Amosi 8 - Amazwi Yakwe Leza 2013

Icilolwa ca muse wa viseekwa

¹ Navyuze vino Yawe Simwandalali wandangizye mu cilolwa aivi: Pali umuse wa viseekwa ivice.

² Yawe anguzya ati, “We Amosi, uzye walola cani?” Nani naasuka inti, “Nalola umuse wa viseekwa ivice.” Lyene Yawe anena ati, “Insita iya mpela ya antu yane aina Izlaeli yatifika. Nanti ciye uli, mpaka njavunuke.

³ “Mu wanda ulya inyimbo zyamu Ng'anda ikulu yakwe Leza zilasenuka ziye inyimbo zya ndosya. Ivyala vilavula wakwe cimwi, nga vilaya ntangali ntangali monsi monsi, Kulaya cele!”

Ukuzanzwa kwakwe Izlaeli

⁴ Uvwini vii, mwemuno mukalyatola yayo aulilwa, mwemuno mukalonda ukonona apina amu mpanga kwene ii.

⁵ Mwemo mukaivwanzya muti, “Uzye umuloleko wa Mwezi Upya ulasila lilaci pakuti tukakazye imbezu? Uzye wanda wi Sabata ulasila lilaci pakuti tukakazye ingano, nu kuti tuomvye ivipimilo vya ucenjezi, nu kukomya umutengo nu kuomvya inteko zya ucenjezi,

⁶ kuti tukale apina na siluva, na yayo aulilwa tuyakaule ni ndyatu, alino tukazye ingano zipese?”

⁷ Yawe, Leza wa ina Izlaeli, watalapa ati, “Endi, Nemo ntalatala nilile ivicitwa vyao iviipe.

⁸ Acino insi ilatenkana, nga nu muntu wensi mu mpanga alanyunguluka! Impanga yonsi ya pansi ilasunkana wa Luzi lwa Nailo, yene ilakatuka nu kupona wa luzi lwa Nailo waku Eguputo.”

⁹ Yawe Simwandalali wavwanga wati, “Mu wanda ulya, apa nsita ya musanya umutwe pakasi, ndalenga kuti ilanzi liwe nu kuponya imfinzi apa mpanga ya pansi umu kasanya.

¹⁰ Ivimulo vinu vya mapepo ndavisenula viye ukulosya, ni nyimbo zinu zyaluzango ndazisenula ziye zyandosya. Mwensi kwene ndaleka yamuzwike ivyakuzwala vya ndosya nu kumupeela ulukuzu. Mulaya wa akwasi yano yakulosya umwana wao umonsi wenga mpo. Uwanda ulya ulaya uwakunyunguluka ukufika napa mpela.”

¹¹ Yawe Simwandalali akuti, “Insita iliiza lino ndaponya icipowe umu mpanga kwene iyo. Italaya inzala ya cakulya nanti lusala lwa manzi awe, lelo ilaya inzala ya kuvwa amazwi yakwe Yawe.

¹² Antu yalakawala konsi konsi ukutandikila sile kuli yemba wenga mpaka kuli yemba muze, nga yafume yakulondalonda amazwi yakwe Yawe ukufuma ku katutu mpaka ku ufumondaka. Lelo yatalayazana, awe.

¹³ “Mu wanda ulya akazyana ayembe na alumendo yamaka nayo kwene yalawa ulwezwe uku lusala.

¹⁴ Yayo yano yakalapa mwi zina lyakwe Asyimaa, kaleza kaluwi ka ina Samaliya, yavwanga yati, ‘Icumi vino leza winu waku Dani ali nu umi,’ nanti yati, ‘Icumi vino leza winu waku Belisyeba ali nu umi,’ nalapa ukuti yonsi kwene yalawa, ukwaula kukatuka nupya.”