Aina Levi 9 - Amazwi Yakwe Leza 2013

Aaloni wapeela impolelwa

¹ Pacisila ca manda cinimbali ya lutambi lwa kuteeka yasimapepo pa vilimba, Mose aama Aaloni na ana yakwe aonsi, nga ni ntunguluzi zya ina Izlaeli.

² Alino anena Aaloni ati, “Tola kacipambasi ka wila wako uwa kwelela amaifyo nga na suuku uwa wila wako wakoca, vyonsi viye vyaula ulema. Upeele uwila kuli Yawe. Kacipambasi kaye uwila wa kwelela amaifyo, alino suuku aye uwila wakoca.

³ Lyene unene aina Izlaeli uti, ‘Tolini sawe kuti mupeele uwila wa kwelela amaifyo. Nupya mutole umwana wa ng'ombe nu mwana wa mfwele, yoili yao yaye a mwaka onga nupya aula ulema, kuti yaye amawila yakoca.

⁴ Nupya mutole masaye na suuku kuti viye uwila wa utandano, wakuti mupeele pa manso yakwe Yawe pamwi nu wila wa cakulya, utikinkanye na mafuta. Pamulandu wakuti ilelo Yawe amaloleka kunomuli.’ ”

⁵ Antu iyaleta pa mulyango wi Taalu lya Ukongano, vintu vyonsi vino Mose wapeezile ilamulo, nga ni iuvi lyonsi likongana ku kupepa Yawe.

⁶ Mose avwanga ati, “Yawe watapeela ilamulo kunomuli kuti mucite vikwene, pakuti mulole uluswepo luyengese lwakuyapo kwakwe Yawe.”

⁷ Lyene Mose anena Aaloni ati, “Yanga pipi na kavuwa, upeele uwila wa kwelela amaifyo nu wila wakoca, pakuti ucite ulutambi lwa kufuta amaifyo yako na maifyo ya ina Izlaeli. Upeele uwila wa lutambi lwa kufuta amaifyo yao, wakwe vino Yawe wapeezile ilamulo.”

⁸ Acino Aaloni aya pipi na kavuwa, alino afyula ka cipambasi kano kali uwila wa kwelela amaifyo yakwe.

⁹ Ana yakwe yatoola uwazi yamupeela. Lyene Aaloni atimpika munwe wakwe mu wazi uwo, alino apaka pa mpembe zya kavuwa. Uwazi uze wasyala aitila mwisika ya kavuwa kako kwene.

¹⁰ Lyene amafuta, imfyo ni ciputulwa cisuma ca kwitima, vya wila wa kwelela amaifyo, avyocela pa kavuwa, wakwe vino Yawe wapeezile ilamulo kuli Mose.

¹¹ Lelo inyama yonsi nu mukwela aya avyocela kunzi ya nsakwe.

¹² Lyene afyula inyama ya wila wakoca. Ana yakwe yatoola uwazi yamupeela, alino ausansa kuzinguluka kavuwa.

¹³ Yamupeela vimpilinsya vya wila wakoca, conga conga, kwikako nu mutwe. Vyonsi avyoca pa kavuwa.

¹⁴ Lyene afula vyamunda ni myendo nga avyoca pa kavuwa, pamwi nu wila wakoca.

¹⁵ Pacisila cakwe vii Aaloni apeela amawila yano antu yalesile. Atola imbuzi ya wila wa kwelela amaifyo ya antu, aifyula, alino apeela wakwe vino wacisile pa mpolelwa ya kupapatila kwa kufumya maifyo yakwe.

¹⁶ Nupya aleta inyama ya wila wakoca, aipeela kulingana ni lamulo.

¹⁷ Nupya kwene aleta uwila wa usu, atapula ikufi lyonga, alino aoca pa kavuwa. (Cii, cali kulundapo pa vya wila wakoca uwa cila wanda.)

¹⁸ Alino afyula masaye na suuku kuti apeelele antu amawila autandano. Pacisila cakwe vii, ana yakwe Aaloni yatoola uwazi yamupeela, alino aitila uwazi uwo kuzinguluka kavuwa.

¹⁹ Lelo viputulwa vya mafuta vyakwe masaye, musinda unone wakwe suuku, amafuta andatila vyamunda, ni mfyo zyoili kumwi na mafuta, nga ni ciputulwa cisuma ca kwitima kumwi na mafuta,

²⁰ vii vyonsi iyavika papela ya nganga zya nyama zizyo. Alino Aaloni avyoca pa kavuwa.

²¹ Lyene aswelula inganga ni myendo ya kwilunji yoili wa wila wakuswelula pa manso yakwe Yawe, wakwe vino Mose wapeezile ilamulo.

²² Lino Aaloni wamala ukupeela amawila yonsi akwelela amaifyo, na akoca, na mawila autandano, akatusya makasa yakwe pa antu ayapolelela, alino aika pa kavuwa.

²³ Mose na Aaloni yingila mwi Taalu lya Ukongano. Lino yafuma yapolelela antu. Alino uluswepo luyengese lwakuyapo kwakwe Yawe luloleka ku antu onsi.

²⁴ Mukupumikizya Yawe atuma umoto iwoca uwila wakoca ni viputulwa vya mafuta vino vyali pa kavuwa. Lino antu yalola cii, iyapunda pamwi yonsi, nga yafukama pansi yafupime.