Amosi 7 - Amazwi Yakwe Leza 2013

Amosi walola makanta

¹ Vii ali vino Yawe Simwandalali wandangizye umu cilolwa: Yawe wapanzile icikundi cakwe makanta apa nsita ino umwene ala watamala mpiti ukwipa isote, lilyo ala nu mulemvwe watiumela iila lyakwe ciili.

² Lino naweni ukuti makanta wilya walya ivimelwa vyonsi vyamu mpanga ilya, imvwanga inti, “We Yawe Simwandalali, si ungala uwelele antu yako! Uzye antu yakwe Yakobo yangaposya uli? Yene anono nupya atembokele.”

³ Acino lyene Yawe aya na mizu, nga avwanga ati, “Vyonsi vii vitalacitika konsi awe.”

Amosi walola umoto

⁴ Vii, ali vino Yawe wandangizye umu cilolwa: Yawe Simwandalali waamile amakala ya moto kuti avunuke antu. Umoto uo wosile impanga ikulu sana iutandika nu konona ivyalo vyonsi pyu panonsi.

⁵ Lyene nemo mvwanga inti, “We Yawe Simwandalali, nalanguluka nawe, nkukulenga ule ute. Uzye antu yakwe Yakobo yangaposya uli? Yene yasi na maka nanti panono.”

⁶ Acino lyene Yawe aya na mizu, nga avwanga ati, “Vyonsi vii vitalacitika awe.”

Amosi walola umwando wa kupimilako

⁷ Ivintu navyuze vino Yawe wandangizye mu cilolwa aivi: Naweni Yawe ala aimi apipi nu lung'umba nga ala alemile umwando wakupimilako ulung'umba kwene lulo.

⁸ Alino Yawe anguzya ati, “We Amosi, uzye icani cino walola?” Nani imwaasuka inti, “Umwando wakupimilako ulung'umba.” Lyene Yawe avwanga ati, “Nkwika umwando kwene uu pakasi ka antu yane aina Izlaeli kuti ciloleke vino yene yatiyafuma mu nzila. Nanti ciye uli, mpaka njavunuke.

⁹ Incende zya kupepelamo zya amu mupanda wakwe Isaki zilononwa. Incende zyakupepelamo zya ina Izlaeli zilatamolwa. Nupya ndawisya ang'anda yakwe Yeloboamu umu ulwi.”

Amosi na Amaziya

¹⁰ Ku Betele kwali simapepo umwi uwi zina lyakwe Amaziya. Wene watumile inkombe kuli Yeloboamu, umwene waku Izlaeli na mazwi akuti, “Amosi akukatusya intazi apa kutunkola antu amu Izlaeli kuti yakusangukile. Antu yatange yasuule sile amazwi yonsi yano akuvwanga.”

¹¹ Wene Amosi akuvwanga ati, “Yeloboamu alafwila mu ulwi, nga aina Izlaeli yalasendwa mu uzya, uku mpanga ya kutali nu kumwao.”

¹² Lyene Amaziya anena Amosi ati, “Vyavula, we kasema we! Fuma kuno, ngu uye ku mpanga yakwe Yuda! Yanga ukaasema kuko nga na antu ya kukwa kwene yalaakwimula.

¹³ Utakaswilizye kusema ku Betele pasi pano kuku uku ncende yamuzilo iya mwene nupya ukuli ni ng'anda ikulu yamu wene.”

¹⁴ Amosi aasuka Amaziya ati, “Nemo insi kasema nanti panono, nanti umwi uwa mwi umba lyakwe yakasema. Lelo nemo nene kacema wa mfwele nupya nene mulimi wa matingi.”

¹⁵ Yawe uwizile antola, andesya ni milimo ya kucema imfwele, nga anena ati, “Pita ukaseme ku antu yane aina Izlaeli.”

¹⁶ Uli mulandu uno lyene uvwe amazwi yano Yawe akuvwanga. Wemo wavwanga wati, “Utasemela aina Izlaeli pakuti njasoke, nu kuti inte ukunenola ang'anda yakwe Isaki.”

¹⁷ Caleka Yawe akuvwanga ati, “Umuci wako alaya cizelele mu musumba kwene uu. Alino ana yako aonsi na anaci kwene yalakomwa mu nkondo. Impanga yako alayankanya nu kuipeela ku antu yauze. Wemo wemwisikulu ulafwila ku mpanga ya antu atamanya Leza. Alino umucumi aina Izlaeli yalasendwa kuku umu uzya, ukutali ni mpanga ya kumwao.”