Aina Levi 21 - Amazwi Yakwe Leza 2013

Umuzilo wakwe yasimapepo

¹ Yawe anena Mose ati, “Vwanga kuli yasimapepo, ana yakwe Aloni, uyanene uti, ‘Simapepo atalinzile kuilenga ukuya uwamifitalila pakuzanwa mu zyandosya lino wakazi kakwe umwi wafwa

² suka sile pa ndosya yakwe nyina, yakwe isi nanti iya umwana wakwe umonsi, nanti iya umwana wakwe umwanaci, nanti iya mwina wakwe,

³ nanti yakwe kaci wakwe wino atali atwalwe, wino akwikala nawe mu ng'anda. Pa ndosya yamusango uu, pene angailenga ukuya uwamifitalila.

⁴ Simapepo atalinzile kuilenga ukuya uwamifitalila pa ndosya zya akazi ka muci wakwe.

⁵ “‘Simapepo atakezye ukupela inyele ku mutwe wakwe nanti ukupela mumbali ya vilezu vyakwe, nanti kuicembola ku mwili wakwe, kulanga ukuti watafwilwa.

⁶ Simapepo alinzile ukuya wamuzilo nupya atalinzile kuzewanya izina lyane. Pamulandu wakuti simapepo akapeela amawila akocela Yawe, alinzile ukuya wamuzilo.

⁷ Simapepo atalinzile kutoola umwanaci cizelele ukuya umuci wakwe nanti umwanaci wino iya wamuta. Simapepo uwamuzilo.

⁸ Simapepo alinzile kuloleka uwamuzilo ku manso ya antu, pamulandu wakuti ali wino akapeela impolelwa ya mbezu zya mwata wa ngano kunondi. Nene indi Yawe, nene wamuzilo, nupya nene nkalenga antu yane ukuya amuzilo.

⁹ Mwana umwanaci wakwe simapepo ndi cakuti waya a cizelele ala wazewanya isi. Wene alinzile ukocewa mu moto mpaka afwe.

¹⁰ “‘Simapepo Mukulu uwapakwa amafuta akusolwela pa mutwe wakwe nu kutekwa pa cilimba ca usimapepo, nupya waswefiwa kuti azwala ivyakuzwala vya usimapepo. Caleka atalinzile ukupita ni nyele zyakwe zyaula kusaakula nanti kulepola vyakuzwala vyakwe kulanga ukuti ali ni ndosya.

¹¹ Simapepo atalinzile ukwingila mu ncende umuli icala. Wene atalinzile kuilenga ukuya uwamifitalila nanti kukowezya Itaalu lyane lyamuzilo pa kulisya nu kuya ingila mu ng'anda umuli icala. Cisi cimwi cingaya icala cakwe isi nanti nyina kwene,

¹² nanti ukusya Itaalu lyakwe Leza wakwe nanti ukulikowezya, pamulandu wakuti wene wapaatulwa apa kumupaka amafuta yakwe Leza wakwe.

¹³ Simapepo alinzile ukutwala umwanaci atatala wamanya umonsi kuti aye umuci wakwe.

¹⁴ Wene atalinzile kutwala umwanaci wino wafwilwa iya nanti wino iya wamuta nanti cizelele. Lelo simapepo alinzile kutoola sile umukazyana atatala wamanya umonsi, kuti aye umuci wakwe. Umukazyana wiyo atatala wamanya umonsi alinzile ukufuma mu aluko lwakwe.

¹⁵ Ndi simapepo atacisile vivyo, ana yakwe yano yalinzile ukuya amuzilo yalaya amifitalila. Nene indi Yawe, nupya namupaatula kuti aye Simapepo Mukulu.’”

¹⁶ Yawe apeela ilamulo kuli Mose

¹⁷ kuti anene Aaloni ati, “Kusi nanti wenga uwamu mupanda wako wino wakwata ulema uli onsi angapeela impolelwa ya mbezu zya mwata wa ngano kunondi. Cii, cili nu kuya ku nkulo zyonsi zyaku nkolelo.

¹⁸ Kusi nanti wenga wino akweti ulema uli onsi angapalama ku kavuwa kuti apeele impolelwa, usi mulandu nanti angaya impafu, cilema, mutundame nanti atavyalwa ningo,

¹⁹ nanti mulemale ikasa nanti ikulu,

²⁰ nanti akweti ulema wa ng'ongo nanti mutuze nanti akweti ulema wi linso nanti tembwe nanti a mutungwi kwene.

²¹ Kusi nanti wenga uwamu mupanda wakwe Aaloni simapepo wino akweti ulema uli onsi angapeela amawila akocela Yawe. Wene akweti ulema. Acino atalinzile ukupalama ku kavuwa ku kupeela icakulya cakwe Leza wakwe.

²² Wene angalya icakulya camuzilo cuze cakwe Leza wakwe. Angalya ni cakulya kwene camuzilo.

²³ Lelo pamulandu wakuti umuntu wiyo akweti ulema, atalinzile kupalama pipi ni nsalu yakucingilila iyamuzilo nanti ukuya ku kavuwa. Atalinzile kulenga vintu vii ukuya vyamifitalila, pamulandu wakuti nene indi Yawe, nupya nene nkalenga kuti vintu vivyo viye vyamuzilo.”

²⁴ Vyonsi vii, Mose anena Aaloni pamwi na ana yakwe nga na antu yonsi aina Izlaeli.