Aina Levi 16 - Amazwi Yakwe Leza 2013

Uwanda wa kupapatila ukwelelwa kwa maifyo

¹ Yawe wavwanzile kuli Mose pacisila ca mfwa ya ana yakwe Aaloni yaili aonsi, yano yakomilwe lino yapezile umoto uwamifitalila kuli Yawe.

² Yawe avwanga ati, “Nena munyonko Aaloni kuti ataingila insita ili yonsi mu Ncende Yamuzilo kuluta, kwi tundu lya nsalu yakucingilila, ku nkolelo ya ntupiko ya Mbokosi ya Upangano, pano angafwa pamulandu wakuti ne Yawe nkalolekela mwi kumbi papela ya ntupiko iyo.

³ Aaloni aingila mu Ncende Yamuzilo kuluta pacisila cakuleta kacipambasi ka wila wa kwelela amaifyo, na suuku wenga uwa wila wakoca.”

⁴ Lyene Yawe apeela malamulo yaa. Lino Aaloni atali aingile mu Ncende Yamuzilo kuluta, alinzile kufulala umwili onsi nu kuzwala vyakuzwala vyamuzilo, mwingila, kaputula, na tulibani.

⁵ Aina Izlaeli yonsi yalinzile ukupeela Aaloni yasawe yaili akupeela uwila wa kwelela amaifyo na suuku wenga uwa kupeela uwila wakoca.

⁶ Aaloni alinzile ukupeela cipambasi uwa wila wa kwelela amaifyo yakwe kuti acite ulutambi lwa kufuta amaifyo yakwe nga na maifyo ya amu ng'anda yakwe.

⁷ Lyene alinzile kutoola imbuzi ziili azitwale pa mulyango wi Taalu lya Ukongano pa manso yakwe Yawe.

⁸ Papa kwene apendole pa mbuzi ziili zizyo, aomvye mawe yaili. Iwe limwi lyalembwapo “Kuli Yawe” ni lyuze nalyo lyalembwapo “Kuli Azazeli”.

⁹ Aaloni alinzile kutoola imbuzi ino icipendwilo calanga ukuti imbuzi iyakwe Yawe, aipeele ukuya uwila wa kwelela amaifyo.

¹⁰ Lelo imbuzi yuze ino cipendwilo caticilanga ukuti iyakwe Azazeli, alinzile kuipela ipuma kuli Yawe, kuti acite ulutambi lwa kufuta amaifyo pa mbuzi iyo nu kuita kuti yapita mu lwanga kuli Azazeli.

¹¹ Aaloni alinzile ukupeela cipambasi kuti aye uwila wa kwelela amaifyo yakwe, alino acite ulutambi lwa kufuta amaifyo yakwe nga na maifyo ya amu ng'anda yakwe, nga alinzile kufyula cipambasi uwa wila wa kwelela amaifyo yakwe.

¹² Alinzile kutoola icifutikilo, azuzye makala ya moto ukufuma pa kavuwa. Alino atapule amakufi yaili ya ubani wa cinunkilo cisuma utonyoleke, alino aingile mu nsalu yakucingilila mu Ncende Yamuzilo kuluta.

¹³ Lyene mumu kwene pa manso yakwe Yawe Aaloni alinzile kwika ubani pa moto. Lyene icunsi ca ubani cimalenga kuti Aaloni atalola intupiko ya Mbokosi ya Upangano, pano angafwa.

¹⁴ Alinzile kutoola uwazi umwi wakwe cipambasi nu munwe wakwe. Alino asanse ku nkolelo ya ntupiko ya Mbokosi ya Upangano. Lyene uwazi umwi asanse maila cinimbali ku nkolelo ya Mbokosi ya Upangano.

¹⁵ Pacisila cakwe cico, alinzile kufyula imbuzi ya wila wa kwelela amaifyo ya antu. Alete uwazi wa mbuzi iyo mu Ncende Yamuzilo kuluta. Alino atoole uwazi uwo asanse pa ntupiko ya Mbokosi ya Upangano nga nu ku nkolelo ya Mbokosi ya Upangano, wakwe vino waliwacita nu wazi wakwe cipambasi.

¹⁶ Vii, avino Aaloni ali nu kucita pa lutambi lwa kuswefya Ncende Yamuzilo kuluta ku mifitalila ya ina Izlaeli nu ku maifyo yao Alinzile kucitila ni Taalu lya Ukongano icili cimwi kwene pamulandu wakuti lyaya pa nsakwe ikowele.

¹⁷ Mwi Taalu lya Ukongano mutalinzile ukuya nanti umuntu wenga ndi Aaloni wingila ku kucita ulutambi lwa kuswefya Ncende Yamuzilo kuluta. Mutaya umuntu mpaka kufika nalino wamala ukucita ulutambi lwa kufuta amaifyo yakwe na maifyo ya amu ng'anda yakwe, nga na maifyo yi uvi lya ina Izlaeli.

¹⁸ Lyene alinzile kufumila kunzi nu kuya ku kavuwa kano kali pa manso yakwe Yawe, alino acite ulutambi lwa kukaswefya. Atole uwazi wakwe cipambasi nu wazi wa mbuzi, alino apake pa mpembe zya kavuwa akazingulusye.

¹⁹ Alinzile kutoola uwazi umwi nu munwe wakwe nu kusansa pa kavuwa maila cinimbali. Vii, avili vino alinzile ukucita pa kuswefya aina Izlaeli nu kulenga kuti kavuwa kaye akamuzilo.

Mbuzi yakusenda maifyo

²⁰ Lino Aaloni wamala ukucita ulutambi lwa kuswefya Ncende Yamuzilo kuluta, mwi Taalu lya Ukongano nga nu kuswefya kavuwa, alinzile ukupeela kuli Yawe imbuzi ipuma ino yasolwilwe kuti iye yakwe Azazeli.

²¹ Alinzile kwika makasa yakwe yoili pa mutwe wa mbuzi iyo, alino ailongwele uyi wakwe na maifyo yakwe, na ucisanguka wa ina Izlaeli pa mutwe wa mbuzi. Pa kucita vii ale watwika vyonsi pa mutwe wa mbuzi. Lyene umuntu umwi wino watasontwa alinzile kuzingila imbuzi iyo mu lwanga.

²² Imbuzi iyo isende maifyo yao yonsi mu mpanga mu mapoli muno mutikala antu. Lyene umuntu wiyo aisapulwile mu lwanga.

²³ Lyene Aaloni alinzile kwingila mwi Taalu lya Ukongano, azule vyakuzwala vya usimapepo, vivi vino waliwazwala lino atali aingile mu Ncende Yamuzilo kuluta, avisye mumu kwene.

²⁴ Alinzile kufulala umwili onsi lino acili mu Ncende Yamuzilo, alino azwale insalu zyakwe. Pacisila cakwe cico, alinzile kufumila panzi alino apeele impolelwa ya wila wakoca, ya lutambi lwa kufuta amaifyo yakwe na maifyo ya antu.

²⁵ Pa kavuwa alinzile ukoca amafuta ya nyama ya wila wa kwelela amaifyo.

²⁶ Muntu wiya wino wasonsilwe kuti azingile imbuzi mu lwanga kuli Azazeli, alinzile kufulala umwili onsi lino atali aswilile mu nsakwe.

²⁷ Ing'ombe ni mbuzi ya wila wa kwelela amaifyo, zino yatozile uwazi waziko yaomvye pa lutambi lwa kuswefya Ncende Yamuzilo kuluta, yalinzile kuzifumya kunzi ya nsakwe. Alino yoce imikwela, ni minyefu nga ni vyamunda vyakwezyo.

²⁸ Muntu wino woca vintu vivyo alinzile ukufula insalu zyakwe nu kufulala umwili onsi lino atali aswilile mu mutanda.

Uwanda wa kupapatila kwa kufumya maifyo

²⁹ Malamulo yaa, yali nu kusungwa ku nkulo zinu zyonsi. Pa wanda uwalenga ikumi, uwa mwezi uwalenga cinimbali, aina Izlaeli pamwi na inamasi yano yakwikala pakasi kao, yatalinzile ukulya nanti cakulya cimwi. Nupya yatalinzile ukuomba umulimo uli onsi.

³⁰ Pa wanda uwo ulutambi lwa kufuta amaifyo luli nu kucitwa, lwa kuswefya aina Izlaeli na inamasi ku maifyo yao, pakuti yaye aswepe kulingana nu lutambi.

³¹ Uwanda uwo uli nu kuya wamuzilo cuze, wanda uno yatalinzile kulya nanti cakulya cimwi. Nupya yatalinzile ukuomba umulimo uli onsi. Malamulo yaa, yali nu kusungwa ku nkulo zinu zyonsi.

³² Simapepo Mukulu wino watekwa pa cilimba ca usimapepo, wino wapaatulwa kuti angapyana isi awino angacita ulutambi lwa kufuta amaifyo. Alinzile kuzwala vyakuzwala vya usimapepo,

³³ alino acita ulutambi lwa kuswefya Ncende Yamuzilo kuluta, lwa kuswefya Itaalu lya Ukongano na kavuwa, lwa kupapatila kufumya kwa maifyo yakwe yasimapepo yauze na maifyo yi uvi lya ina Izlaeli.

³⁴ Malamulo yaa, yali nu kusungwa ku nkulo zinu zyonsi. Nupya ulutambi lwa kufuta amaifyo lulinzile kucitwa iila lyonga cila mwaka, lwa kuswefya aina Izlaeli ku maifyo yao yonsi. Caleka Mose acita wakwe vino Yawe wapeezile ilamulo.