Aina Levi 23 - Amazwi Yakwe Leza 2013

Manda ya mapepo akuzilizya

¹ Yawe anena Mose ati,

² “Nena aina Izlaeli uti, ‘Manda akuzevya yano nasolola akucindika Yawe, yano mulinzile kumanyisya kuti yaye amaukongano yamuzilo, amanda yakuzevya yano Nene nasolola aeya:

³ Mwaomba imilimo inu mu manda mutanda. Lelo mwaiusya ukuti uwanda uwalenga cinimbali uwanda wi Sabata, wanda wa kupuza. Pa wanda uwo mutaomba imilimo. Lelo mwakongana ku mapepo. Uwanda wi Sabata uwakwe Yawe, usi mulandu ni cifulo cino mukaikalako.

⁴ Mwazevya ivimulo vii pa nsita zino vyasontwa.

Cimulo ca Ucilo ni ca mukate usi na citutumusi

⁵ “‘Cimulo ca Ucilo cino cikazeviwa pa kucindika Yawe, cikatandika lino ilanzi lyawa, pa wanda uwalenga ikumi na yani mu mwezi wa kutandika.

⁶ Pa wanda uwalenga ikumi na yasano ala Cimulo ca Mukate usi na Citutumusi catandika. Lyene pa manda cinimbali mutalinzile kulya umukate uli onsi uno muli icitutumusi.

⁷ Pa wanda wakutandika wa manda kwene yaa, mulinzile kukongana ku mapepo. Kusi ukuomba imilimo inu ino mukaomba cila wanda.

⁸ Pa manda cinimbali mwapeela amawila inu akocela Yawe. Nupya pa wanda uwalenga cinimbali mulinzile kukongana ku mapepo. Kusi ukuomba imilimo inu ino mukaomba cila wanda.’”

⁹ Yawe anena Mose ati,

¹⁰ “Nena aina Izlaeli, uti, ‘Lino mulingila mu mpanga ino Yawe akupeela kunomuli, ndi mwazombola imbezu zyamu vyalo vinu, mukatala mupela umwanzi wankolelo kuli simapepo.

¹¹ Simapepo alinzile ukupeela umwanzi uwo uwila kuli Yawe pakuti mungapolelelwa. Simapepo alinzile ukupeela umwanzi uwo pacisila ca wanda wi Sabata.

¹² Pa wanda uno mwapeela impolelwa iyo ya mbezu zya mwata wa ngano, nupya mulinzile ukupeela uwila wakoca, suuku wa mwaka onga.

¹³ Kwika pali suuku mulinzile ukupeela makilogalamu yaili ya usu utonyoleke, utikinkanye na mafuta ya miolivi kuti vipelwe kuli Yawe wa wila wakoca. Uwila uu uwa mununko usuma ukazanzya Yawe. Nupya cuze cino mulinzile ukupeela pamwi na suuku, uwila wa vyakumwa kulingana na lita wenga wakwe waini.

¹⁴ Mutaezya ukulya imbezu zili zyonsi lino zyacica, ni zisi nanti zisalule nanti umukate upange ku mbezu zicice, mpaka ukufika na pa wanda uno mwaleta impolelwa ii kuli Leza. Ilamulo lii lili nu kusungwa na amu mupanda wako yonsi amanda pe.

Cimulo ca Uzombozi

¹⁵ “‘Mwapenda imilungu ipuma cinimbali pacisila ca wanda wi Sabata, lino mwalesile umwanzi wa wila wakuswelula.

¹⁶ Pa wanda uwalenga amakumi yasano, kuli kuti ndi papita milungu cinimbali nu wanda onga, nupya mupela kuli Yawe uwila wa usu wa vilimwa vipya.

¹⁷ Kuli konsi kuno mukwikala, cila ng'anda ili nu kuleeta imikate iili nu kuipeela wa mawila kuli Yawe. Cila mukate ulinzile kupangwa na makilogalamu yaili a usu utonyoleke, utikinkanye ni citutumusi. Mikate ii, ilinzile kupelwa kuli Yawe wa wila wakuswelula uwa vizao vyankolelo.

¹⁸ Pamwi nu mukate, iuvi lili nu kupeela utwana twa mfwele cinimbali twa mwaka onga, na kacipambasi konga, na yasuuku yaili. Vyonsi vivyo vilinzile ukuya ivyaula ulema. Vilinzile ukupelwa wa wila wakocela Yawe pamwi nu wila wa cakulya alino nu wila wa vyakumwa. Uwila uu uwa mununko usuma ukazanzya Yawe.

¹⁹ Nupya mwapeela sawe wenga ukuya uwila wa kwelela amaifyo, nu twana twa mfwele twiili twa mwaka onga twa wila wa utandano.

²⁰ Simapepo alinzile kuswelula utwana twa mfwele twiili pamwi nu mukate pa manso yakwe Yawe wa wila wakuswelula. Vikwene ivyakwe simapepo, nupya uwila wamuzilo.

²¹ Pa wanda uwo mulaomba imilimo inu ya cila wanda. Lelo mwakongana ku mapepo. Amu mupanda winu yali nu kusunga ilamulo lii amanda yonsi, usi mulandu na kuno yalaya yakikale.

²² “‘Lino mukuzombola mu vyalo vinu, mutazombola ivyakulya vinu mpaka kufika nu mumbali ya vyalo vinu. Nupya mutaswilila ku kuzombola ivyakulya vino mwasya mu mbali ya vyalo vinu. Ivyakulya vino mwasya mu mbali ya vyalo vinu mwasila apina na inamasi. Yawe a Leza winu.’”

Cimulo ca Mwaka Upya

²³ Yawe anena Mose ati,

²⁴ “Nena aina Izlaeli uti, ‘Pa wanda wakutandika uwa mwezi uwalenga cinimbali, mwasunga uwanda, pano uwanda uwa kupuza, nupya mwakongana pamwi ku mapepo lino intandala yalila.

²⁵ Mutaomba imilimo inu ino mukaomba cila wanda. Lelo mwapeela uwila wakocela Yawe.’ ”

Uwanda uwa kupapatila ukwelelwa kwa maifyo.

²⁶ Yawe anena Mose ati,

²⁷ “Uwanda uwalenga ikumi, uwa mwezi uwalenga cinimbali, uli wanda wakucita ulutambi lwa kufuta amaifyo. Pa wanda uwo mutaomba nanti cimwi foo. Mwakongana sile pamwi ku mapepo nu kupeela uwila wa usu kuli Yawe.

²⁸ Mutaomba nanti umulimo umwi pa wanda uwo, pamulandu wakuti uli wanda wakucita ulutambi lwa kufuta amaifyo inu.

²⁹ Muntu ali wensi wino walya icintu icili consi pa wanda uwo, asukulwe mu antu yakwe Leza.

³⁰ Nupya ndi umuntu ali wensi waomba umulimo uli onsi pa wanda uwo, Yawe umwisikulu ali nu kulenga kuti umuntu wiyo afwe.

³¹ Ilamulo lii, lili nu kulondelwa na amu mupanda winu onsi, usi mulandu na kuno yalaya yakikale.

³² Kutandika lino ilanzi lyawa pa wanda uwalenga fundimbali, uwa mwezi uwo, nu kufika ku kuwa kwi lanzi pa wanda uwalenga ikumi mwasunga uwanda uu, uwanda wa kupuza nupya uno mutalinzile ukulya nanti cintu cimwi.”

Cimulo ca Nsakwe

³³ Yawe anena Mose, ati,

³⁴ “Nena aina Izlaeli, uti, ‘Cimulo ca nsakwe cikatandika pa wanda uwalenga ikumi na isano, mu mwezi wakwe cinimbali nu kutwalilila pa manda cinimbali.

³⁵ Pa wanda wakutandika wa manda kwene yaa, mwakongana pamwi ku mapepo, nupya kusi ukuomba imilimo inu ino mukaomba cila wanda.

³⁶ Pa manda cinimbali, cila wanda mulinzile ukupeela amawila akocela Yawe. Nupya pa wanda uwalenga cinani mulinzile kukongana pamwi ku mapepo nu ku kupeela amawila akocela Yawe. Uu, uwanda wa mapepo nupya mutalinzile ukuomba umulimo nanti umwi.

³⁷ “‘Vii, vili vimulo vya upefi lino mukucindika Yawe pa kukongana pamwi ku mapepo, nu kupeela amawila akocela Yawe, amawila yakoca, amawila ya cakulya, impolelwa nga na mawila ya vyakumwa kulingana navino cikulondekwa uwanda nu wanda.

³⁸ Vimulo vii, ivyakulunda pa Masabata ya Mwene yano mukakwata lililili, nga na mawila kwene yaa, nayo kwene akulunda pa mawila yano mukapeela lililili, na pa mawila inu akufikilizya milapo, alino na pa mawila inu akuitemelwa yano mukapeela kuli Yawe.

³⁹ “‘Lino mwamala ukuzombola ivilimwa mu vyalo vinu, mwazevya cimulo cii pa manda cinimbali, ukutandika pa wanda uwalenga ikumi na yasano uwa mwezi wakwe cinimbali. Uwanda wakutandika ulinzile ukuya uwanda wamuzilo uwakupuza.

⁴⁰ Pa wanda wakutandika, mwasenda iviseekwa vinu visuma ukuluta ukufuma ku vimuti vinu ivya viseekwa. Mwasenda misambo ya tuncindu ni misambo ya vimuti vino vyakwatisya mafwa. Ndi mwacita vii alino mutandika cimulo ca mapepo yakucindika Yawe, Leza winu.

⁴¹ Mwazevya icimulo cii pa manda cinimbali. Ilamulo lii, lili nu kusungwa na amu mupanda winu amanda pe.

⁴² Antu yonsi aina Izlaeli yalinzile ukwikala mu nsakwe pa manda cinimbali,

⁴³ pakuti amu mupanda winu yangamanya ukuti Yawe walenzile aina Izlaeli kuti yaikala mu nsakwe lino wayafumizye mu mpanga ya Eguputo. Wene a Yawe, Leza winu.

⁴⁴ “‘Caleka Mose anena aina Izlaeli vimulo vino vyasololwa vyakucindikilamo Yawe.’”