Aina Levi 5 - Amazwi Yakwe Leza 2013

Amawila akwelela amaifyo

¹ Amawila akwelela amaifyo yakalondwa pamilandu ii. Ndu muntu yamwama kwi tengo kuti apeele umboni mwi tengo, lelo wakana kulanda vino waweni nanti vino uvwile, umuntu wiyo alinzile kuvunukwa.

² Muntu umwi ndi mukuntamanya walema icintu cimwi cikowele, wa nyama yaifwila, nawe kwene ala wakowela. Nupya waya nu mulandu lino wamanya cino wacita.

³ Muntu umwi mukuntamanya ndi walema icintu cimwi cafuma ku mwili wa muntu, icamifitalila, camusango uli onsi, wene ali nu mulandu lilyo kwene lino wamanya cino watacita.

⁴ Muntu umwi mukuitazyela ndi walapa, usi mulandu pa cintu icili consi, wene ali nu mulandu lino wamanya cino watacita.

⁵ Lino muntu ali nu mulandu, wene alinzile kuilongwela iifyo lyakwe.

⁶ Na pa uvunuko wi ifyo lyakwe, wene alinzile ukuleta kuli Yawe uwila wa kwelela amaifyo, imfwele nanti imbuzi yakaci. Alino simapepo acite ulutambi lwa kufuta amaifyo ya muntu wiyo wataifya.

⁷ Lelo ndi cakuti umuntu atakweti umwana wa mfwele nanti wa mbuzi, lyene atoole ivipeele viili nanti utwana twa nkunda twili kuti viye ivyakupeela kuli Yawe, alipile pa maifyo yakwe. Conga ciye uwila wa kwelela amaifyo ni cuze ciye uwila wakoca.

⁸ Alete vyunyi vivyo kuli simapepo, alino simapepo atandikilepo ukupeela ica wila wa kwelela amaifyo yayo. Acinyonge insingo, ataciputula umutwe.

⁹ Lyene atoole uwazi umwi uwa cunyi cico ca wila wa kwelela amaifyo nga asanse mumbali zyonsi zya kavuwa. Lelo uwazi uze wasyala awitile pansi mwisika ya kavuwa kako. Ukwene uli wila wa kwelela amaifyo.

¹⁰ Lyene apeele icunyi cuze cakwe ciili kuti ciye uwila wakoca kulingana nu lutambi lwa kufuta amaifyo ya antu, nga lyene umuntu wiyo alelelwa.

¹¹ “Muntu ndi atakweti ivipeele viili nanti utwana twa nkunda twili, alete usu utonyoleke kulingana ni cipimo cakwe kilogalamu wenga. Usu uwo uye uwila wakwelela iifyo lino watacita. Atalinzile kuutikinkanya na mafuta nanti nu ubani, pamulandu wakuti uu uli wila wa kwelela amaifyo.

¹² Lyene alete usu kuli simapepo, alino simapepo wiyo atapule ikufi lyonga pakulanga ukuti iciputulwa capeelwa kuli Yawe. Alino aocele usu uwo pa kavuwa pamwi na mawila akocela Yawe. Ukwene uli wila wa kwelela amaifyo.

¹³ Mu musango kwene uu, muli muno yasimapepo yacitila ulutambi lwa kufuta amaifyo ya antu. Lyene umuntu wiyo alelelwa. Lelo uwila uwasyala wene uwakwe simapepo, ndi vino cikaya ku wila wa cakulya.”

Mawila ya cizumila mulandu

¹⁴ Yawe apeela Mose malamulo yaa, ati,

¹⁵ Muntu umwi ndi watala mulandu mu kuntamanya, pa kuposiwa ukulipa ivyamuzilo kuli Yawe, wene alinzile ukuleta impolelwa kuli Yawe, suuku nanti sawe uwaula ulema, iye uwila wa cizumila mulandu. Umutengo wakweyo ulinzile kupimwa kulingana ni cipimo ca ku Ng'anda ikulu yakwe Leza. Ukwene uli wila wa cizumila mulandu.

¹⁶ Muntu wiyo alinzile ukulipa kuti aswilizye pa vintu vivi vino waposiwe ukulipa. Lyene aungilizyepo icintu conga pali cila visano. Alino avitwale kuli simapepo, nga simapepo wiyo acite ulutambi lwa kufuta amaifyo ya antu, lyene umuntu wiyo alelelwa.

¹⁷ Muntu umwi ndi wifya ukwaula kumanya, pakuntayela consi camu malamulo yakwe Yawe, wene ali nu mulandu nupya alinzile ukulipa.

¹⁸ Wene alinzile ukuleta kuli simapepo, suuku nanti sawe uwaula ulema, nga wewe kwene ulinzile kwika umutengo wakwe kulingana nu mutengo uwa uwila wa cizumila mulandu. Simapepo wiyo alinzile ukucita ulutambi lwa kufuta amaifyo api ifyo lino umuntu wiyo wacita, lyene umuntu wiyo alelelwa.

¹⁹ Yene, iili wila wa cizumila mulandu pi ifyo lino wacita pa manso yakwe Yawe.