Aina Levi 22 - Amazwi Yakwe Leza 2013

Amawila ya mpolelwa kuli Yawe Amuzilo

¹ Yawe anena Mose ati,

² “Nena Aaloni pamwi na ana yakwe aonsi uti, ‘Mwacindika ivyamuzilo vino aina Izlaeli yakapeela kunondi, pakuti yataleta muzewanya pi zina lyane lyamuzilo. Nene indi Yawe.

³ Muntu ali wensi uwamu mupanda wako ndi ali ni mifitalila, alino wapalama ku mawila yamuzilo yano aina Izlaeli yatiyapaatwila kunondi, umuntu wiyo atangatumikila pa kavuwa nupya. Cii, cili nu kuya ku nkulo zyonsi zyaku nkolelo. Nene indi Yawe.

⁴ “‘Muntu ali wensi uwamu mupanda wakwe Aaloni wino akweti indwala yakwe tembwe, nanti wino akufumya vintu viipe ku wonsi wakwe, atangalya vintu vyamuzilo suka waswefiwa. Simapepo ali wensi ali nu kuya uwamifitalila ndi walema ku cintu cimwi cati cilengwa ukuya icamifitalila pa kukumyanya ni cala nanti ndi wafumya imbezu ku wonsi wakwe.

⁵ Nanti ndi walema inyama yamifitalila nanti umuntu uwamifitalila.

⁶ Simapepo ali wensi wino waya uwamifitalila alinzile ukuya uwamifitalila kufika ku manguzi. Lelo nalyo kwene atangalya impolelwa zyamuzilo suka wafulala umwili onsi.

⁷ Pacisila ca kuwa kwi lanzi, ale simapepo wiyo waya muswepe. Lyene angalya impolelwa zyamuzilo pano ivyakulya vyakwe.

⁸ Simapepo atalinzile kulya inyama ino yaifwila nanti ino yatikomwa ni cilyanyi ca mpanga, pano ingamulenga ukuya uwamifitalila. Nene Yawe.

⁹ “‘Yasimapepo yonsi yalinzile kusunga malamulo yonsi yano napeela. Ndi yatacisile vivyo yali nu kupelwa mulandu. Nupya yangafwa pamulandu wa kuntayela malamulo yamuzilo. Nene indi Yawe, nene nkalenga kuti yaye amuzilo.

¹⁰ “‘Suka sile uwamu ng'anda yakwe simapepo mutupu angalya impolelwa zyamuzilo. Kusi namuze angalya impolelwa zizyo. Kusi mwenyi nanti muomvi wakwe simapepo angalya impolelwa zyamuzilo.

¹¹ Lelo azya yakwe simapepo yano wakala ni mpiya zyakwe nanti yano yavyalilwa mu ng'anda yakwe, yene yangalya cakulya cino simapepo akapokelela.

¹² Mwana umwanaci wakwe simapepo wino watwalwa ku monsi wino asi simapepo, atangalya impolelwa zyamuzilo.

¹³ Lelo ndi umwana wiyo waya a mukamfwilwa nanti iya wamuta nupya atakweti ana, nga wawela kuti aikala nu kusungwa mu ng'anda yakwe isi, wene angalya cakulya cino simapepo akapokelela. Suka sile uwamu ng'anda yakwe simapepo angalya impolelwa zyamuzilo.

¹⁴ “‘Muntu ali wensi wino asi uwamu ng'anda yakwe simapepo ndi walya impolelwa yamuzilo mukuntamanya, alinzile ukulipa kuli simapepo pa cintu cino walya. Alino papela ya cintu cico aungilizye icintu conga pali cila visano.

¹⁵ Yasimapepo yatalinzile kukowezya impolelwa zyamuzilo,

¹⁶ pakuzumilizya umuntu wensi wino atazumiliziwa kulya impolelwa zizyo. Pano camusango uwo cingaletelela umuntu wino walya mulandu nga nu uvunuko. Nene indi Yawe, nupya nene nkalenga kuti impolelwa ziye zyamuzilo.’”

¹⁷ Yawe anena Mose ati,

¹⁸ “Nena Aloni, ana yakwe nga na ina Izlaeli onsi, uti, ‘Lino mwina Izlaeli ali wensi nanti mwinamasi ali wensi wino akwikala mu mpanga ya Izlaeli akupeela uwila wakoca kuli Yawe, uwa kufikilizya mulapo nanti uwa kuitemelwa,

¹⁹ pakuti upokelelwe ulinzile ukuya cipambasi, suuku nanti sawe uwaula ulema.

²⁰ Utaca wezye ukuleta inyama ili yonsi ino ili nu ulema, pano Yawe atalaipokelela pamulandu wako.

²¹ Lino umuntu ali wensi akupeela uwila wa utandano kuli Yawe apa ng'ombe nanti imfwele nanti imbuzi, nanti ungaya uwa ufikilizyo wa mulapo nanti uwila wakuitemelwa, inyama iyo ilinzile ukuya iyaula ulema nanti ndema pakuti ipokelelwe.

²² Mutapela kuli Yawe inyama ili yonsi ino yatonkoka manso, nanti ya ulema nanti ikazwa uwazi nanti ino ikweti icilonda cino cikuzwa, nanti ya vinkwemba nanti ya viyazi. Mutapela inyama ili yonsi ya musango uwo pa kavuwa wa wila wakocela Yawe.

²³ Ku mpolelwa yakuitemelwa mungapeela masaye nanti imfwele ino ili nu ulema nanti ituze. Lelo ku mpolelwa ya kufikilizya mulapo itangapokelelwa.

²⁴ Mutapela impolelwa kuli Yawe inyama yonsi ino mwatungula nanti mwakuzulula vyawonsi vyakweyo, nanti mwalepola vyawonsi vyakweyo nanti mwaputula vyawonsi vyakweyo. Mutakezye ukucita icintu camusango uu mu mpanga inu.

²⁵ “‘Mutapeela wa cakulya inyama ili yonsi yamusango uwo, ino mwafumya mu makasa ya mwinamasi. Inyama yamusango uwo iyononeke nupya ilemale.’”

²⁶ Yawe anena Mose ati,

²⁷ “Lino umwana wa ng'ombe nanti wa mfwele wavyalwa mutalinzile kumufumya kuli nyina pa manda cinimbali. Pacisila ca manda cinimbali nu kuya pa nkolelo wene angapokelelwa wa wila wakocela Yawe.

²⁸ Mutapeela impolelwa nyina ng'ombe nu mwana nanti nyina mfwele nu mwana nanti nyina mbuzi nu mwana pa wanda uli onga.

²⁹ Lino mukupeela impolelwa yakutaizya kuli Yawe, mwalondela malamulo pakuti impolelwa zinu zingapokelelwa.

³⁰ Mwalya impolelwa iyo mpaka imumala uwanda kwene. Mutasya nanti cimwi kufika nu ku katondo ka wanda walondelelapo.”

³¹ Yawe avwanga ati, “Mwayela malamulo yane. Nene Yawe.

³² Mutaleta muzewanya pi zina lyane ilyamuzilo. Aina Izlaeli yonsi yalinzile kunzumila ukuti nene wamuzilo. Nene indi Yawe nupya nkalenga kuti muye amuzilo.

³³ Namufumizye mu mpanga ya Eguputo kuti inje Leza winu. Nene indi Yawe.”