Ayebulai 9 - Amazwi Yakwe Leza 2013

¹ Upangano wankolelo wakweti malamulo a mipepele ni cifulo ca mipepele icakuzilwe na antu.

² Antu iimike itaalu. Muputule wakwe conga yawamanga ukuti Ncende Yamuzilo. Muu umwali cakutekapo ilampi ni cipango apali umukate uno wapilwe kuli Leza.

³ Kucisila ca cisalu ca kucinga kwali Ncende Yamuzilo Kuluta.

⁴ Muu umwali kavuwa kakwe zaabu pano yocelanga ubani. Mwali (Alaka) mbokosi ya upangano ino yapomilwe na zaabu monsi kwene. Nu mukasi mwisilwe musazi wakwe zaabu muno mwali mana, nsonzo yakwe Aaloni iyawalwile maluwa, nga ni vipampa vya mawe viili ivyalemvilwepo masunde.

⁵ Papela ya mbokosi pali vimwi ivyakoline wa angeli vino yakati yakelubi, vyalanganga kucindama kwakwe Leza. Vyali na mapa akonzolwilwe nu kuvimba pa mbokosi apali pa ncende pano maifyo yelelwanga. Lelo ndakai isi ili nsita yakulondolola vyonsi mu kuzika.

⁶ Vii avino vintu vyatantikwe. Yasimapepo ingilanga cila wanda mu muputule wakwe conga ku kuomba milimo yao.

⁷ Lelo mu muputule wakwe ciili mwingila sile Simapepo Mukulu, nupya wene wingilangamo sile lyonga pa mwaka. Wene pakwingilamo wasendanga uwazi uno wapelanga kuli Leza, pa maifyo yakwe umwisikulu na pa maifyo ya antu yauze yano yacitilanga kusi ku mufulo.

⁸ Mu utantiko uu onsi amuno Mupasi Wamuzilo akusambilizya paswe ukuti inzila ya kwingila mu Ncende Yamuzilo Kuluta itange iyeko lino muputule wakwe conga uciimi.

⁹ Cii icisontelelo ca nsita ya ndakai. Cikusenula ukuti mawila ni mpolelwa zya nyama vino vikapelwa kuli Leza vitangalenga mwenzo wa mupefi kuya ufumaluke.

¹⁰ Cili vivyo pamulandu wakuti vyene vikaomviwa mu malamulo ya milile, nu kumwa nga ni misango ipusanepusane iya kuswefiwa. Vii vyonsi amalamulo ya pa vintu vino vikaloleka, yano yakuomba kufika lino Leza alaleta utantiko upya.

¹¹ Lelo Klistu wiza wakwe Simapepo Mukulu wa vintu visuma vino vili pano. Itaalu muno wene akutumikila ilikulu nupya ilifumaluke cuze. Lyene litapanzilwe nu muntu. Kuli kuti lyene lisi lya pano nsi.

¹² Lino Klistu wingile lyonga mwitaalu, nu kwingilila limwi mu Ncende Yamuzilo Kuluta wene atasenzile wazi wa mbuzi na yacipambasi ya ng'ombe kuti apeele impolelwa. Lelo wene wasenzile wazi wakwe umwisikulu nu kutulonkela ukuluzi.

¹³ Wazi wa mbuzi na yacipambasi ya ng'ombe nga ni twi lya ndama vyonsi vikakanyiwa pa antu akowele kulingana ni mipepele ya Ciyuda. Mu musango uu amuno yakaswefiwa ku kukukowela kwa ku mwili.

¹⁴ Endi, vino cii ica cumi, uwazi wakwe Klistu ulaomba vikulu kuluta. Mu Mupasi wape, wene waipile kuli Leza wa mpolelwa yaula ndema. Wazi ukaswefya myenzo itu kufuma ku malamulo aciwelewele pakuti twatumikila Leza.

¹⁵ Pamulandu kwene uu, Klistu ali muntu wakukundanya antu na Leza mu upangano upya pakuti yao yano Leza waama yangapokelela upolelelo wape uno Leza walavile. Cii cingacitwa pamulandu wakuti Klistu wafwile, ni mfwa yakwe ikakulula antu ku maifyo yano yacisile lino upangano wankolelo waombanga.

¹⁶ Pakufikilizya cilayo cakusila umuntu muze vintu, suka wino uwalavile wafwa.

¹⁷ Pano cilayo citangasenula cimwi lino uwalavile acili nu umi. Cene cikaomba sile pacisila ca kufwa kwakwe.

¹⁸ Uli mulandu uno nu upangano wankolelo kwene waombanga sile pa kuomvya uwazi.

¹⁹ Nkolelo Mose wanenyile antu masunde yonsi ndi vino Leza wamupile. Lyene atoola wazi wakwe yacipambasi ya ng'ombe nu wa mbuzi, atikanya na manzi, nga ausansa pa lupapulo lwa Masunde, na pa antu onsi, ala akuomvya kamuti kakwe isopu na mavumbu ya mfwele ayenzu.

²⁰ Avwanga ati, “Uu uwazi uno Leza watama insimbi ya upangano namwe uno wamunena kuti mwayela.”

²¹ Mu musango uli onga Mose asansa wazi pi Taalu lya Upangano nga na pa vintu vyonsi vino vyaomviwanga mu upefi.

²² Kulingana na Masunde yakwe Mose, vintu vinono sile visiswefiwa nu wazi. Maifyo nayo yasyaelelwa ndu wazi utapongolwilwe.

Impolelwa yakwe Klistu ikafumya maifyo

²³ Vintu vivi vyene ukukolanya kwa vintu vya mwiyulu ndi vino vili, nupya vyene vyaswefiwanga mu musango ndi uu. Lelo vintu vya mwiyulu vyene vikalondekwa kuswefiwa ni mpolelwa isuma cuze.

²⁴ Pano Klistu atingile mu Ncende Yamuzilo ino iyapangwa nu muntu, nupya ino iyali ukukolanya kwakwe iyo ya cumi. Wene wingile mwiyulu kwene muno ndakai ali pamwi na Leza kuti atwazwa.

²⁵ Simapepo Mukulu wa Ciyuda wingilanga mu Ncende Yamuzilo Kuluta lyonga cila mwaka, ala asenzile wazi wa nyama. Lelo Klistu atingile kwiyulu kuti apeela impolelwa lili lili,

²⁶ pano acita vivyo wange acule maila aingi kufuma ku kuumbwa kwa vintu vyonsi. Lelo ndakai, lino mpelelekezyo ya nsita zya mikulo yonsi yapalama, wene waloleka lyonga nupya calimwi kuti atufumizye maifyo kupitila mu mpolelwa ino umwisikulu waipile.

²⁷ Muntu wensi alinzile ukufwa lyonga nga pacisila apingulwe na Leza.

²⁸ Mu musango uli onga Klistu wapilwe kuya impolelwa yakufumya maifyo ya antu aingi. Wene alaloleka iila lyakwe ciili, asi ku kufumya maifyo, lelo ukwiza tuula yao akumulolela.