Ayebulai 2 - Amazwi Yakwe Leza 2013

¹ Cili cino tulinzile kwika mano cuze ku mazwi ya cumi yano tuuvwa, nu kukana tintilwa kuze.

² Ilandwe lino Leza wavwangile mu angeli lyali lya cumi, icakuti wiyo atalyuvwile nanti uwalisuzile, wavunwikwe ndi vino camulingine.

³ Uzye lyene tungatuulwa uli ndi tusyakwika mano ku ufyusi wakula musango uu? Mwene umwisikulu uwatandike kulanda pa ufyusi uu, na yao auvwileko mazwi yaa yasininkizye kunotuli ukuti avino cili.

⁴ Leza walunzileko umboni wakwe pakucita vinjelengwe ni vizungusyo vya misango yonsi nu kupeela mawila ya Mupasi kulingana nu kulonda kwakwe.

Wino akatutungulula ku ufyusi

⁵ Leza atasolwile angeli kuti yaye yakateeka amu nsi ipya ino iliza, insi ino tukalandapo.

⁶ Lelo ndi vino umwi mu malembelo wati, “Mwe Leza, uzye umuntu aweni uwakuti mwaiusya, nanti uzye mwana wa muntu nawe icani wakuti usakamale?

⁷ Wene mwamucefizye insita inono pa angeli. Mwamupeela lulumbi nu mucinzi wa Wene,

⁸ na kuti ateeke vintu vyonsi.” Lelo cikalandwa ukuti Leza wacisile umuntu kuya kateeka pa vintu vyonsi. Cii cikulanga paswe ukuti kusi cimwi icasyala. Lelo nanti cingaya vivyo na ndakai tutali tulole ukuti umuntu a kateeka pa vintu vyonsi.

⁹ Lelo ndakai tukalola Yesu wino pa nsita imwi inono wacefiwe kuya pisika lya angeli. Ndakai tukalola vino wene wapelwa lulumbi nu mucinzi pano wene wacuzile kufika lino wafwile.

¹⁰ Cali icisuma ukuti Leza, wino uwaumba vintu vyonsi nu kuvisunga ningo, acite Yesu aye umufumaluke mu kupita mu macuzi kuti atungulule ana yakwe aingi kukumako ku lulumbi lwakwe. Pano Yesu ali ntunguluzi ya kuyatungulula ku ufyusi.

¹¹ Wene akaswefya antu ku maifyo yao, nga aliwe pamwi na yao aswefiwa yonsi kwene Isi a wenga mpo. Uli mulandu uno Yesu asi ni nsonyi zya kuyama ukuti aina yakwe.

¹² Wene wavwanga wati, “We Leza, nemo ndanena aina yane ivya pali wewe. Ndakulumbanya mu ukongano wao.”

¹³ Nupya wati, “Namatailanga Leza wane.” Nupya wati, “Lolini, nemo ndi pano pamwi na ana yano Leza wampela.”

¹⁴ Twazana ukuti yano akwamwa ana, antu akwata munyefu nu wazi. Acino Yesu umwisikulu wizile akolana nayo ku mwili wa untu. Wene wacisile cii kuti mu mfwa yakwe amuno aonone Ciwa, wino uwakwata maka pa mfwa.

¹⁵ Lyene mu musango uu, amuno yayo yano umi wao wayateeka uzya pamulandu wa koopa imfwa, yaye antungwa.

¹⁶ Pano cili paswe ukuti asi angeli yano akaazwilizya. Lelo calembwa ukuti wiza azwa vizikulula vyakwe Abulaamu.

¹⁷ Cii cikusenula ukuti calinzile ukuti wene akolane na ina yakwe muli vyonsi, kuti aye Simapepo Mukulu uwakutailwa nu wa mizu mu kutumikila Leza, na kuti maifyo ya antu yelelwe.

¹⁸ Acino ndakai wene ali na maka yakwazwa yao akutunkwa pano umwisikulu watunsilwe nu kucula.