiloni.