Aina Levi 15 - Amazwi Yakwe Leza 2013

Vyawinyi ivikafuma mu mwili

¹ Yawe anena Mose na Aaloni ati,

² “Munene aina Izlaeli muti, Monsi wensi wino wafumya vimwi ku wonsi wakwe ala waya uwamifitalila.

³ Nanti mafila yacili yakufuma nanti yatiyata, yakambatile sile ku wonsi, umuntu wiyo uwamifitalila.

⁴ Musanzi onsi uno umuntu wiyo wikalapo nanti kulalapo uwamifitalila.

⁵ Muntu wensi uwakumya ku musanzi wakwe,

⁶ nanti umuntu umwi wikala pali cimwi cino mulwale waliwikalapo, umuntu wiyo alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

⁷ Muntu wensi wakumya umonsi wino akufumya ufila ku vya nzwalo vyakwe alinzile ukufula insalu nu kufulala umwili onsi, nupya aye uwamifitalila kufika ku manguzi.

⁸ Muntu wino akufumya ufila ku wonsi wakwe ndi cakuti waswila umuntu umwi na mati, umuntu wino waswila alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

⁹ Nupya cakwikalapo icili consi capa mfwalasi nanti cakwikalapo consi cino wiyo akufumya ufila wikalapo caya icamifitalila.

¹⁰ Muntu wensi uwakumya ku cintu consi cino muntu wino akufumya ufila ku wonsi wali wikalapo, waya uwamifitalila kufika ku manguzi. Nupya umuntu wensi wino wasenda icintu consi cino umuntu wino akufumya ufila ku wonsi wakwe wali wikalapo, alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

¹¹ Muntu wino akufumya ufila ku vya nzwalo vyakwe ndi wakumya umuntu umwi lino atali afulale makasa, umuntu wino wakumya alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

¹² Civiya consi ciivu cino umuntu wino akufumya ufila ku wonsi wakwe wakumya, cilinzile ukucitamola alino civiya consi ca mbao cilinzile kufulwa na manzi.”

¹³ Muntu wino wafumyanga ufila ndi walola ukuti watapola, alinzile kulolela pa manda cinimbali akuswefiwa kwakwe. Lyene afule insalu zyakwe nu kufulala umwili onsi na manzi aku kafukoka. Lyene ala waya muswepe.

¹⁴ Pa wanda uwalenga cinani alinzile kutoola ivipeele viili nanti ana ya nkunda yaili nu kutwala pa mulyango wi Taalu lya Ukongano pa manso yakwe Yawe, avipeele kuli simapepo.

¹⁵ Simapepo alinzile ukupeela icunyi conga ukuya uwila wa kwelela amaifyo. Lyene icunyi cuze ciye uwila wakoca. Vii, avili vino simapepo alinzile ukucita pa lutambi lwa kufuta amaifyo ya muntu wiyo pamulandu wakuti akufumya ufila ku wonsi wakwe.

¹⁶ “Monsi wensi ndi wafumya imbuza ku wonsi wakwe, alinzile kufulala umwili onsi, nupya aye uwamifitalila kufika ku manguzi.

¹⁷ Cintu icili consi capangilwe ni nsalu nanti capangilwe nu mukwela unyuke pano imbuza zyaponela cilinzile kufulwa, nupya ciye icamifitalila kufika ku manguzi.

¹⁸ Pacisila cakulambalala nu kumanyana, umonsi nu mwanaci yoili yalinzile ukufulala umwili onsi, nupya yaye amifitalila kufika ku manguzi.”

¹⁹ Mwanaci wensi ndi waya ku mwezi ala waya uwamifitalila pa manda cinimbali. Muntu wensi uwakumya umwanaci aali ku mwezi aye uwamifitalila kufika lino ilanzi lyawa.

²⁰ Cintu icili consi cino umwanaci wiyo wikalapo nanti cino walalapo mu nsita ino ali ku mwezi, ciye icamifitalila kufika ku manguzi.

²¹ Muntu wensi uwakumya ku musanzi wa mwanaci wiyo alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

²² Muntu wensi uwakumya ku cintu icili consi cino umwanaci wiyo waliwikalapo alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

²³ Nanti musanzi nanti icintu icili consi cino umuntu wiyo akaikalapo ndu muntu umwi wakumya, aye uwamifitalila kufika ku manguzi.

²⁴ Monsi wensi ndi cakuti wamanya umwanaci wiyo lino acili ku mwezi, umonsi wiyo wakoweziwa ni mifitalila ya mwanaci. Monsi wiyo aye uwamifitalila pa manda cinimbali, nu musanzi uli onsi uno akulalapo uwamifitalila.

²⁵ Mwanaci wensi ndi wafumya uwazi pa manda mavule lino asi ku mwezi nanti insita yaku mwezi yapitilila manda yakweyo, umwanaci wiyo waya uwamifitalila mu nsita ino uwazi ukufuma, wakwe vino akaya uwamifitalila lino akaya ku mwezi.

²⁶ Musanzi onsi uno umwanaci wiyo wikalapo nanti icintu icili consi cino wikalapo mu nsita iyo, ciye icamifitalila.

²⁷ Muntu wensi wakumya ivintu vivyo waya uwamifitalila. Alinzile ukufula insalu zyakwe nu kufulala umwili onsi, nupya aye uwamifitalila kufika ku manguzi.

²⁸ Uwazi ndi wata ukufuma, umwanaci wiyo alinzile kulolela pa manda cinimbali. Alino ala waya muswepe kulingana nu lutambi.

²⁹ Pa wanda uwalenga cinani, umwanaci wiyo alinzile kutoola ivipeele viili nanti utwana twa nkunda twili nga atwale kuli simapepo pa mulyango wi Taalu lya Ukongano pa manso yakwe Yawe.

³⁰ Simapepo alinzile ukupeela icunyi conga wa wila wa kwelela amaifyo. Lyene icunyi cuze apeele wa wila wakoca. Vii, avili vino simapepo alinzile ukucita pa lutambi lwa kufuta amaifyo pa kuswefiwa kwa mwanaci akufumya uwazi pa manda mavule.

³¹ Yawe wanenyile Mose kuti asoke aina Izlaeli pamulandu wa mifitalila yao pakuti yatakowezya Itaalu lya Ukongano lino lyali pakasi ka nsakwe. Pano ndi yalikowizye, yangakomwa.

³² Yaa, ali malamulo ya pamulandu wa monsi wino akufumya ufila nanti mbuza ku wonsi wakwe,

³³ na pamulandu wa mwanaci wino ali ku mwezi, na pamulandu wa monsi wino wamanyana nu mwanaci uwamifitalila.