Aina Levi 24 - Amazwi Yakwe Leza 2013

Misungile ya nyali

¹ Yawe anena Mose ati,

² “Peela ilamulo ku ina Izlaeli kuti yakupeela amafuta amu nyali, a miolivi, aswepe cuze pakuti inyali yaaka mu Ng'anda yane insita zyonsi.

³ Cila manguzi Aaloni alinzile kukozya ilampi pa manso yakwe Yawe, kunzi ya nsalu yakucingilila ku nkolelo ya Mbokosi ya Upangano ino yaya mu Ncende Yamuzilo ukuluta. Inyali zitalinzile kuzima mpaka kufika katondo. Ilamulo li, lili nu kusungwa ku nkulo zyonsi.

⁴ Aaloni alinzile asunga inyali zii pa cakutekapo inyali cakwe zaabu musuma cuze. Nupya alinzile ukulola ukuti inyali zizyo zikwaka lyonsi pa manso yakwe Yawe.

Mukate wa mawila kuli Yawe

⁵ “Mutole makilogalamu ikumi na yaili a usu utonyoleke alino mupange imikate ikumi na iili.

⁶ Mikate ii, muitantike mu milongo iili. Cila mulongo muye imikate mutanda, pi tebulo lino lyapomelwa na zaabu musuma cuze, lino lili pa manso yakwe Yawe.

⁷ Wike ubani usuma cuze muli cila mulongo, mucifulo ca mikate pakulanga ukuti iciputulwa capeelwa kuli Yawe, nga kuti uye uwila wakocela Yawe.

⁸ Cila wanda wi Sabata Aaloni alinzile ukwika umukate nkolelo pa manso yakwe Yawe. Uu, umulimo wa ina Izlaeli amanda pe.

⁹ Mukate uu, uwakwe Aaloni na amu mupanda wakwe, nga yalinzile kuulila mu Ncende Yamuzilo pamulandu wakuti umukate uu, cili ciputulwa camuzilo cuze ca mawila akocela Yawe.”

Cilangililo ca upinguzi wa ulungami

¹⁰ Kwali umuntu umwi wino isi wali mwina Eguputo, lelo nyina wene wali mwina Izlaeli. Uwanda umwi umuntu wi iyalemanila nu mwina Izlaeli mukasi ka nsakwe.

¹¹ Monsi wii, wino nyina wali mwina Izlaeli, lino yakulwa nu mwina Izlaeli asaalula izina lyakwe Leza, nu kulitipwila. Caleka yamutwala kuli Mose. Nyina wali a Syelomiti, umwana umwanaci wakwe Dibili uwamu mutundu wakwe Dani.

¹² Alino Mose amuyalila mu ng'anda yaminyololo lino akulolela kuti Yawe amunene vino ali nu kupingula.

¹³ Alino Yawe anena Mose ati,

¹⁴ “Tola umuntu wiyo mufumizye kunzi ya nsakwe. Muntu wensi wino uvwile lino akutipwila, aike makasa yakwe pa mutwe wa muntu wiyo kuti apeele umboni wakuti muntu wiyo ali nu mulandu. Lyene iuvi lyonsi lilinzile kumutama na mawe mpaka afwe.

¹⁵ Lyene unene aina Izlaeli ukuti umuntu ali wensi wino watipwila Leza wakwe alinzile kuvunukwa.

¹⁶ Muntu ali wensi wino wasaalula izina lyakwe Yawe alinzile ukukomwa. Iuvi lyonsi lilinzile ukumutama amawe. Ciye mwinamasi nanti mukaya kwene, ndi wapontela Yawe, wene alinzile kutamwa na mawe mpaka afwe.

¹⁷ “Muntu ali wensi uwatala akatwe, alinzile ukukomwa.

¹⁸ Alino umuntu ali wensi uwakoma iciteekwa ca muze alinzile kupyanikizya iciteekwa kwene cino wakoma. Upinguzi kwene uu, umi pa umi.

¹⁹ “Muntu ali wensi ndi wacisa umuntu muze, nawe kwene yalinzile ukumucisa mu musango uli onga.

²⁰ Muntu ndi wavuna muze ifupa, nawe kwene yamuvune ifupa. Ndi watonkola umuntu muze ilinso, nawe kwene atonkolwe ilinso. Muntu ali wensi ndi wakuula muze ilino, nawe kwene yamukuule ilino. Mu nzila ili yonsi ino umuntu wacisila umuntu muze, avino nawe kwene yamucitile.

²¹ Muntu ali wensi wino wakoma iciteekwa, alinzile kupyanikizya iciteekwa kwene cico. Lelo uwakoma umuntu alinzile ukukomwa.

²² Isunde lii, lili nu kusungwa na mwe antu yonsi aina Izlaeli nga na inamasi yano yakwikala muno muli. Pano Nene indi Yawe Leza winu.”

²³ Lino Mose wanena aina Izlaeli vyonsi vii, antu yatoola umuntu wiya yamufumizya ukunzi ya nsakwe nu kumutama na mawe mpaka afwa. Mu musango kwene uu aina Izlaeli iyacita wakwe vino Yawe wapeezile ilamulo kuli Mose.