Aina Levi 2 - Amazwi Yakwe Leza 2013

Amawila ya cakulya

¹ “‘Lino umwi akupeela uwila wa usu kuli Yawe, uwila uwo ulinzile ukuya usu utonyoleke. Usu uwo atikinkanye na mafuta nu ubani.

² Alino autwale kuli yasimapepo ana yakwe Aaloni aonsi. Atapule usu uwo utonyoleke ikufi lyonga, utikinkanye na mafuta nu ubani onsi. Lyene simapepo aoce vyonsi vivyo pa kavuwa, pakulanga ukuti iciputulwa icapeelwa kuli Yawe. Mununko usuma uwa wila uu ukazanzya Yawe.

³ Ivyasyala vya wila wa usu vipelwe kuli yasimapepo, ana yakwe Aaloni aonsi. Uwila uu uwa mununko usuma ukazanzya Yawe.

⁴ “‘Ndi ukupeela uwila wa usu uno wapangwa mu citofu, uwila uwo ulinzile ukuya makeke ya usu wa ngano utonyoleke usi na citutumusi nupya utikinkanye na mafuta, nanti umukate wa mpanda upapatale usi na citutumusi nupya upake mafuta.

⁵ “‘Ndu kupanga umukate wa wila wa usu mukuomvya cikombole, uwila uwo ulinzile ukuya umukate wa usu utonyoleke utikinkanye na mafuta, nupya usi na citutumusi.

⁶ Utoole umukate uwo, uuputoleputole nu kuupaka amafuta. Vii avino umuntu akapeela musango uu uwa wila wa usu.

⁷ “‘Lyene uwila wako wa usu ndu mukate wapangwa muli pani, uwila uwo ulinzile ukuya umukate wa usu utonyoleke, utikinkanye na mafuta.

⁸ Ulete uwila wa usu uwapangwa ku vintu kwene vii kuli ne Yawe. Lyene ndi watwala kuli simapepo, simapepo kwene wiyo aliwe autwale ku kavuwa.

⁹ Simapepo wiyo atoole ciputulwa cimwi ca mukate pakulanga ukuti cene iciputulwa icapeelwa kuli Yawe. Lyene aoce umukate uwo pa kavuwa. Uwila uu uwa mununko usuma ukazanzya Yawe.

¹⁰ Lyene ivyasyala vya mawila ya usu vipelwe kuli Aaloni na ana yakwe. Cico kwene cili ciputulwa camuzilo ukuluta, pamulandu wakuti casyala pa mawila akocela Yawe.

¹¹ “‘Amawila ya cakulya yano ukupeela kuli Yawe utalinzile ukwikamo icitutumusi, pamulandu wakuti utalinzile ukoca icitutumusi cili consi nanti uuci wa wila wakocela Yawe.

¹² Amawila ya uzombozi wankolelo cila mwaka ulinzile kutwala kuli Yawe. Lelo utalinzile kuyocela pa kavuwa wa wila uwa mununko usuma ukazanzya Yawe.

¹³ Amawila yako yonsi ya cakulya ulinzile wacemekamo musilya, utailila foo. Musilya uwo uwakulanga upangano pakasi kakwe wewe na Leza wako. Ulinzile kucemeka musilya mu mawila yako yonsi ya cakulya.

¹⁴ Ndu kupeela kuli Yawe uwila wa usu uwa vizao vyankolelo, ulinzile ukupeela uwila wa mbezu zipya zisalule, izisye.

¹⁵ Lyene uutikinkanye na mafuta ya miolivi nu ubani. Vii avino umuntu akapeela musango uu uwa wila wa cakulya.

¹⁶ Lyene simapepo aoce ciputulwa cimwi ca usu umuli amafuta nu ubani, pakulanga ukuti iciputulwa capeelwa kuli Yawe. Uwo kwene uli wila wakocela Yawe.