Ayebulai 7 - Amazwi Yakwe Leza 2013

¹ Mekisedeki wii wali umwene uwaku Salemu nupya simapepo wakwe Leza mukulu uwa papelapela. Lino Abulaamu akufuma ku ulwi kuno wacimvizye yakateeka yani, Mekisedeki amukomanya nu kumupolelela.

² Abulaamu nawe amupeela icikumi pali vyonsi vino wasenzile. Mekisedeki izina lino nkolelo likusenula ukuti “Kateeka wino akaleta uwololoke.” Cakwe ciili wene wali a kateeka wa Salemu, cikusenula ukuti, “Kateeka wino akaleta mutende.”

³ Atamanyika isi nanti nyina, nanti vikolwe vyakwe, atakweti utandiko wa manda yakwe nanti mpelelekezyo ya umi wakwe. Wene akoline wa Mwana wakwe Leza, nupya a simapepo wa manda pe.

⁴ Lyene mwalola vino wene wali umucindame. Abulaamu cikolwe citu icalumbwike, wamupile icikumi pali vyonsi vino wasenzile kufuma ku anisi yakwe yano wacimvizye.

⁵ Masunde yakwe Mose yati, yasimapepo, amu mupanda wakwe Levi yatoola icikumi pali vino aina Izlaeli yakwata, kuli kuti yatoola ku antu yao nanti angala antu yao nao kwene ana yakwe Abulaamu.

⁶ Mekisedeki atali uwamu mupanda wakwe Levi, lelo Abulaamu uwapokelile malayo yakwe Leza, wamupile icikumi nga apolelelwa na aliwe.

⁷ Muntu wensi atangapazya ukuti wino akapolelela alusile umuntu wino akupolelelwa.

⁸ Yasimapepo yakapelwa icikumi pali vino antu yakakwiila. Yasimapepo yakafwa suka sile Mekisedeki. Malembelo yakasambilizya ukuti wene ali nu umi.

⁹ Ndakai amu mupanda wakwe Levi ayano yakapelwa icikumi kufuma ku antu. Lino Abulaamu wapile Mekisedeki icikumi, lyene na Levi kwene wamupileko icikumi.

¹⁰ Cili ndi vivyo pamulandu wakuti Levi wavilwe cisila mu akazi kakwe Abulaamu, wino Mekisedeki wakomenkinye.

¹¹ Masunde yakwe Mose yano apilwe ku ina Izlaeli iimikwe pali usimapepo wa ina Levi. Kuomba kwakwe yasimapepo aina Levi ndi kwali ukufumaluke, ale lyene kutange kuye usimapepo uze uwamu mwata wakwe Mekisedeki usi uwamu mwata wakwe Aloni.

¹² Pano lino usimapepo wasenulwa, ni sunde kwene lilinzile kusenulwa.

¹³ Vintu vii vikalanda pa Mwene witu wino wali uwamu mupanda uiyele. Nupya kutali umwi uwamu mupanda wakwe wino uwatazile aomba mulimo wakwe usimapepo.

¹⁴ Camanyikwa ningo ndi vino wene wavilwe mu mutundu wakwe Yuda. Lelo Mose atalanzile mutundu uu lino wavwanzile ivya pali yasimapepo.

Simapepo namuze akoline na Mekisedeki

¹⁵ Kuvwika kwakwe cii kwaya paswe, pa kuzana ukuti simapepo muze muiyele nupya akoline na Mekisedeki, wasontwa.

¹⁶ Simapepo wiya wasonsilwe asi pamulandu wa malamulo ya antu. Lelo kupitila mu maka ya umi usi na mpela.

¹⁷ Pano calembwa mu malembelo cati, “Ulaya simapepo manda pe mu mwata wa usimapepo wakwe Mekisedeki.”

¹⁸ Lyene ilamulo lyampiti likwa pa mbali, pano litali na maka nupya litali na mulimo.

¹⁹ Pano Masunde yakwe Mose yatalenzile muntu kuya mufumaluke. Ndakai twapelwa upaalilo usuma cuze nupya wene ungatupalamika kuli Leza.

²⁰ Kulunda papo, Leza atalafile mulapo lino yauze yasontwanga yasimapepo.

²¹ Lelo Yesu lino wingile usimapepo kwali mulapo, lino Leza wamunenyile ati, “Mwene walaya nu mulapo, nupya atanga lapuluka, ‘Wewe simapepo wa manda pe.’”

²² Lyene kulapa kuu kukalenga kuti Yesu aye cisininkizyo ca upangano usuma ukuluta.

²³ Uli upusano wakuti yasimapepo yali aingi lelo yafwanga kwaula kutwalilila milimo yao.

²⁴ Lelo Yesu uwa umi manda pe, nu mulimo wakwe uwa usimapepo usyatolwa nu muntu muze.

²⁵ Acino na ndakai kwene wene akweti maka akutuula yao akaiza kuli Leza kupitila munoli. Pano wene uwa umi manda pe pa kuyapapatilako kuli Leza.

²⁶ Lyene Yesu ali Simapepo Mukulu wino akafikilizya vilondwa vitu. Wene uwa muzilo. Wene atakwata mulandu, munoli mutaya ui. Wene wapatulwa kuli yakaifya, nupya wasendwa kwiyulu kupeelapela.

²⁷ Wene atakolana na Simapepo Mukulu muze. Citakulondekwa kuti wene apeela impolelwa cila wanda, inkolelo zya pa maifyo yakwe nga ni zya pa maifyo ya antu asyala. Lino waipile lyonga umwisikulu, wene waipile kuya impolelwa yonga sile iya manda pe.

²⁸ Masunde yakwe Mose yakasonta antu asi yafumaluke kuti yaye yasimapepo akulu. Lelo ulayo wakwe Leza uno wene wacisile nu mulapo wizile cisila ala Masunde yakwe Mose yapeelwa, wene wasonta Mwana. Mwana wacitwa mufumaluke manda pe.