Amosi 2 - Amazwi Yakwe Leza 2013

Aina Moabu yalavunukwa

¹ Yawe wavwanga wati, “Aikazi aku Moabu yacili yakutwalilila ukwifya. Acino nemo ntalata ukuyavunuka. Yene yasowike amafupa ya mwene waku Edomu pa kuyoca mpaka yaya itwi.

² Nemo ndaponyezya umoto pa mpanga ya ina Moabu, nga umoto uo uloca amalinga ya musumba wa Kelioti. Aina Moabu yonsi yalafwila umukasi ka congo ca nkondo, lino asilika yalapunda nu kulizya intandala.

³ Indakoma kateeka wao kumwi ni vilolo vyakwe, kumwi nu mwisikulu kwene.”

Ukuvunukwa kwa antu aku Yuda

⁴ Yawe wavwanga wati, “Pamulandu wakuti antu aku Yuda yakutwalilila ukwifya, nemo ntalaposiwa ukuyavunuka. Yene yakapepusya amasunde yane ne Yawe, acino yasinguvwila muli vyonsi vino nkayasunda, nga na Tuleza twaufi utwa vikolwe vyao twayaponzya.

⁵ Acino nemo ndaponyezya umoto mu Yuda, apakuti uce woce nu konona amalinga aku Yelusalemu.”

Upinguzi wakwe Leza pali Izlaeli

⁶ Yawe wavwanga wati, “Pamulandu wakuti antu aku Izlaeli yakutwalilila ukwifya, nemo ntalaposiwa ukuyavunuka. Yene yakakauzya antu aololoke nu lupiya lwakwe siluva, iyakazya na antu apina uku kukauzya ni ndyatu.

⁷ Apina yene yakayacenjezya ukupitila mu kulamoka. Yene yasilonda nu kulola acuzi. Isi nu mwana umonsi yakalongozya nu mwanaci umuomvi wao ali umwi kwene, cakuti yifya ni zina lyane ilya muzilo.

⁸ Antu yakulala cilalelale na pa ncende yakupepelapo, na pa vizwalo kwene vino yapokolola ku apina vyakwe kamukole. Mu ng'anda yakwe Leza amuno yene yakamwela waini wino yapokolola kuli yasimilandu.

⁹ “Lelo manyini ukuti nononyile aina Amoli pamulandu winu, kumwi nu wa mbezu, nanti angala yene yali atali wa miti imikelide, nanti angala yene yali na maka wa miti imioko.

¹⁰ “Mwe ina Izlaeli anene namufumizye mu mpanga ya Eguputo. Nene namutungulwile mu lwanga pa myaka amakumi yani, kuti imupele impanga ilya ya ina Amoli.

¹¹ Nupya nene nasolwile yamwi mu ana inu kuti yaye yakasema, nu kusolola yamwi mu alumendo inu kuti yaye Anazili. Uzye asi avivyo, mwe ina Izlaeli? Avino Yawe wavwanga.

¹² Lelo mwemo mwamwesizye Anazili yaya waini, nu kupeela ilamulo kuli yakasema ilyakuyalesya ukusema.

¹³ “Uvwini, nemo ndamusyunola apa musili nupya mulalila wa maceleta yano yati yanyomelwa ni visendo vya ngano.

¹⁴ Uwa lwilo atalapuuka awe, nu waulamba atalaya na maka. Ni cita citalaituula awe.

¹⁵ Umuntu wa malapwa ni nceto atalazyansya. Ivita vyao ivikasimula pa musili navyo kwene vitaluutuka, nga ni vya pa mfwalasi vitalaituula.

¹⁶ Pa wanda kwene uo ni vita kwene viposye vilasumba ivyanzo nu kuutuka tupu.” Avino Yawe wavwanga.