Ayebulai 13 - Amazwi Yakwe Leza 2013

¹ Mwatwalilila kutemwana wa ina Klistu.

² Mwaiusya kuzengela aenyi mu mang'anda inu. Kwali antu yamwi yano acisile vikwene nu kuzengela angeli kwaula kumanya.

³ Mwaiusya anyepwe, nupya mwayasakamala kwati mwanyepwa nao mu ng'anda yaminyololo. Mwaiusya yao akucula nupya mwayasakamala kwati namwe kwene mukucula ndi vino yakucula.

⁴ Ing'anda ilinzile kucindikwa na antu onsi. Yaiya na Aci yalinzile kutailana. Leza alapingula yao akacita uzelele na yao akacita ulenzyo.

⁵ Mwaikala umi uwa kuntatemwisya impiya, mwalola ukuti vino mukweti vyamukwana. Pano Leza wati, “Ntalatala imusye nanti kumutazyela.”

⁶ Lyene lekini tuvwange nu kupama, tuti, “Mwene ali kazwa wane, ntaloopa cimwi. Uzye icani cino umuntu angancita?”

⁷ Mwaiusya yao ali ntunguluzi zinu, yano amunenyile ilandwe, mazwi yakwe Leza. Elenganyini musango uno ikalanga na vino yafwile, nga mukolane na alio mu utailo wao.

⁸ Vino Yesu wali apa mutondo avino ali ni lelo, nupya avino amayanga manda pe.

⁹ Mutaleka usambilizyo nanti umwi uwa musango onsi umupumvyanye nu kumufumya umu nzila isuma. Cili cisuma kuti myenzo inu ikomeleziwe ni cikuku cakwe Leza, lelo asi mukuyela malamulo pamulandu wa vyakulya. Yao akayela malamulo yaa citayazwa foo.

¹⁰ Swemo tukweti kavuwa pano yasimapepo akatumikila vya mwi taalu yatangalyapo.

¹¹ Simapepo Mukulu wa Ciyuda akaleta uwazi wa nyama mu Ncende Yamuzilo Kuluta kuti aupeele uye impolelwa ya kupelwa pa maifyo. Lelo vitumbi vya nyama vikaociwa kunzi ya nsakwe.

¹² Pamulandu kwene uu, Yesu nawe kwene wafwilile kunzi ya musumba ukulu, kuti aswefye antu nu wazi wakwekufuma ku maifyo yao.

¹³ Lyene lekini tufumile kunoli kunzi ya nsakwe nu kukumako kukuzewana kwakwe.

¹⁴ Pano kusi musumba ukulu pano pansi uwakuti twikalililemo. Swemo tukulonda musumba ukulu uno uliza.

¹⁵ Lyene muli Yesu amuno lyonsi tulumbanyizizye Leza. Nupya lekini cii ciye wa kupeela impolelwa kunoli, ino tungati uli wila uno ukapelwa pa milomo ino ikamwama ukuti Mwene.

¹⁶ Mwaiusya kucita visuma nu kwazwana pano vintu vii vikoline wa mpolelwa zino zikazanzya Leza.

¹⁷ Mwayela intunguluzi zinu nu kulondela malamulo yao. Yene yakasopa umi winu kwaula kupuza, pasi pano yalalondolola kuli Leza pa kutumikila kwao. Ndi mukuyayela lyene yamaombanga milimo yao ni nsansa. Lelo ndi musyakuyayela, yamaombanga milimo yao nu ulanda nga namwe citangaya cakumwazwa.

¹⁸ Mutwalilile kutupepela. Swemo twasininkizya ukuti myenzo itu ili ningo pano tukalondesya kucita cisuma nsita zyonsi.

¹⁹ Nupya nkumupapata cuze mupepe kuli Leza kuti ace ambwezezye zuwa kunomuli.

Ipepo lyakusyalikizya

²⁰ Leza uwazyukwile Yesu Mwene witu kufuma ku mfwa. Yesu ali Mucemi Mukulu uwa mfwele pano imfwa ino wafwile pa kuipeela impolelwa ili ino wapangamo upangano namwe, wa manda pe.

²¹ Leza wino akapeela mutende amupeele visuma vyonsi vino vikalondekwa pakuti mucite kulonda kwakwe. Nkupepa kuti muli Yesu Klistu, wene acite munotuli vyonsi vino vingamuzanzya. Lulumbi lupelwe kuli Klistu manda pe! Ameni.

Mazwi yakusyalikizya

²² Inane nkumupapata, uvwini ilandwe lii ilya kumukomelezya, pano kalata wii wino nati mulembela asi na mazwi aingi.

²³ Nkulonda mumanye ukuti Timoti mwina witu wasapulwa kufuma mu ng'anda yaminyololo. Ndi cakuti wene angiza zuwa, ndakatuka nawe pa kwiza lolana namwe.

²⁴ Mutulamukile intunguluzi zinu zyonsi pamwi na antu yakwe Leza onsi. Aina itu aku Italya yamulamuka.

²⁵ Cikuku cakwe Leza ciye namwe mwensi.