Aina Levi 7 - Amazwi Yakwe Leza 2013

Mawila ya cizumila mulandu

¹ Yaa, ali malamulo ya wila wa cizumila mulandu, nupya yene amuzilo cuze.

² Pa cifulo cino yakafyulilapo inyama ya wila wakoca, ali pano yafyulila ni nyama ya wila wa cuzumila mulandu, alino yasansa uwazi wakweyo kuzingulusya kavuwa.

³ Lyene simapepo alinzile apeele amafuta yonsi yakweyo, musinda unone na mafuta andatila vyamunda.

⁴ Nupya yafumye imfyo zyoili kumwi na mafuta kwene. Yafumye ciputulwa cisuma ca kwitima kumwi na mafuta.

⁵ Simapepo aoce vyonsi vivyo pa kavuwa wa mawila akocela Yawe. Ukwene uli wila wa cizumila mulandu.

⁶ Monsi wensi uwamu ng'anda yakwe simapepo angalyako. Aliile uwila uwo pa Ncende Yamuzilo. Uwo kwene uli wila wamuzilo cuze.

⁷ Isunde lili limwi kwene likumile uwila wa kwelela amaifyo nu wila wa cizumila mulandu. Amawila yoili yaa akwe simapepo wino akacita ulutambi lwa kufuta amaifyo.

⁸ Lyene simapepo wino akupeela uwila wakoca uwa muntu ali wensi, atoole mukwela wa nyama ya wila uwo wakoca kuti uye uwakwakwe.

⁹ Lyene ca wila icili consi ca cakulya icapangwa mu citofu nanti vyonsi vino yakasalula muli pani nanti pa cikombole, vyonsi vivyo viye vyakwe simapepo wino akutumikila pali vivyo.

¹⁰ Nga uwila wa cakulya uli onsi usi welekwe, cisi cimwi ungaya utikinkanye na mafuta nanti usi utikinkanye, wene uwa ana yakwe Aloni. Ana yao yalinzile yankane vilingane.

Mawila ya utandano

¹¹ Yaa, ali malamulo ya wila wa utandano uno ukapelwa kuli Yawe.

¹² Muntu ndi wapeela uwila uu kuti uye uwila wakutaizya kuli Yawe, apeelele inyama yakoca impolelwa pamwi nu mukate utikame usi na citutumusi, uno uwapangilwa nu usu utikinkanye na mafuta, nanti umukate wa mpanda upapatale usi na citutumusi nupya upake amafuta ya miolivi, nanti yakeke yano yapangwa nu usu utonyoleke, utikinkanye na mafuta.

¹³ Ukungilizya pa wila wa utandano, alete umukate utikame umuli citutumusi.

¹⁴ Lyene atoole ciputulwa conga pa musango uli onsi wa mukate acipeele ciye uwila kuli Yawe. Ciputulwa kwene cico, cili ciputulwa cakwe simapepo wino amasansa uwazi uwa wila wa utandano.

¹⁵ Inyama ya wila wa utandano yakutaizya yalinzile yailye pa wanda kwene uno yapeela uwila. Yatasyako nanti kamwi kufika ku katondo ka wanda uwalondelela.

¹⁶ Lelo ndu muntu waleta uwila pa kufikilizya umulapo, nanti uwila wakuitemelwa, lyene yatangalya inyama iyo yonsi pa wanda uno yapeelwa. Lelo yangalya iyasyala pa wanda uno walondelela.

¹⁷ Lelo inyama iyasyala kufika na pa wanda uwalenga yatatu ilinzile kocewa.

¹⁸ Muntu ndi walya inyama ya mpolelwa yacuvwano pa wanda uwalenga yatatu, impolelwa iyo itangapokelelwa kuli Leza. Lelo impolelwa iyo ili nu kuya iyasilesile, iyaula muzano. Ili nu kuya impolelwa ikowele. Lyene umuntu wino walya impolelwa pa wanda uwalenga yatatu wene ali nu mulandu nupya alavunukwa.

¹⁹ Pa nyama zya mpolelwa zizyo ndi imwi yakumya ku cintu cikowele, inyama iyo italinzile kuliwa, lelo ilinzile ukocewa. Muntu wensi musanguluke angalya inyama ya mpolelwa.

²⁰ Lelo umuntu wino wakowela ndi walya inyama ya wila wa utandano iyapeelwa kuli Yawe, umuntu wiyo alinzile kusukulwa mu ina Izlaeli.

²¹ Nupya umuntu ali wensi ndi walya inyama ya wila uu, pacisila ca kukumya ku cintu icili consi cikowele, cingaya cafuma ku muntu nanti ku nyama, umuntu wiyo alinzile kusukulwa mu antu yakwe.

²² Yawe anena Mose ati,

²³ “Nena aina Izlaeli ukuti kusi wakulya amafuta ya ng'ombe nanti a mfwele nanti a mbuzi.

²⁴ Mafuta a nyama ino yaifwila na a nyama ino yakomwa ku cilyanyi ca mpanga, yene mungayaomvya ku milimo yuze iili yonsi, lelo mutalinzile ukuyalya.

²⁵ Muntu wensi wino walya inyama ya mpolelwa ya mawila kuli Yawe, umuntu wiyo alinzile kusukulwa mu antu yakwe.

²⁶ Nupya konsi kuno yalikala, kusi kulya uwazi uli onsi, wa vyunyi nanti wa nyama.

²⁷ Muntu ali wensi asiyela isunde kwene lii, umuntu wiyo alinzile kusukulwa mu ina Izlaeli.”

²⁸ Yawe anena Mose ati,

²⁹ “Nena aina Izlaeli uti, ‘Muntu wensi wino wapeela impolelwa yautandano kuli Yawe alinzile ukuleta ciputulwa ca mpolelwa iyo kunoli.

³⁰ Lyene alete umwisikulu na makasa yakwe amawila akocela Yawe. Alete amafuta ya nyama kumwi ni nganga kwene. Lyene inganga iyo aiswelwile pa manso yakwe Yawe wa wila wakuswelula.

³¹ Lyene simapepo aoce amafuta pa kavuwa, lelo inganga yene ipelwe kuli Aaloni na ana yakwe.

³² Nupya simapepo mumupeele mwendo wa kwikasa lilunji, kuti uye uwila winu uiyele uwamusangulo.

³³ Ana yakwe Aaloni na simapepo wino wapeela uwazi na mafuta ya wila wa utandano aliyo yalapokelela mwendo wa kwikasa lilunji wa ciputulwa cao.

³⁴ Pa mawila yacuvwano ya ina Izlaeli, inganga yapa mawila yapaatulwa pamwi nu mwendo wa kwikasa lilunji, ivya mawila apaatulwa vino Yawe watafumya ku ina Izlaeli nu kupeela kuli yasimapepo. Vii avino aina Izlaeli yalinzile ukupeela kuli yasimapepo ku nkulo zyonsi.’”

³⁵ Cico kwene cili ciputulwa ca mawila akocela Yawe cino capezilwe kuli Aaloni na ana yakwe pa wanda uno yapasilwe amafuta nu kuyapaatula ukuya yasimapepo.

³⁶ Pa wanda ulya Yawe wapeezile ilamulo ku ina Izlaeli kuti yayapeele ciputulwa cii ca mawila. Vivyo kwene vili viputulwa vyao insita zyonsi ku nkulo zinu zyonsi.

³⁷ Yakwene yaa, ali malamulo ya wila wakoca, uwila wa cakulya, uwila wa kwelela amaifyo, uwila wa cizumila mulandu, uwila wa kuteeka yasimapepo pa vilimba, alino nu wila wa utandano.

³⁸ Malamulo kwene yaa, ali yano Yawe wapeezile kuli Mose pa Mwamba wa Sinai, pa wanda uno wapeezile ilamulo ku ina Izlaeli kuti yalete impolelwa zyao kuli Yawe mu Lwanga lwa Sinai.