Aina Levi 17 - Amazwi Yakwe Leza 2013

Umuzilo wa wazi

¹ Yawe anena Mose ati,

² “Nena Aaloni na ana yakwe aonsi, pamwi na ina Izlaeli yonsi uti Yawe wapeela ilamulo wati,

³ ‘Mwina Izlaeli wensi uwafyulila masaye, nanti umwana wa mfwele nanti imbuzi mukasi ka nsakwe nanti kunzi ya nsakwe,

⁴ mu cifulo cakumuleta pa mulyango wi Taalu lya Ukongano, kuti apeele masaye wiyo wa mawila kuli Yawe ku nkolelo yi Taalu lya Ukongano lyakwe Yawe, umuntu wiyo alinzile kupelwa mulandu wa katwe. Wene watazwisya uwazi nupya wene alinzile kusukulwa mu antu yane.

⁵ Cii, cikusenula ukuti aina Izlaeli yakaaleta kuli Yawe inyama zya mpolelwa zino pali ndakai yakufyulila pa lwalala. Yalinzile kuzileta kuli simapepo, kuli kuti kuli Yawe, pa mulyango wi Taalu lya Ukongano kuti ziye amawila autandano.

⁶ Simapepo alinzile kusansa uwazi kuzingulusya kavuwa kakwe Yawe, pa mulyango wi Taalu lya Ukongano. Pacisila cakwe cii, aoce amafuta wa wila uwa mununko usuma ukazanzya Yawe.

⁷ Caleka ndakai aina Izlaeli yatalinzile ukupeela impolelwa ku tuluwi utwa cata ca mbuzi tuno yakafukamila. Ilamulo lii, lili nu kusungwa ku nkulo zinu zyonsi.

⁸ Mwina Izlaeli ali wensi nanti umwinamasi wino akwikala pakasi kao, wino akupeela uwila wakoca nanti impolelwa yuze

⁹ ya mawila kuli Yawe ndi atalesile uwila uwo pa mulyango wi Taalu lya Ukongano kuti aupeele kuli Yawe, wene alinzile kusukulwa mu antu yakwe Leza.

¹⁰ “‘Mwina Izlaeli ali wensi nanti umwinamasi wino akwikala pakasi kao, ndi walya inyama ino mucili uwazi, Yawe ali nu kumusukula mu antu yakwe.

¹¹ Pano umi wa ciumbwa consi waya mu wazi. Uli mulandu uno ne Yawe namupeelile uwazi pakuti mupepele umi winu pa kavuwa ipepo lya lutambi lwa kufuta amaifyo inu. Pano uwazi auno ukalipilwa pa maifyo inu.

¹² Uli mulandu uno Yawe watapeela ilamulo ku ina Izlaeli kuti aliyo, nanti mwinamasi ali wensi wino akwikala pakasi kao atalinzile kulya inyama umuli uwazi.’”

¹³ Nena aina Izlaeli uti, “Mwina Izlaeli ali wensi nanti umwinamasi wino akwikala pakasi kao, ndi waya ku kulunga wakoma inyama nanti icunyi cino antu yakalya, alinzile kuzwisya uwazi wa nyama iyo nanti wa cunyi cico pa nsi nu kuuzika na masenga.

¹⁴ Pano umi wa ciumbwa consi ca umi waya mu wazi. Uli mulandu uno Yawe watapeela ilamulo ku ina Izlaeli ukuti yatalinzile kulya inyama ino mucili uwazi. Nupya wensi uwacita icintu cico ali nu kusukulwa mu antu yakwe.

¹⁵ “Mwina Izlaeli ali wensi nanti mwinamasi wino akwikala mwi uvi lya ina Izlaeli ndi walya inyama ino yatiifwila nanti ino yatilumwa ni cilyanyi ca mpanga, alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

¹⁶ Lelo ndi cakuti atafuzile insalu zyakwe nu kufulala umwili onsi, ale mulandu wakwe.”