Amosi 1 - Amazwi Yakwe Leza 2013

¹ Yaa, amazwi yakwe Amosi, wenga uwamuli yakacema aku Tekoa. Leza wamupile icilolwa ca vintu ivyacitikile aina Izlaeli umu manda yakwe Uziya, umwene waku Yuda, nga nu mu manda yakwe Yeleboamu, umwana wakwe Yeoasyi, umwene waku Izlaeli, lino kwasile imyaka iili kuti icilundumusi ciyeko.

² Amosi wavwanzile ati, “Yawe akung'anza ku Zioni, amazwi yakwe yakuuvwika ungati ukupangalansya umu Yelusalemu. Uli mulandu uno amanyika yakwe yakacema yatiyuma, na kansonsi ka mwamba wa Kalimeli kakuuma.”

Uvunuko wakwe Leza pa anisi yakwe Izlaeli

³ Yawe wavwanga wati, “Antu aku Damasiko yacili yakutwalilila ukwifya, acino nani ntalata ukuyavunuka. Yene yakazunya antu aku Gileadi ukaka ukaka.

⁴ Acino nemo ndaponyezya umoto pa ng'anda yakwe Hazaeli, nupya umoto uwo uloca amalinga yonsi yakwe Beni Hadadi.

⁵ Indonona impongolo zya misumba yakucingilila umusumba waku Damasiko. Indononela calimwi umwene wensi akateeka uku Cifoloma caku Aveni. Na wensi akulemelela intuwa ya wene uku Beti Edeni. Antu aku Alamu yalasendwa umu uzya ku mpanga yaku Kili.”

Aina Filisti yalavunukwa

⁶ Yawe wavwanga wati, “Pamulandu wakuti aikazi aku Gaza yacili yakutwalilila ukwifya, nemo ntalata ukuyavunuka. Yene yatozile uluko lonsi pyu lwa antu, nu kulusenda yalutwala umu uzya ku mpanga ya Edomu.

⁷ Acino nemo ndaponyezya umoto pa viumba vya musumba wa Gaza, nga nao uloca amalinga yakweo.

⁸ Ndalovya umwene wino akateeka umusumba wa Asyidodi, kumwi na wiyo alemile intuwa ya wene waku Asyikeloni. Indasyunola umusumba wa Ekiloni ni kasa lyane mpo, na ina Filisti yonsi asyala ndayakomola kumwi.” Avino Yawe Simwandalali wavwanga.

Aina Tuli yalavunukwa

⁹ Yawe wavwanga wati, “Pamulandu wakuti aikazi aku Tuli yacili yakutwalilila ukwifya, nemo ntalata ukuyavunuka. Yene yatozile uluko lonsi pyu lwa antu asyalapo, nu kulusenda yalutwala umu uzya ku Edomu, ukwaula kusunga icipangano ca wina cici.

¹⁰ Acino nemo ndayaponyezya umoto pa viumba vyao ivyazinguluka Tuli, nga umoto uo uloca amalinga yakweo.”

Aina Edomu yalavunukwa

¹¹ Yawe wavwanga wati, “Pamulandu wakuti aikazi aku Edomu yacili yakutwalilila ukwifya, nemo ntalata ukuyavunuka. Yene yazinginye akazi kao ala yalemile amalupanga, ukwaula kuyakwatila uluse, pasi pano yali nu ukali ni cipyu ivitangazusiwa.

¹² Acino nemo ndaponyezya umoto mu musumba wa Temani, nga umoto uo uloca amalinga ya musumba wa Bozila.”

Aina Amoni yalavunukwa

¹³ Yawe wavwanga wati, “Pamulandu wakuti aikazi aku Amoni yacili yakutwalilila ukwifya, nemo ntalata ukuyavunuka. Yene apakulondesya ukulundulula yanande yao, yatumbulanga anaci aku Gileadi yano yanyomelile.

¹⁴ Acino nemo ndaponyezya umoto mu musumba waku Laba, nga umoto uo uloca amalinga yakweo, lino antu yakupunda pa wanda wa ulwi, nu kulwisyanya kulakanzuka wa cipunga.

¹⁵ Umwene wao wene alasendwa umu uzya, aliwe kumwi ni vilolo vyakwe kwene.”