Ayebulai 1 - Amazwi Yakwe Leza 2013

Leza wavwanga mu Mwana wakwe

¹ Ku mpiti Leza wavwanzile ku vikolwe vitu umu nzila zipusanepusane na maila avule kupitila muli yakasema.

² Lelo mu manda yaa akusyalikizya wene wavwanga kunotuli mu Mwana wakwe. Muli wikwene amuno Leza waumvile uumbo onsi, nupya wene wamusolwile kuti aye umweneco wa vintu vyonsi.

³ Kuyengesa kwa lulumbi lwakwe Leza kukaloleka muli aliwe, nupya wene atapusana na aliwe mu mwata wakwe. Wene walemelela vintu vyonsi kwi zwi lyakwe lya maka. Pacisila cakuswefya antu kufuma ku maifyo, wene waile aikala kwiyulu kwikasa lilunji lyakwe Leza wa maka yonsi.

Ukulu wa Mwana wakwe Leza

⁴ Mwana wacisilwe kuya mukulu kuluta angeli, wakwe vino izina lino wamupeela lyaluta mazina yao.

⁵ Pano Leza atatazile anena umwi uwamu angeli yakwe ati, “Wewe Mwanane, pano ilelo naya So.” Leza atatazile anene mungeli umwi ati, “Ndaya Isi, nawe alaya Mwanane.”

⁶ Lelo lino Leza wali pipi nu kutuma Mwana nupya iyeli lyakwe mu nsi, wene wavwanzile ati, “Angeli yakwe Leza yonsi yalinzile kumupepa.”

⁷ Lelo pa angeli Leza wavwanzile ati, “Leza akacita angeli yakwe ukuya wa miza, na aomvi yakwe nao yaya vimbilimbili vya moto.”

⁸ Alino pa Mwana wakwe Leza wavwanzile ati, “We Leza, cilimba ca wene wako cilikalilila manda pe! Ulungami ili ntuwa ya wene wako.

⁹ Wemo watemwa ulungami wapata lufyengo. Caleka Leza, Leza wako, watakupaka na mafuta ya kuzanga kuluta auzo.”

¹⁰ Nupya ati, “We Mwene, ku utandiko wewe waumvile insi, nupya wewe wapanzile mayulu ku makasa yako.”

¹¹ Vii vyonsi vilasila, lelo wemo ulasyala, vyonsi vilakota wa nsalu.

¹² Nga ulavikonza wa nsalu, nupya ulavicinja wa cizwalo. “Lelo wemo wewe muntacinja, myaka yako italasila.”

¹³ Leza atatazile anena umwi uwamu angeli yakwe ati, “Ikala kwi kasa li lunji lyane kufika lino ndakucimvizya anisi yako yaye wa cilimba ca ngazo zyako!”

¹⁴ Uzye lyene angeli aweni? Yene ali mipasi ino ikatumikila Leza, akaituma pamulandu wa antu alapokelela ufyusi.