Aina Levi 3 - Amazwi Yakwe Leza 2013

Amawila autandano

¹ “‘Muntu ndi akupeela uwila wa utandano kuli Yawe, uwila uwo ndi acipambasi wa ng'ombe nanti indama, ulinzile ukuya uwaula ulema.

² Muntu aikepo ikasa lyakwe pa mutwe wa ng'ombe iyo, alino aifyulile pa mulyango wi Taalu lya Ukongano. Lilyo kwene yasimapepo ana yakwe Aaloni aonsi yatole uwazi yaukanyizye ukuzingulusya kavuwa.

³ Lyene pa wila uwo wa utandano, umuntu wiyo atolepo amafuta yonsi yano yandatila vyamunda nanti yano yalematila kunovili nga apeele uwila wakocela Yawe.

⁴ Apeele ni imfyo zyoili pamwi na mafuta kwene kumwi ni ciputulwa cisuma ci tima, cino alinzile kufumizya kumwi ni imfyo.

⁵ Lyene ana yakwe Aaloni yoce vyonsi vivyo pa kavuwa pamwi nu wila wakoca uno uli pa moto pa kavuwa. Uwila uu uwa mununko usuma ukazanzya Yawe.

⁶ “‘Muntu ndi akupeela uwila wa utandano kuli Yawe, ndi uwila uu a suuku nanti imfwele yakaci, yene ilinzile ukuya iyaula ulema.

⁷ Ndi wapeela imfwele kuti iye impolelwa, lyene ailete pa manso yakwe Yawe.

⁸ Alino aike ikasa lyakwe pa mutwe wa mfwele iyo. Lyene aifyulile pa mulyango wi Taalu lya Ukongano. Pacisila cakwe vii, ana yakwe Aaloni yatole uwazi yakanyile kavuwa kukazingulusya.

⁹ Lyene pa wila wa utandano wene alinzile kupeela uwila wakocela Yawe. Kuli kuti amafuta yakweyo, musinda unone onsi auputwila mwisika pipi nu musana. Nupya atoole amafuta yonsi yano yandatila vyamunda nanti yano yalematila kunovili,

¹⁰ imfyo zyoili kumwi na mafuta kwene. Nupya aputule ciputulwa cisuma ca kwitima kumwi na mafuta, afumye kumwi ni imfyo.

¹¹ Lyene simapepo aoce vyonsi vivyo pa kavuwa viye uwila wa cakulya cakocela Yawe.

¹² “‘Muntu ndi akulonda ukupeela uwila wa mbuzi, ailete pa manso yakwe Yawe.

¹³ Alino aike ikasa lyakwe pa mutwe wa mbuzi iyo. Alino aifyulile pa mulyango wi Taalu lya Ukongano. Pacisila cakwe vii, ana yakwe Aaloni yatole uwazi yakanyile kavuwa kukazingulusya.

¹⁴ Lyene pa wila uwo wene alinzile kupeela kuli Yawe uwila uu wakoca. Alinzile atolepo amafuta andatila vyamunda nanti yano yalematila kunovili.

¹⁵ Nupya apaatule imfyo zyoili kumwi na mafuta kwene lwa mu musana. Aputule ni ciputulwa cisuma ca kwitima kumwi na mafuta, afumye kumwi ni imfyo.

¹⁶ Alino simapepo aoce vyonsi vivyo pa kavuwa, kuti viye uwila wa usu wakoca pa moto, uwa mununko usuma ukazanzya Yawe. Mafuta yonsi akwe Yawe.

¹⁷ Kusi mwina Izlaeli angalya amafuta nanti uwazi. Ilamulo lii lilinzile kusungwa na ina Izlaeli yonsi amanda pe, konsi kuno yalikala.’”