Aina Levi 4 - Amazwi Yakwe Leza 2013

Uwila wa kwelela amaifyo

¹ Yawe anena Mose ati,

² “Nena aina Izlaeli ukuti pali vyonsi vino Yawe walesya, umuntu ali wensi ndi wifya kwaula kumanya, wacita icintu cimwi icaindwa, alinzile ukucita vii:

³ Muntu wino waifya ndi a Simapepo Mukulu wino wapakwa na mafuta, wene ala waletelela iuvi lyonsi. Lyene alinzile ukupeela kuli Yawe kacipambasi kaula ulema, pamulandu wi ifyo lyakwe. Kako kwene uli wila wa kwelela amaifyo api ifyo lino wacita.

⁴ Simapepo atwale kacipambasi kako pa mulyango wi Taalu lya Ukongano pa manso yakwe Yawe. Lyene aike ikasa lyakwe pa mutwe wakwe kacipambasi kako. Alino akafyulile pa manso yakwe Yawe.

⁵ Lyene Simapepo Mukulu wino wapakwa na mafuta atoole uwazi umwi wakwe kacipambasi kako nu kuya nao kwi Taalu lya Ukongano.

⁶ Alino atimpike umunwe wakwe mu wazi, nga pa manso yakwe Yawe asanse uwazi uwo maila cinimbali ku nkolelo ya nsalu ino yacinga Ncende Yamuzilo.

⁷ Pacisila cakwe vii simapepo apake uwazi umwi pa mpembe zya kavuwa ka mwi Taalu lya Ukongano akakocelapo ubani wa cinunkilo cisuma pa manso yakwe Yawe. Uwazi uze uwasyala wakwe cipambasi wiyo awitile mwisika ya kavuwa ka kupelelapo uwila wakoca kano kali pa mulyango wi Taalu lya Ukongano.

⁸ Lyene afumye amafuta yonsi yakwe cipambasi uwa wila wa kwelela amaifyo pamwi na mafuta andatila ku vyamunda nanti yano yalematila kunovili.

⁹ Nupya aputule imfyo zyoili kumwi na mafuta kwene, lwa mu musana. Alino aputule ciputulwa cisuma ca kwitima kumwi na mafuta, afumye kumwi ni imfyo,

¹⁰ ndi vino yakafumya kuli masaye uwa kupeela uwila wa utandano. Lyene simapepo wiyo aocele vyonsi vivyo pa kavuwa ka kupelelapo uwila wakoca.

¹¹ Lelo mukwela wakwe cipambasi wiyo pamwi ni minyefu, umutwe, myendo, ivyamunda pamwi na mala

¹² avifumizye kunzi ya nsakwe ku citumba kuno yakasumba itwi nga akuno yavyocele pa moto wa nkwi.”

¹³ “Ndi iuvi lyonsi lya ina Izlaeli liifya, nupya yamanya ukuti yatiyavuna isunde limwi mu masunde yakwe Yawe kusi kumufulo,

¹⁴ lyene zuwazuwa lino yamanya cino yatiyifya, iuvi lyonsi lilinzile ukuleta kacipambasi kuli Yawe kuti kaye uwila wa kwelela amaifyo. Yalinzile yakatwale pa mulyango wi Taalu lya Ukongano.

¹⁵ Lyene intunguluzi zi uvi ziike amakasa yakwezyo pa mutwe wakwe kacipambasi kako, pa manso yakwe Yawe. Alino akafyule pa manso yakwe Yawe.

¹⁶ Simapepo Mukulu wino wapakwa na mafuta atoole uwazi wakwe kacipambasi kako nu kumutwala kwi Taalu lya Ukongano.

¹⁷ Papo kwene simapepo wiyo atimpike umunwe wakwe mu wazi, alino pa manso yakwe Yawe, asanse uwazi uwo maila cinimbali ku nsalu ino yacinga Ncende Yamuzilo.

¹⁸ Pacisila cakwe vii, apake uwazi umwi pa mpembe zya kavuwa kano kali mwi Taalu lya Ukongano pa manso yakwe Yawe. Uwazi uze wasyala awitile mwisika ya kavuwa ka kupelelapo uwila wakoca, kano kali pa mulyango wi Taalu lya Ukongano.

¹⁹ Lyene simapepo afumye amafuta yonsi nu kuyocela pa kavuwa.

²⁰ Vii avino yacite kuli cipambasi wii. Ndi vino yacisile kuli cipambasi wilya wakupeela wa wila wa kwelela amaifyo, avino yacite na wikwene. Mu musango kwene uu amuno Simapepo ali nu kupeelelamo uwila wa kufuta amaifyo ya antu, insita kwene iyo iuvi lilelelwa.

²¹ Lyene cipambasi wiyo amufumizye kunzi ya nsakwe nu kumoca wakwe vino yacisile cipambasi wakutandika. Wiyo kwene ali wila wa kwelela amaifyo yi uvi.”

²² “Intunguluzi ndi yiifya kwaula kumanya ale yiifya kuli Yawe Leza wakweyo, na pa kucita icintu cino waindwa ala lyaya iifyo.

²³ Lyene antu yauze ndi yainena pamulandu wi ifyo lyaiko lilyo, yene ilinzile ukupeela uwila uu, sawe uwaula ulema.

²⁴ Lyene yene ilinzile ukwika makasa pa mutwe wakwe sawe, imufyulile pa cifulo cino yakafyulilapo uwila wakoca pa manso yakwe Yawe. Uwo kwene uli wila wa kwelela amaifyo.

²⁵ Pacisila cakwe vii, simapepo atimpike umunwe wakwe umu wazi umwi uwa wila wa kwelela amaifyo. Lyene apake uwazi pa mpembe zya kavuwa ka kupelelapo uwila wakoca. Uwazi uwo uno wasyala awitile mwisika ya kavuwa kako kwene.

²⁶ Lyene amafuta yonsi ayocele pa kavuwa, wakwe vino yakacita na mafuta ya wila wa utandano. Mu musango kwene uu amuno Simapepo ali nu kupeelelamo uwila wa kufuta amaifyo ya muntu wiyo, insita kwene iyo umuntu wiyo alelelwa.”

²⁷ Muntu uwasilesile ndi wifya kwaula kumanya, wacita icintu cimwi icili consi cino Yawe wainda, ala lyaya iifyo.

²⁸ Muntu wiyo ndi yamumanyisya iifyo lyakwe lilyo, alinzile ukupeela uwila wakwe uwa mbuzi yakaci, iyaula ulema, pamulandu wi ifyo lyakwe lilyo.

²⁹ Lyene aike ikasa lyakwe pa mutwe wa mbuzi ya wila wa kwelela amaifyo. Alino aifyulile pa cifulo cino yakapelelapo uwila wakoca.

³⁰ Pacisila cakwe vii, simapepo atimpike umunwe wakwe mu wazi umwi uwa wila wakwelela amaifyo. Lyene apake uwazi pa mpembe zya kavuwa ka kupelelapo uwila wakoca. Uwazi uwo uno wasyala awitile mwisika ya kavuwa kako kwene.

³¹ Alino afumye amafuta yonsi ya mbuzi ndi vino yakafumya amafuta ya wila wa utandano. Lyene simapepo ayocele pa kavuwa kako, kuti viye uwila uwa mununko usuma ukazanzya Yawe. Mu musango kwene uu amuno Simapepo ali nu kupeelelamo uwila wa kufuta amaifyo ya muntu uwasilesile, nga insita kwene iyo umuntu alelelwa.

³² Muntu ndi waleta umwana wa mfwele kuti aye uwila wa kwelela amaifyo, imfwele iyo ilinzile ukuya iyakaci, iyaula ulema.

³³ Lyene aike ikasa lyakwe pa mutwe wa mfwele iyo ya wila wa kwelela amaifyo. Alino aifyulile pa cifulo cino yakafyulilapo uwila wakoca.

³⁴ Pacisila cakwe vii, simapepo atimpike umunwe wakwe mu wazi umwi uwa wila wa kwelela amaifyo. Lyene apake pa mpembe zya kavuwa ka kupelelapo uwila wakoca. Uwazi wasyala aitile mwisika ya kavuwa kako kwene.

³⁵ Lyene afumye amafuta ya mfwele yonsi, ndi vino yakafumya amafuta ya wila wa utandano. Lyene simapepo ayocele pa kavuwa pamwi na mawila yauze akocela Yawe. Mu musango kwene uu, ndi simapepo wamala ukucita ulutambi lwa kufuta amaifyo ya muntu uwasilesile, umuntu wiyo alelelwa.