Danieli 1 - Amazwi Yakwe Leza 2013

ILYASI LYAPALI DANIELI NA YACUZA YAKWE YATATU ( 1:1–6:28 ) Danieli wasambiliziwa uku Babiloni

¹ Mu mwaka wakwe citatu uwa kuteeka kwakwe Yeoyakimu umwene waku Yuda, Nebukadineza umwene waku Babiloni wizile ku Yelusalemu nu kuzanza amu musumba.

² Nawe Yawe wapile Yeoyakimu umwene waku Yuda mu makasa yakwe Nebukadineza, kumwi ni viya vino yafumizye mu Ng'anda ikulu yakwe Leza. Nawe avisenda avitwala ku ng'anda ikulu yakwe kaleza kakwe ku Babilonia nga aviika mu ng'anda ya cipao cakwe leza wakwe.

³ Lyene umwene Nebukadineza apeela ilamulo kuli Asyipenazi, umukalamba wakwe yacilolo yakwe, kuti alete aina Izlaeli yamwi aku wene nga na yamwi acindame

⁴ mu alumendo yano yatakwata indema nanti imwi, ayembe mukuloleka, yayo acincile ukusambilila, apakuti yene yangalinga ukutumikila mwi sano lya mwene. Asyipenazi wapilwe umulimo wakuyasambilizya kuwelenga nu kulemba icilimi ca ina Babiloni.

⁵ Umwene wapile ni lamulo lyakuti cila wanda yalinzile kuyapela vyakulya nga na waini wino yakaimula umwene. Apacisila ca kuyasambilizya imyaka itatu alumendo yaya yalinzile kulolekela ku mwene.

⁶ Pali yayo asolwilwe pali Danieli, Hananiya, Misyaeli, nga na Azaliya, nga yonsi kwene yali amu mutundu wakwe Yuda.

⁷ Cilolo mukalamda apali pakuyatemela amazina apya ali ndi yaa: Danieli yati a Belitesyazali, Hananiya yati a Syadilaki, Misyaeli yati a Mesyaki, na Azaliya yati a Abedinego.

⁸ Lelo Danieli wene aipingula ukukana ikowezya umwisikulu ku vyakulya na waini wakwisano, nga auzya cilolo mukalamba kuti amupeele insambu zyakuntaikowezya mu musango kwene ndi uu.

⁹ Lyene Leza alenga kuti cilolo wilya asakamale Danieli nu kumuvwila uluse.

¹⁰ Lelo nanti cali vivyo, Asyipenazi anena Danieli ati, “Nemo nkoopa umwene umusambazi wane, wiyo uwatapela ilamulo lyakukupeela vino ulinzile ukulya nu kumwa. Uzye lyene apacani cino umwene angalola ukuti wemo utakuloleka ningo ukuluta alumendo yauze asyala? Ndi caya vivyo ale lyene umwene angapeela ilamulo kuti yankome.”

¹¹ Acino Danieli aya kuli kalinda wino Asyipenazi wasonsile kuti amulinda kumwi na yacuza yakwe yatatu.

¹² Lyene Danieli amunena ati, “Twapapata utwezye umu manda ikumi. Watupeela sile ivizao avino twalya nga na manzi akumwa.

¹³ Lyene uce ukolanye imilolekele itu ni ya alumendo yaya yano yakalya vyakulya vya kwisano, nga lyene ucitile swe azya yako ukulingana na vino tukuloleka.”

¹⁴ Acino kalinda wilya pali pakuzumilizya Danieli na yacuza yakwe ukucita cicyo, ayezya umu manda ikumi.

¹⁵ Apa mpela ya manda yalya ikumi, alumendo yaa yaloleka atelepelele nupya amalamba ukuluta yayo alyanga vyakulya vya kwisano.

¹⁶ Acino kalinda wilya ata kuyapela vyakulya vya kwisano, atwalilila kuyapela sile ivizao na manzi.

¹⁷ Caleka Leza apeela alumendo yaa yani amano nu kwiluka kwa misango yonsi ya vyalembwa na masambililo. Ukulunda pali cico, apeela Danieli amaka akulondolola ivilolwa ni viloto vya misango yonsi muno viile.

¹⁸ Apacisila ca myaka itatu ino umwene wisile kuti yayatwale kunoli, Asyipenazi, cilolo mukalamba atwala alumendo yonsi kuli Nebukadineza.

¹⁹ Umwene nawe pali pakulandana nayo, nga azana ukuti kusi nanti wenga muli yaya asyala uwalingine na Danieli, na Hananiya, na Azaliya. Acino yatandika ukutumikila umwi sano.

²⁰ Mu vintu vyonsi ivikumile amano nu kwiluka vivyo vino umwene wayuzyanga, wazananga ukuti alumendo yaa yani yalusile amaila ikumi amamanyamano yonsi kumwi na yakasapoola amu wene wakwe onsi.

²¹ Danieli wasile kuku kwene kwisano mpaka nu mu mwaka wa kutandika kwa kuteeka kwa mwene Kilusi.