Aina Levi 8 - Amazwi Yakwe Leza 2013

Aaloni na ana yakwe yapaatulwa ukuya yasimapepo

¹ Yawe anena Mose ati,

² “Toola Aaloni na ana yakwe. Utoole ni vyakuzwala vyausimapepo, amafuta akusolwela, na cipambasi uwa wila wa kwelela amaifyo, na yasuuku yaili, ni cimponda ca mukate usi na citutumusi.

³ Lyene ukonganike iuvi lyonsi pa mulyango wi Taalu lya Ukongano.”

⁴ Mose acita wakwe vino Yawe wamupeezile ilamulo. Caleka iuvi lyonsi likongana pa mulyango wi Taalu lya Ukongano.

⁵ Lyene Mose anena iuvi lyonsi ati, “Vino nasya ncite avino Yawe watapeela ilamulo kuti vicitike.”

⁶ Lyene Mose aleka kuti Aaloni na ana yakwe iize nkolelo nga nu kufulala.

⁷ Lyene azwika Aaloni ilaya nu kumunyepela musipi mu musana. Alino amuzwika ni cakuzwala ca efodi, nga amunyepela nu musipi upikule mu musana.

⁸ Lyene amuzwika cakuzwala ca pacisao, alino mu cakuzwala cico aikamo vintu vikaamwa Ulimu na Tumimu.

⁹ Lyene amuzwika tulibani ku mutwe. Aika impalata yakwe zaabu ku nkolelo yakwe tulibani, cimanyililo camuzilo wakwe vino Yawe wapeezile ilamulo kuli Mose.

¹⁰ Lyene Mose atoola amafuta akusolwela, apaka Itaalu lya Ukongano pamwi ni viombelo vyonsi vino vyali mwenemo, alino avipaatula.

¹¹ Alino atoola amafuta yamwi asansa maila cinimbali pa kavuwa na pa viombelo vyonsi vyakako. Asansa na pali muyeza uwakufulalila pamwi ni citende cakwe, kuti avipaatwile kuli Yawe.

¹² Mafuta yamwi akusolwela aitila pa mutwe wakwe Aloni, amupaka nu kumulenga kuti aye mupaatulwe.

¹³ Lyene Mose aleka kuti ana yakwe iize nkolelo. Alino ayazwika amakoti nu kuyanyepela misipi mu misana nga ayazwika ni cisote ca ucindami wakwe vino Yawe wapeezile ilamulo kunoli.

¹⁴ Lyene Mose aleta cipambasi uwa wila wa kwelela amaifyo. Alino Aaloni na ana yakwe yika makasa yao pa mutwe wakwe cipambasi wiyo.

¹⁵ Lyene Mose akoma cipambasi, atoola uwazi umwi nu munwe wakwe, alino apaka pa mpembe zya kavuwa, kukazingulusya, nga akaswefya. Nupya aitila uwazi uze mwisika ya kavuwa, alino akapaatula. Mu nzila ii akacitila ulutambi lwa kufuta amaifyo.

¹⁶ Lyene Mose atoola amafuta yonsi ukufuma ku vyamunda, aputula ni ciputulwa cisuma ca kwitima pamwi na mafuta. Atola imfyo zyoili pamwi na mafuta kwene. Alino avyocela pa kavuwa.

¹⁷ Mose atoola viputulwa vyakwe cipambasi ivyasyala, mukwela, minyefu ni vya munda vyonsi. Alino aya avyocela kunzi ya nsakwe, wakwe vino Yawe wamupeezile ilamulo.

¹⁸ Lyene Mose aleta suuku wa wila wakoca. Alino Aaloni na ana yakwe yika makasa yao pa mutwe wakwe suuku wiyo.

¹⁹ Lyene Mose akoma suuku, nga atoola uwazi akanyila kavuwa kukazingulusya.

²⁰ Mose aputola suuku wilya mu vimpilinsya vimpilinsya,

²¹ nga atoola amanzi afula vyamunda ni myendo yonsi ya mfwele nga aoca vyonsi pa kavuwa wa wila wakoca, uwa mununko usuma ukazanzya Yawe. Ukwene uli wila wakocela Yawe, wakwe vino Yawe wapeezile ilamulo kuli Mose.

²² Lyene Mose aleta suuku wakwe ciili uwa kucita ulutambi lwa kupaka yasimapepo amafuta nu kuyapaatula. Alino Aaloni na ana yakwe yika makasa yao pa mutwe wakwe suuku.

²³ Mose afyula suuku, nga atoola uwazi apaka pa nsongo yi kutwi lyakwe Aloni, lya kwikasa lilunji. Nupya apaka na pa cala ca kwikasa lilunji, nga na pa cikando cikulu ca kwikasa lilunji.

²⁴ Pacisila cakwe vii, aleta ana yakwe Aaloni nkolelo, alino ayapaka uwazi umwi pa nsongo ya matwi yao akwi lunji, na pa vyala vyao vyaku makasa akwi lunji. Nga nu ku vikando vyao vikulu vyaku makulu akwi lunji. Lyene Mose akanyila uwazi kuzingulusya kavuwa.

²⁵ Atoola amafuta, musinda unone, amafuta andatila vyamunda, ciputulwa cisuma ca kwitima kumwi na mafuta kwene, imfyo zyoili kumwi na mafuta, nga nu mwendo wa kwilunji.

²⁶ Ukufuma mu cimponda ca mukate usi na citutumusi, uwapaatulwa kuli Yawe, Mose atoola umukate onga usi na citutumusi, umukate onga utikinkanye na mafuta, nu mukate upapatale onga. Vyonsi vii aviika papela pa ciputulwa ca mafuta na pa mwendo wa kwilunji.

²⁷ Apela ivyakulya vyonsi vii mu makasa yakwe Aaloni na ana yakwe nga nayo yaviswelwile pa manso yakwe Yawe wa wila wakuswelula.

²⁸ Lyene Mose atoola ivyakulya ukufuma kunoyali, alino avyoca pa kavuwa pamwi na mawila yakoca, kuti viye amawila pa lutambi lwa kuteeka yasimapepo pa vilimba. Mawila yaa, amununko usuma yakazanzya Yawe. Ukwene uli wila wakocela Yawe.

²⁹ Lyene Mose atoola inganga, nga aiswelula pa manso yakwe Yawe wa wila wakuswelula. Iyo kwene cili ciputulwa cakwe Mose, cakwe suuku wa pa lutambi lwa kuteeka yasimapepo pa vilimba. Mose acita vintu vyonsi wakwe vino Yawe wapeezile ilamulo.

³⁰ Lyene Mose atoola amafuta yamwi akusolwela nu wazi umwi uwali pa kavuwa, alino asansa pali Aaloni na ana yakwe, nga na pa vyakuzwala vyao. Mu nzila kwene ii ayapaatwila kuli Yawe pamwi ni vyakuzwala vyao.

³¹ Lyene Mose anena Aaloni pamwi na ana yakwe aonsi ati, “Senda inyama pa mulyango wi Taalu lya Ukongano. Weleke nu kuilila papa kwene, pamwi nu mukate uno uli mu cimponda ca vyamawila yapa lutambi lwa kuteeka yasimapepo pa vilimba wakwe vino Yawe wapeezile ilamulo.

³² Inyama iyasyala pamwi nu mukate kwene, vyonsi muvyoce.

³³ Mutakezye ukufumila panzi yi Taalu lya Ukongano pa manda cinimbali, mpaka amanda ya lutambi lwa kuteeka yasimapepo pa vilimba yakasile, pamulandu wakuti ulutambi luu, ulwa manda cinimbali.

³⁴ Yawe watupeezile ilamulo kuti tucite vino twatitucita kunoli ndakai, pakuti luye ulutambi lwa kufuta amaifyo inu.

³⁵ Mulinzile mwaikala pa mulyango wi Taalu lya Ukongano, musanya nu usiku, amanda cinimbali ala mukuomba kulingana na vino Yawe wamupeela ilamulo. Ndi mutakucita vii, mulafwa. Lii, lili lamulo lino Yawe wapeela kunondi.”

³⁶ Caleka Aaloni na ana yakwe aonsi iyacita vintu vyonsi vino Yawe wapeezile ilamulo kupitila muli Mose.