Aina Levi 20 - Amazwi Yakwe Leza 2013

Uvunuko wa kukanayela

¹ Yawe anena Mose ati,

² Nena aina Izlaeli uti, “Mwina Izlaeli ali wensi nanti umwinamasi wino akwikala pakasi kinu, umonsi nanti umwanaci ndi wapeela ana yakwe kuli Moleki alinzile ukukomwa. Iuvi lyonsi lya ina Izlaeli limutame na mawe mpaka afwe.

³ Muntu umwi ndi wapeela ana yakwe kuli Moleki nu kulenga Itaalu lyane lyamuzilo ukuya lyamifitalila, nupya nu kuzewanya zina lyane lyamuzilo, umuntu wiyo indamufutatila nu kumusukula mu antu yane.

⁴ Ndi iuvi lyacita uti litaweni lino umuntu wiyo akupeela wenga uwamu ana yakwe kuli Moleki, lyakana ukukoma umuntu wiyo,

⁵ lyene nene kwene indamufutatila umuntu wiyo pamwi na amu ng'anda yakwe onsi, nupya ndayasukula mu antu yane pamwi na yonsi yano yakamulondela mu kupepa Moleki.

⁶ “Muntu ali wensi ndi waya ku antu yano yakavwanga ni mipasi ya antu afwe, indafutatila umuntu wiyo nu kumusukula mu antu yane.

⁷ Mwaipaatula nu kuya amuzilo. Pano nene indi Yawe Leza winu.

⁸ Mwayela masunde yane pano nene indi Yawe, nupya nene nkalenga kuti muye amuzilo.”

⁹ “Yawe apeela malamulo yaa. Muntu wensi uwatipwila isi nanti nyina alinzile ukukomwa. Ala waikoma umwisikulu.

¹⁰ “Monsi wensi ndi walongozya nu muci wa mwina Izlaeli muze, oili umonsi nu mwanaci yalinzile ukukomwa.

¹¹ Monsi wensi wino walongozya na wenga uwamu aci yakwe isi, ala wazewanya isi. Oili umonsi nu mwanaci yalinzile ukukomwa. Ala yaikoma aisikulu.

¹² Monsi ndi walongozya na nyinavyala, oili yalinzile ukukomwa. Oili yaa, yacita isiku. Ala yaikoma aisikulu.

¹³ Aonsi yaili ndi yulungana atupu, yatiyacita cawinyi. Aonsi yao oili yalinzile ukukomwa. Ala yaikoma aisikulu.

¹⁴ Monsi ndi watwala umwanaci nu mwana wa mwanaci kwene wiyo, otatu yalinzile kocewa mu moto mpaka yafwe, pa cintu camuzewanya cino yacita. Cintu camusango uwo citalinzile kuzumiliziwa munomuli.

¹⁵ Monsi ndi uulungana ni nyama alinzile ukukomwa pamwi ni nyama kwene iyo ino uulungana nayo.

¹⁶ Mwanaci ndi wezya kuulungana ni nyama, umwanaci wiyo alinzile ukukomwa pamwi ni nyama kwene iyo. Mwanaci wiyo pamwi ni nyama ala yailya aisikulu.

¹⁷ “Monsi ndi watola kaci wakwe, umwana umwanaci wakwe isi nanti umwana umwanaci wakwe nyina, wamucita ukuya umuci wakwe, nupya yamanyana nu kumanyana, icintu cino antu oili yao yacita camuzewanya. Antu yaa oili yalinzile kusukulwa mu antu yao. Monsi wiyo wazewanya kaci wakwe, nupya alinzile ukulipa.

¹⁸ Monsi ndi walongozya nu mwanaci lino ali ku mwezi, oili kwene, umonsi nu mwanaci yalinzile kusukulwa mwi uvi, pamulandu wakuti yavuna ilamulo lya lutambi lwa mifitalila.

¹⁹ “Monsi ndi walongozya na nyinasenge, oili yalinzile ukulipa pamulandu wi siku.

²⁰ Monsi ndi walongozya nu muci wakwe nyinalume, umonsi wiyo wazewanya nyinalume. Oili kwene, umonsi nu muci wakwe nyinalume yalinzile ukulipa pa maifyo yao. Yalafwa kwaula kukwata umwana.

²¹ Monsi ndi watola umuci wa mwina nga amucita ukuya umuci wakwe, umonsi wiyo nu mwanaci oili yalafwa kwaula kukwata umwana. Monsi wiyo wacita icintu icamifitalila kulingana nu lutambi, nupya wazewanya mwina wakwe.

²² “Yawe avwanga ati, ‘Mwasunga amasunde na malamulo yane yonsi nu kuyalondela, pakuti impanga ino nkumutwala kweneko ku kwikala itakamuluke.

²³ Mutaca mwalondela intambi zya antu yano yakaikala mu mpanga ilya. Nkuzinga nu kufumya antu yaya akulukuwa pakuti mungingila mu mpanga ilya. Pano yene yatiyandenga kuvwa muselu pa micitile ya uyi wao.

²⁴ Lelo nalaya ukupeela mwemwe impanga iyi ziya nu uci kuti iye iyakwinu. Ndapeela impanga iyo kunomuli. Nene indi Yawe Leza winu. Namupaatula ukufuma mu nko zyonsi.

²⁵ Caleka mwemo mulinzile kupusanya pakasi ka nyama ni vyunyi vyamifitalila ni visi vyamifitalila. Mutaalya inyama nanti vyunyi vyamifitalila. Ndi mwalya vintu vivyo vingamulenga ukuya amifitalila.

²⁶ Mulinzile ukuya amuzilo pa manso yane, akwane nenga mpo, pamulandu wakuti ne Yawe nene wamuzilo. Namupaatula ukufuma ku nko zyonsi pakuti mungaya akwane nenga mpo.’

²⁷ “Monsi nanti umwanaci wensi wavwanga ni mipasi ya antu afwe alinzile kutamwa na mawe mpaka afwe. Nupya umuntu wensi uwacita icintu cii ala waikoma umwisikulu.”