Amosi 5 - Amazwi Yakwe Leza 2013

Ulwamo lwa kuzenzuka ku ina Izlaeli

¹ Mwe luko lwakwe Izlaeli uvwini amazwi yaa, yano namamunena umukuilizyanya kunomuli.

² “Izlaeli, umwanaci atamanya umonsi, nupya asi namikatukile awe. Wapona nu kwililika panonsi ponsi pano wikala. Pasi umuntu nanti wenga uwakumukatusya.”

³ Yawe Simwandalali wavwanga wati, “Umusumba uwamu Izlaeli uwalile iupita uku nkondo ni vita izimbi lyonga ulasyala na antu umwanda onga sile. Nupya umusumba uwalile iupita ku nkondo ni vita umwanda onga, ulasyala na antu ikumi lyonga sile.”

⁴ Yawe akunena ang'anda yakwe Izlaeli ati, “Izini kunondi, nga mumaya nu umi.

⁵ Lelo mutakongana ku Betele ku kupepa, nanti ukwingila mu Giligali ku kundonda, nanti ukuya pa lwendo ku Belisyeba. Cumi kwene aina Giligali yalasendwa umu uzya, nu musumba wa Betele ulaongolokela limwi.”

⁶ Mwemo muzye vino Yawe akulonda, pakuti muye nu umi. Ndi mutangacita vivyo, wene alakatukila amu mutundu wakwe Yosefu ndi vino umoto ukaoca, alino umoto uo ulakomola aina Betele yonsi pyu ukwaula nanti umwi uwakuuzimya.

⁷ Kalanda kunomuli mwemuno mukanyonganika ulungami, mwemuno mukakonya vyaololoke.

⁸ Aliwe kwene uwapanzile intanda izikaamwa Pileyadi ni zikaamwa Olioni, aliwe kwene akaeletula akanda kuti kaye amacaca, akaeletula umusanya kuti uye usiku. Aliwe kwene akaama amanzi yapali yemba nu kuyapongolwela pa musili. Izina lyakwe a Yawe.

⁹ Aliwe kwene akaonona apinguzi ya mpanzela, nupya aliwe kwene akaongolola amalinga yao.

¹⁰ Mwemo mukapatana na apinguzi asi na kasoozi, mukasokela yayo akavwanga icumi umu matengo.

¹¹ Mukatitikizya apina nu kuyiila lino yakusonka imisonko ya mbezu zyao. Uli mulandu uno nanti mungakuula uli amang'anda ayembe akuulilwa na mawe, mutalikala mwenemo.

¹² Nene manyile uwingi wa viipe vinu nga nu ukulu wa maifyo inu. Mukazunya antu akacita vyaololoke nu kupoka amafukakanwa nu kunyongelekezya imilandu ya apina mu matengo ya milandu.

¹³ Uli mulandu apa nsita yamusango uu, umuntu wa mano akaikala cele, pasi pano yene ili nsita imwi iipisye.

¹⁴ Mwike imyenzo inu pa visuma asi pa viipe awe, kuti muye nu umi. Lyene Yawe Wamaka yonsi alikala namwe lyonsi, ndi vino mwavwanga ukuti avino waya.

¹⁵ Patini iviipe, temwini ivisuma. Sininkizini ukuti mukucita ulungami mu matengo inu amilandu. Namanye limwi alino Yawe Wamaka yonsi alaya na mizu pa antu yonsi asyala amu mutundu wakwe Yosefu.

¹⁶ Uli mulandu uno Mwene, Yawe Wamaka yonsi akuvwanga ati, “Mu miseo yonsi ya misumba mulaya ukulila, nupya mu misolo yonsi antu yalakuuta impooma. Na alimi nayo kwene yalaamwa kuti yize yalosye na antu amanyikisya ukukuuta nayo yize yapoome.

¹⁷ Mu vyalo vyonsi vya matingi mulaya ukulila kutupu, pasi pano ndiza ku kuvunuka mwemwe.”

Uwanda wakwe Yawe

¹⁸ Kalanda kunomuli mwemuno mukalonda uwanda wakwe Yawe! Uzye uwanda kwene uo umukwatile muzano cii? Uwanda uo ulaya uwanda wa mfinzi kunomuli, asi uwanda wa luswepo awe.

¹⁹ Cilaya ndi vino cikaya lino umuntu akuutuka cisama nga lyene akomanya icilyanyi icakolana ni cuuli, nanti vino cikaya ndu muntu wingila mu ng'anda, nga lino wasamila ku lung'umba inzoka imuluma.

²⁰ Uzye uwanda wakwe Yawe utalaleta sile imfinzi itupu, ukwaula kuleta uluswepo foo?

²¹ Yawe wavwanga wati, “Amanda inu a vimulo vyamapepo nayapata nupya nsizangila mu ukongano winu uli onsi uwa mapepo.

²² Nanti angala mwandetela amawila inu akoca na mawila ya mbezu, nemo ntalapokelela. Nanti angala mwandetela amawila inu autandano asuma cuze, nemo ntalayazumila awe.

²³ Mutanganola ni nyimbo zinu zya mapepo! Ntakasi nu kuvwa ku nyimbo zinu zya mazeze.

²⁴ Lelo lekini ulungami winu wakonkoloka wa luzi, nu ololoke winu wa kaluzi kano kasipwa.

²⁵ “Uzye mwe ina Izlaeli, apa myaka amakumi yani ino mwali mu lwanga, natazile imulenga impolelwa nanti amawila?

²⁶ Lelo pamulandu wakuti mukapepa unkolanya wakwe Sakuti, umwene nupya leza winu, nu wakwe Kaiwani, leza winu uwa ntanda, lyene ndakai mumanyenyemula utuluwi tuno mwaipangila.

²⁷ Caleka nemo ndamuzingila uku uzya, ukutali ukupuzya umusumba wa Damasiko.” Avino Yawe wavwanga, wino izina lyakwe a Leza Wamaka yonsi.