Danieli 12 - Amazwi Yakwe Leza 2013

Insita zya mpela

¹ Umungeli uwazwite insalu itelepelele alanda ati, “Apa nsita ilya umungeli mukulu Mikaeli, wiyo akacingilila antu yako, alaloleka. Lyene kulaya insita ya macuzi, iipisye wakwe cimwi ino itatazile iyako ukufuma sile ku kutandika kwa nko ukufika na pilelo kwene. Lelo lino insita ilya ilafika, antu yako yonsi yano amazina yao yalembwa mu lupapulo lwakwe Leza yalatuulwa.

² Aingi muli yayo afwa mpiti yalazyukuka: yamwi uku umi wa pee, yamwi nayo ku kupupana kwa pee.

³ Antu akwata amano nayo yalaengesa wa kuswepa kwa mwiyulu, nga na yayo asambilizya antu avule ukucita ivisuma yalaengesa wa ntanda amanda pe.”

⁴ Lyene wene anena ati, “Lelo wemo, we Danieli, kupika ulupapulo nu kwikapo icimanyililo ukufika uku nsita ya mpela ya nsi. Pali ndakai, antu avule yamaezyanga ukumanya ivikucitika.”

⁵ Lyene ne Danieli indola antu yaili ala yaimi umu mbali ya luzi, wenga apa cituntu conga nu muze apa cituntu cuze.

⁶ Wenga auzya umuntu uwazwite insalu itelepelele, wiyo uwali lwa kupela ya luzi ati, “Uzye ukufika lilaci lino ivintu vii vyakuzunguka vilafikiliziwa?”

⁷ Umuntu wilya uwazwite insalu itelepelele, uwali lwa kupela ya luzi, atumpula amakasa yakwe mupela nga alaya nu mulapo umwi zina lyakwe Leza wa manda pe. Lyene nani inuvwa kuno akuti, “Cilaya umu kasita, mu tusita na citika wa kasita. Lino kuzunyiwa kwa antu yakwe Leza kulasila, ivintu vii vyonsi ale vyacitika mpiti.”

⁸ Nani inuvwa vino wene walanda, lelo ukwaula kuti niluke. Acino imuzya inti, “Musambazi, uzye icintu cii cilafika uli uku mpela?”

⁹ Nawe pali pakwasuka ati, “We Danieli, ulinzile kupita, pamulandu wakuti amazwi yaa yalinzile kusungwa inkama nu kufiswa mpaka uku mpela ya nsita.

¹⁰ Antu avule yalasangululwa. Yayo akacita vyaukakasi yatalasangululwa, lelo yalatwalilila ukuya aukakasi. Kusi nanti wenga muli yayo akacita vya ukakasi wino aliiluka, suka sile yayo akwata amano.

¹¹ “Ukutandikila sile lino ukupeela kwa mpolelwa zya cila wanda kulasila, kuli kuti, ukutandikila sile apa nsita ya cintu caononyi cakoofya, amanda 1,290 yalapita.

¹² Alongo ayayo yano yalatwalilila ukuya acumi ukufika nu kumpela ya manda 1,335!

¹³ “Nga nawe, we Danieli, ulinzile kuya wacumi kufika nu kumpela. Alino lyene ulafwa, lelo apa mpela ya nsita ulazyukuka kuti upokelele caupyanyi cako.”