Aina Levi 6 - Amazwi Yakwe Leza 2013

¹ Yawe apeela Mose malamulo yaa, ati,

² “Mpolelwa ili nu kupelwa ndi cakuti umuntu wifya kuli Yawe, pakukana wezezya umwina Izlaeli muze icintu cino wamusilile kuti aasunga, nanti pa kumwiila cimwi, nanti pa kumusomba,

³ nanti pa kumutumpoka ati caponga, alapa ukuti ataciweni.

⁴ Avino umuntu ndi wifya mu musango umwi ndi uu, alinzile kuwezezya umuze consi cino watola mu ucenjezi.

⁵ Pa wanda uno akupeela uwila wa cizumila mulandu alinzile awezezye umweneco vintu vyonsi vino watozile. Lyene aungilizyepo icintu conga pali cila visano.

⁶ Alino alete uwila wa cizumila mulandu kuli simapepo, uye uwila kuli Yawe. Wene ulinzile uye suuku uwaula ulema, nga wewe kwene ulinzile kwika umutengo wakwe kulingana nu mutengo wa wila wa cizumila mulandu.

⁷ Lyene simapepo acite ulutambi lwa kufuta iifyo lino umuntu wiyo wacita.”

Mpolelwa zyakoca zipuma

⁸ Yawe apeela Mose malamulo yaa kuti

⁹ anene Aaloni na ana yakwe, ati, “Lii, lili lamulo lya wila wakoca. Uwila wakoca onsi ulinzile kusyala pa moto pa kavuwa usiku onsi, mpaka kufika na katondo, nga nu moto utwalilile kwaka.

¹⁰ Lyene simapepo azwale mwingila wakwe bafuta, alino na kaputula wakwe bafuta. Alino atoole itwi lya nyama ya wila wakoca, aitile mu mbali ya kavuwa kako kwene.

¹¹ Lyene azule vyakuzwala vyakwe vivi, azwale vyuze, alino azyole itwi nga alisende kunzi ya nsakwe, pa cifulo cino citakoweziwa.

¹² Umoto pa kavuwa ulinzile kutwalilila ukwaka, kwaula kuzimiwa. Simapepo alinzile kusonsela nu kwikapo inkwi cila katondo, ateyanye nu wila wakoca penepo, nu koca amafuta ya wila wa utandano.

¹³ Umoto ulinzile kutwalilila kwaka pa kavuwa, kusi kuzima foo.”

Mawila ya cakulya

¹⁴ Ilamulo lya wila wa cakulya aili. Ana yakwe Aaloni yalinzile yatwala uwila uwo pa manso yakwe Yawe ku nkolelo ya kavuwa.

¹⁵ Lyene simapepo atapulepo ikufi lyonga lya usu utonyoleke wa mawila yayo pamwi na mafuta nu ubani mwenemo, vino vili pa wila wa cakulya. Avyoce pa kavuwa pakulanga ukuti iciputulwa capeelwa kuli Yawe nupya viye uwila uwa mununko usuma ukazanzya Yawe.

¹⁶ Lyene Aaloni na ana yakwe yalye vino vyasyalapo. Viye vyaulamo icitutumusi, nupya yaviliile pa Ncende Yamuzilo, kuli kuti pa musolo wi Taalu lya Ukongano.

¹⁷ Pa kupanga umukate yatatikinkanyamo icitutumusi. Nayapeela ivyasyala kuti viye ciputulwa cao ca mawila yane akoca. Amawila yonsi yayo amuzilo cuze, wa mawila ya kwelela amaifyo nu wila wa cizumila mulandu.

¹⁸ Amu mupanda wakwe Aaloni aonsi yangalya ivya mawila akocela Yawe, wakwe vino calembwa ukuti cili nu kuya vivyo kwene amanda pe mu nkulo zinu zyonsi. Lelo wino wensi asi simapepo aalakumya kavuwa kako alailetela isyamo pamulandu wa maka yakako amuzilo.

¹⁹ Yawe anena Mose ati,

²⁰ “Uu uli wila uno Aaloni na ana yakwe yalinzile ukupeela kuli Yawe pa wanda uno akupaatulwa. Yalinzile ukupeela usu utonyoleke, wakulingana kilogalamu wenga, ciye ngati uwila wa usu uwa nsita zyonsi. Apeele citika wenga katondo, lyene citika muze apeele manguzi.

²¹ Usu uwo utikinkanyiziwe na mafuta pa cikombole. Alete utikinkanye ningo ningo, uweleke ningo, nupya umokolwe tuvungwa tuvungwa, wakwe vino yakacita ni ca wila wa cakulya. Lyene aupeele wa wila uwa mununko usuma ukazanzya Yawe.

²² Ku nsita yonsi yaku nkolelo uwila uu ulinzile kupelwa na wensi uwamu mupanda wakwe Aloni, wino akutumikila nga Simapepo Mukulu. Alinzile aoce onsi pyu.

²³ Cawila wa cakulya icili consi cakwe simapepo ciye cakoca consi, yatacilya foo.”

Mawila ya kwelela amaifyo

²⁴ Yawe anena Mose ati,

²⁵ “Nena Aaloni na ana yakwe uti, ‘Malamulo ya wila wa kwelela amaifyo aeya. Pa cifulo cino yakafyulila uwila wakoca, apano yafyulila pa manso yakwe Yawe uwila wa kwelela amaifyo. Uwo kwene uli wila wamuzilo cuze.’ ”

²⁶ Simapepo wino wapeela uwila wa nyama, alye inyama iyo. Ailile mu Ncende Yamuzilo, pa musolo wi Taalu lya Ukongano.

²⁷ Wino wensi alakumya ku wila uwo alailetelela isyamo pamulandu wa maka yakweo amuzilo. Lyene uwazi ndi watonela pa cakuzwala, mufulile cakuzwala cico pa Ncende Yamuzilo.

²⁸ Intendo yonsi ino yelekilemo inyama iyo, ilinzile kutamolwa, lelo ndi yelekile mu mupika, ulinzile kufulwa sile nu kuusulula na manzi.

²⁹ Monsi wensi uwamu ng'anda yakwe simapepo angalya impolelwa ii, pamulandu wakuti iyamuzilo cuze.

³⁰ Lelo ndi yaleta uwazi uwa wila uwo uwa kwelela amaifyo mwi Taalu lya Ukongano nu kuuomvya mu lutambi lwa kufuta amaifyo, inyama iyo italinzile ukuliwa. Ilinzile ukoca yonsi pyu.