Aina Levi 25 - Amazwi Yakwe Leza 2013

Mwaka wi Sabata

¹ Yawe anena Mose pa Mwamba wa Sinai ati,

² “Unene aina Izlaeli uti, ‘Lino mulingila mu mpanga ino nkupeela kunomuli, impanga kwene iyo ilinzile ukulaaluka cila mwaka uwalenga cinimbali pamulandu wakucindika Yawe.

³ Pa myaka mutanda mukaalima nu kukomela imbezu zinu mu vyalo. Nupya pa myaka mutanda mukaatungwila imiti inu ya matingi nu kuzombola iviseekwa vyakweyo.

⁴ Lelo mu mwaka uwalenga cinimbali impanga iyo ino mukalimamo ilinzile ukupuza. Uu, umwaka uwapaatwilwa kuli Yawe. Mutakezye kulima nanti kukomela imbezu mu vyalo vinu, nanti kutungwila imiti inu ya matingi.

⁵ Mutakezye nanti kuzombola cimbuka wa mbezu zyamu vyalo vinu. Nupya mutakezye kukululamo matingi ukufuma ku miti ya matingi ino mutatungwila. Mwaka uu, uwakupuza kwa mpanga ino mukalimamo.

⁶ Nanti angala vyalo vinu vitalimilwe mu mwaka uwo, vili nu kupeela ivyakulya kunomuli, ku azya inu, ku yaomvi inu, ku inamasi yano yakwikala munomuli,

⁷ ku viteekwa vinu, nga nu ku nyama zya mpanga zino zikaikala mu vyalo vinu. Cili consi icingamela nu kuca mu vyalo vivyo pa nsita iyo cingaliwa.

Umwaka wakwe Cinimbali

⁸ “‘Mwapenda imyaka cinimbali maila cinimbali, pamwi imyaka amakumi yani na fundimbali.

⁹ Lyene pa wanda uwalenga ikumi, uwa mwezi uwalenga cinimbali uwanda wa kwelela amaifyo, mwatuma umuntu kuti alizya intandala mu mpanga yonsi.

¹⁰ Mu musango kwene uu, mwapaatula mwaka uwalenga amakumi yasano nu kuulenga kuti uye mwaka wa untungwa ku antu yonsi yano yakaikala mu mpanga yonsi iyo. Mu nsita ya mwaka kwene uu, cila muntu alinzile awezeziwe icintu cakwe nanti kuciwezezya ku amu mupanda wakwe, nupya umuntu wino yakazizye mu uzya alinzile kuswilila kumwao ku amu ng'anda yakwe.

¹¹ Mu mwaka kwene uu, uwalenga amakumi yasano, kusi kulima nanti kukomela mu vyalo vinu, nanti kuzombola cimbuka wa mbezu zyamu vyalo vinu, nanti kukulula matingi yaku miti yamu vyalo vya matingi ino mutatungwila.

¹² Mwaka onsi uu, uli nu kuya wamuzilo kunomuli. Nupya muli nu kulya sile vilyo vino vilaimelela mu vyalo vino mutalimamo.

¹³ “‘Mu mwaka kwene uu, icuma consi cakaziwe cilinzile ukuswiliziwa ku mwisikulu wino wacikazizye.

¹⁴ Caleka lino ukukazya icalo ku muzo mwina Izlaeli nanti lino ukukala icalo ku muzo, utacita ucenjezi.

¹⁵ Umutengo wa mpanga iyo uli nu kulingana ni mpendwa ya myaka ino uli nu kulima nu kuzombola ivilimwa lino utacili kuti uswilizizye umwisikulu wa mpanga.

¹⁶ Ndi mpendwa ya myaka iyo yakulima iikulu, lyene mutengo wa kukalila impanga iyo ulinzile ukuya ukulu. Lelo ndi mpendwa ya myaka ya kulima impanga iyo inono, mutengo ulinzile ukuya unono pamulandu wakuti ivikukaziwa, ivilimwa ivilafuma mu mpanga iyo.

¹⁷ Mutasombana, lelo mwaoopa Leza winu. Nene indi Yawe Leza winu.

Leza alapeela ivyakulya mu mwaka wa kupuza

¹⁸ “‘Mwayela amasunde na malamulo yonsi yakwe Yawe pakuti mungaikala mutende mu mpanga iyo.

¹⁹ Mpanga iyo ilamupeela ivyakulya vyakweyo, nupya namwe mulakwata ivyakulya vyonsi vino mukalonda, nupya mulikala mutende.

²⁰ “‘Limwi umuntu umwi anguzya ati, “Uzye fwandi antu yalalya cani mu mwaka uwalenga cinimbali, lino kutalaya kulima nanti kukomela imbezu mu vyalo nanti ukuzombola ivilimwa?”

²¹ Yawe alapolelela impanga iyo mu mwaka uwalenga mutanda cakuti ilamupeela ivyakulya ivingi vyakulingana nu kulya pa myaka iili.

²² Lino mulalima nu kukomela imbezu zinu mu vyalo mu mwaka uwalenga cinani, ale mucili mukulya ivyakulya vino mwazombwile mu mwaka uwalenga mutanda. Nupya mulakwata ivyakulya vingi mpaka kufika nalino ivilimwa vino mwakomela mu mwaka wakwe cinani vyazombolwa.

Kuwezya kwa vyuma

²³ “‘Mpanga inu italinzile kukaziwa kwa kuyelelela pe, pano isi impanga inu foo. Yene impanga yakwe Leza. Mwemo muli wa inamasi yano yazumiliziwa kuiomvya sile.

²⁴ “‘Lino mwakazya impanga, insambu zya kukulula impanga iyo ku mwisikulu wa mpanga ino mwakala zilinzile kucindikwa.

²⁵ Mwina Izlaeli ndi waya mupina cakuti camupatikizya ukukazya impanga yakwe, umwina wakwe ali nu kukulula impanga iyo.

²⁶ Ali wensi wino atakweti mwina wakwe uwakukulula impanga ino wakazizye, limwi mukaya amanda angaya mukama akwate ni mpiya zingi zyakukulula impanga yakwe.

²⁷ Pamulandu uwo, umuntu wiyo alinzile ukulipa umuntu wino wakazile impanga yakwe, impendwa ya mpiya kulingana ni myaka ino yasyala kufika lino impanga ilaswiliziwa kunoli.

²⁸ Lelo umuntu wiyo ndi atakweti impiya zingi zya kukulwila impanga yakwe, impanga iyo ili nu kutwalilila ukuya mu makasa ya muntu wino waikazile mpaka ukufika nu mu Mwaka wa Ukuluzi. Mu Mwaka wa Ukuluzi impanga iyo ili nu kuswiliziwa ku mwisikulu wino waikazile.

²⁹ Muntu umwi ndi wakazya ing'anda yakwe ino akaikalamo, ino ili mu musumba uno wazingulukwa ni linga, umuntu wiyo ali ni nsambu ya kukulula ng'anda yakwe mu nsita ya mwaka wakutandika ukufuma pa wanda uno wakazizye ng'anda iyo.

³⁰ Lelo umuntu wiyo ndi atakulwile ing'anda yakwe mu mwaka kwene uwo, ala insambu ya muntu wino wakazizye ing'anda yasila. Lyene ing'anda iyo ala yaya iya muntu wino wakazile pamwi na amu mupanda wakwe amanda pe. Nupya mu Mwaka wa Ukuluzi ng'anda iyo italaswiliziwa ku mwisikulu wino waikazizye.

³¹ Lelo mang'anda amu mizi ino itazingulukwa na malinga yene yacitwe wakwe vino yakacita pa kukala impanga. Mwisikulu wa mang'anda yaa ali ni nsambu ya kukulula mang'anda yakwe. Nupya mang'anda yao yali nu kuswiliziwa mu Mwaka wa Ukuluzi.

³² Lelo mang'anda yano yali mu misumba ya ina Levi, aina Levi yene yakweti nsambu ya kukulula mang'anda yao insita ili yonsi.

³³ Ndi ng'anda imwi yamu misumba ii yakaziwa nu mwina Levi, nomba itakulwilwe, ilinzile kuswiliziwa mu Mwaka wa Ukuluzi, pamulandu wakuti mang'anda ya ina Levi mu misumba yao icuma ca manda pe mu antu aina Izlaeli.

³⁴ Lelo kusi umuntu nanti umwi angakazya impanga iyazinguluka imisumba ya ina Levi, pamulandu wakuti yene icuma ca ina Levi amanda pe.

Kukongwesya apina

³⁵ “‘Ndi umwina Izlaeli muzo, umwinipamba, umonsi nanti umwanaci waya mupina cakuti atange aiteke umwisikulu, ulinzile kuyapeela vyonsi vino yakulonda wakwe vino ungacita ku mwinamasi nanti umuomvi wako wino akalipilwa, pakuti yangatwalilila ukwikala namwe.

³⁶ Utalipilisya mwina Izlaeli muzo pa mpiya zino wamukongwesizye. Lelo waoopa Leza wako nu kuleka aina Izlaeli yauzo yaikala nawe.

³⁷ Utakongwesya auzo impiya pakuti yakungilizye zyuze pa kukuwezezya. Nupya utakazya ivyakulya ku auzo ukuluta pa mutengo uno wakalilepo.

³⁸ Nene indi Yawe Leza winu wino wamufumizye mu mpanga ya Eguputo kuti mpeele impanga ya Kenani kunomuli, kuti iye iyakwinu. Nupya kuti nje Leza winu.

Kusapulwa kwa azya

³⁹ “‘Ndi mwina Izlaeli muzo mwinipamba waya mupina, nga aipatikizya kuti aikazye umwisikulu kunomuli pakuti aye muzya winu, mutalinzile kulenga umuntu wiyo aomba imilimo ya uzya.

⁴⁰ Wene alinzile ukwikala nawe wa muomvi, nupya wakwe vino mungikala nu mulumendo winu. Wene alinzile akutumikila mpaka kufika nu mu Mwaka wa Ukuluzi.

⁴¹ Pa nsita ilya muntu wiyo afume kunomuli pamwi na ana yakwe, aswilile ku amu ng'anda yakwe nu ku cuma ca vikolwe vyakwe.

⁴² Aina Izlaeli yene azya yakwe Yawe uwayafumizye mu mpanga ya Eguputo. Acino yatalinzile kukaziwa mu uzya.

⁴³ Mutayateeka mu kukalala, lelo mwaoopa Leza winu.

⁴⁴ Ndi mukulonda azya aonsi nanti anaci, mungaya mukakale azya yaa ukufuma ku mitundu ino yazinguluka impanga inu.

⁴⁵ Nupya mungakala ana ya inamasi yano yakwikala munomuli. Ana yaa yano yavyalilwa mu mpanga inu yangaya icuma cinu.

⁴⁶ Nupya azya yao mungayasya mu makasa ya ana inu ndi mwafwa, kuti yaye caupyanyi wao amanda pe. Lelo mutalinzile kuteeka mwina Izlaeli muzo mu kukalala.

⁴⁷ “‘Nalimwi twelenganye ukuti mwinamasi wino akwikala namwe waya mukama, lyene mwina Izlaeli muzo waya mupina. Alino mwina Izlaeli waikazya umwisikulu wa muzya ku mwinamasi mukama, nanti ku uwamu ng'anda ya mukama.

⁴⁸ Pa cisila ca kuikazya umuntu wiyo acili akweti nsambu zya kukululwa. Mwina umwi

⁴⁹ nanti nyinalume nanti muvyala wakwe nanti umwi wakazi kakwe angamukulula. Nanti wene walonka impiya zyavula, angaikulula umwisikulu.

⁵⁰ Muzya wiyo alinzile kuuzya mukama wino wamukazile. Alino oili yalinzile kupenda imyaka ukufuma pa nsita ino waikazizye umwisikulu mpaka ukufika nalino Mwaka wa Ukuluzi ulafika. Lyene yapime mutengo wa kukululwa kwakwe ndi vino yangapima malipilo ya muomvi sile.

⁵¹ Ndi myaka ivule yasyala ukufika mu mwaka wakuwezezya, muzya wiyo alinzile ukulipa impendwa ikulu ya mutengo uno wakalilwepo pakuti akululwe.

⁵² Lelo ndi kusile sile imyaka inono kufika mu Mwaka wa Ukuluzi, muzya wiyo alino nu mukama yalinzile kupenda kulingana ni myaka ino yasyala. Muzya alipe impiya zya ukuluzi wakwe.

⁵³ Mukama atalinzile kusunga umuntu wiyo mu kukalala.

⁵⁴ Ndi muzya wiyo atasapwilwe umu nzila imwi pali zii, lyene muzya wiyo pamwi na ana yakwe yalinzile kusapulwa lino Mwaka wa Ukuluzi wafika.

⁵⁵ Mwina Izlaeli atangatekwa uzya amanda pe, pamulandu wakuti aina Izlaeli azya yakwe Yawe. Wene wayakazile ukufuma mu mpanga ya Eguputo. Wene a Yawe Leza wao.’”