Amosi 6 - Amazwi Yakwe Leza 2013

Yawe wakalipila antu akaitakizya

¹ Kalanda kuno muli mwemuno mwaiteeka katungalala kuko ku Zioni, na kuli mwemuno mutakwaziwa mu myenzo kuko ku Samaliya. Kalanda kuno muli mwe akama pakasi ka ina Izlaeli, mwemuno antu yonsi yakaiza kunomuli kuti muyazwe!

² Yangini ku musumba wa Kaline mukailolele. Alino muye ku musumba ukulu ulya uwa Hamati, nga lyene mutentemukile ku Gati ku ina Filisti. Uzye antu amu mawene yaa yalusile amu Yuda nu mu Izlaeli? Uzye impanga yao ikulu kuluta impanga inu?

³ Mwemo musizumila ukuti uwanda uwa kuvunukwa ukwiza, lelo ivicitwa vinu iviipe vikucincizya ukwiza kwa wanda ulya.

⁴ Kalanda kuno muli mwemuno mukalala pa misanzi inu iyembe, ino yapangilwa ku mino ya nzomvu, mwemuno mukasalala pa mipando inu, nu kuipakizya iminyefu ya ana ya mfwele asuma na ana ya ng'ombe anone.

⁵ Umulimo winu ukulizya sile amazeze kwati a Davidi, nu kusika inyimbo zya kwimbila ni vinyenye.

⁶ Mukamwela waini mu mbakuli izizule, nupya mukapakala amafuta amununko usuma, lelo musiuvwa ulanda pa ononesi wa mpanga yakwe Yosefu.

⁷ Caleka mwemwe mulakolela ukusendwa ku uzya. Alino ivimulo nu kuzanganzila kwinu kulaputuka.

Leza wasoka icilumba ca ina Izlaeli

⁸ Yawe Simwandalali akulapa mwi zina lyakwe umwisikulu ati, “Nasoka icilumba ca ina Izlaeli nu kupata ivimang'anda vyao vikulu. Endi, ndapeela umusumba wao na vyonsi ivyayamo ku anisi yao.”

⁹ Ndi cakuti umu ng'anda yonga mulasyala mufisime antu ikumi, nayo kwene yalafwa.

¹⁰ Uwa kazi kakwe wiyo uwatafwa, wiyo alinzile kusunga indosya aliza nu kwizafumya icala umu ng'anda iyo. Alino aluzya ali wensi uwatasyala afisime umu ng'anda kwene ilya ati, “Uzye mumo muli umuntu namuze umupuma wino muli nawe?” Nga nawe alaasuka ati, “Awe, musi nanti wenga.” Alino uwakazi wilya alavwanga ati, “Ikala sile myaa! Tutezya ukulumbula izina lyakwe Yawe.”

¹¹ Lino Yawe wapela ilamulo, amang'anda akulu yalaongololwa na anono nayo yalatamolwa.

¹² Uzye pa mawe imfwalasi zingasimulapo? Uzye pali yemba umwi angalimapo ni ng'ombe? Lelo mwemo mwasenula ulungami waya a sumu, nga ni vyaololoke vyonsi mwavicita ivyakutitikizya nu kuzunya antu.

¹³ Mukuzangila ukuti mulacimvya umusumba wa Lodebala, nu kuvwanga muti, “Uzye swemo tutacimvizye umusumba wa Kalinaimu na maka itu swenga?”

¹⁴ Lelo Yawe Leza wa maka yonsi akuti, “Indamutumila antu amu mutundu uze kuti yize yamuponyezye inkondo, mwe ina Izlaeli. Yene yalamuzunya nzila yonsi ukutandikila sile ku Lebo Hamati mpaka ukufika nu ku cifoloma ca Alaba.”