Ayebulai 5 - Amazwi Yakwe Leza 2013

¹ Simapepo Mukulu wensi akasololwa kufuma mu antu yauze. Wene akasontwa kuti atumikile Leza pa kuyazwa, nu kupeela impolelwa na mawila kuti maifyo yelelwe.

² Simapepo Mukulu wakwata utonte mu misango iingi. Acino wene akaezya ukutontela antu atutu nupya yano akaponga.

³ Wene alinzile kupeela impolelwa pa maifyo ya antu na pa maifyo yakwe kwene.

⁴ Kusi umwi akaisolwela kupelwa mucinzi wa kuya Simapepo Mukulu. Suka sile waamwa na Leza, wakwe vino Aaloni wamilwe.

⁵ Mu musango uli onga, Klistu umwisikulu ataipile mucinzi wakuya Simapepo Mukulu. Lelo, Leza wamunenyile ati, “Wewe mwanane, pano ilelo nakuvyala.”

⁶ Nupya wene wavwanzile na pauze kwene ati, “Wewe ulaya simapepo manda pe, mu mwata wa usimapepo wakwe Mekisedeki.”

⁷ Lino Yesu wali pano nsi wene wapepanga nu kulenga Leza ni zwi likulu na minsozi, wino uwali na maka akumutuula ku mfwa. Leza wamuvwile, pano wene waicefizye nu kuya uwa cumi kunoli.

⁸ Lelo nanti angala wali u Mwana wakwe Leza, wene wasambilile kuyela kupitila mu macuzi yakwe.

⁹ Na lino wacisilwe umufumaluke, wizile aya intulo ya ufyusi wa manda pe kuli yonsi akamuyela.

¹⁰ Leza nawe pali pakumwama Simapepo Mukulu mu mwata wa usimapepo wakwe Mekisedeki.

Kusokwa Pamulandu wa Kufutatila Utailo

¹¹ Tukweti vintu vingi ivya kulanda pamulandu uu. Lelo cili citale cuze kulondolola kunomuli pano musyauvwa zuwa.

¹² Mwemo mwapilwe insita ilinge yakuti muye yakasambilizya. Lelo mucili mukulonda umwi uwa kumusambilizya masambilizyo ankolelo amwi landwe lyakwe Leza. Mwemo mucili mukumwa iziya lino mulinzile kulya vyakulya vikome.

¹³ Muntu wino acili akumwa iziya ala wene umwana, wino angaposiwa kumanya vilungame nu kuluvyanya.

¹⁴ Mukulanda kuze tumati vyakulya vikome ivya antu aikolo, yano asambiliziwa ningo kupalula visuma ni viipe.