Aina Levi 14 - Amazwi Yakwe Leza 2013

Mpolelwa zyakuswefiwa ndi tembwe wapola

¹ Yawe anena Mose ati,

² “Yaa, ali malamulo ya lutambi lwa kuswefiwa kwa muntu wino wapoziwa kuli tembwe. Pa wanda uno mulwale wiyo ali nu kunenwa ukuti waswefiwa, alinzile kuletwa kuli simapepo.

³ Simapepo alinzile kumusenda kunzi ya nsakwe nu kumuceceta. Ndi cakuti ulwale wa nkanda wapola,

⁴ simapepo alinzile ukupeela ilamulo kuti yamuletele vyunyi vipuma viili vino Ayuda yakalya pamwi na kamusambo ka cimuti ca mukelide nga yamuletele na kasalu kayenzu alino na kamusambo ka isopu.

⁵ Lyene simapepo alinzile ukupeela ilamulo kuti yafyule icunyi conga, yacifyulile papela ya lweso umuli amanzi afumile mu kafukoka.

⁶ Simapepo alinzile kutoola icunyi cuze cino yatakomile, pamwi nu musambo wa cimuti ca mukelide, kasalu kayenzu alino na kamusambo ka isopu, avitimpike mu wazi wa cunyi cino yatiyafyula.

⁷ Simapepo alinzile kusansa uwazi maila cinimbali pa muntu wino akuswefiwa ku ndwala yakwe tembwe. Lyene alinzile kumunena ukuti wataswefiwa. Simapepo alinzile kuta icunyi cino yatakomile kuti cipapuke, kusalala mu vyalo.

⁸ Muntu wino waswefiwa alinzile ukufula insalu zyakwe, apele inyele zyonsi, alino afulale umwili onsi. Lyene umuntu wiyo waya muswepe. Angingila mu nsakwe, lelo alinzile ukwikala panzi yi taalu lyakwe pa manda cinimbali.

⁹ Pa wanda uwalenga cinimbali nupya alinzile ukupela inyele zyonsi, vilezu vyakwe, inkopyo zyakwe nga ni pipi lyonsi ilyaya pa mwili wakwe. Alinzile ukufula insalu zyakwe nu kufulala umwili onsi, lyene ale waswefiwa.”

¹⁰ Pa wanda uwalenga cinani alinzile ukuleta yasuuku yaili ni mfwele yakaci yonga, yamwaka onga, vyonsi vii vyaula ulema. Nupya alinzile ukuleta makilogalamu yatatu a usu utikinkanye na mafuta ya miolivi kuti uye uwila wa cakulya, nga ni ciputulwa conga pa viputulwa vitatu vyakwe lita wa mafuta ya miolivi.

¹¹ Simapepo wino akuswefya mulwale wiyo amusende pamwi ni vya mawila vyakwe pa manso yakwe Yawe, pa mulyango wi Taalu lya Ukongano.

¹² Lyene simapepo alinzile kutoola suuku wenga pamwi ni ciputulwa conga pa viputulwa vitatu vyakwe lita wa mafuta ya miolivi, nga avipele wa wila wa cizumila mulandu. Alinzile kuviswelula pa manso yakwe Yawe wa wila wakuswelula.

¹³ Simapepo alinzile kufyulila suuku mu Ncende Yamuzilo muno yakafyulila inyama zya mawila akwelela amaifyo na mawila yakoca. Uwila wa kwelela amaifyo uwakwe simapepo ndi vino nu wila wa cizumila mulandu uwakwakwe. Uwila wa cizumila mulandu uwamuzilo cuze.

¹⁴ Simapepo alinzile kutoola uwazi umwi wa wila wa cizumila mulandu nga apake pa nsongo yi kutwi lya kwilunji, pa cala ca kwilunji na pa cikando ca kwi kulu lya kwilunji lya muntu wino akuswefiwa.

¹⁵ Simapepo alinzile kutoola amafuta ya miolivi aitile pi kufi lyakwe ilimani.

¹⁶ Lyene atimpike umunwe wakwe wa kwi kasa lilunji mu mafuta, alino asanse amafuta nu munwe wakwe maila cinimbali pa manso yakwe Yawe.

¹⁷ Simapepo alinzile kutoola amafuta yamwi yano yasile pi kufi lyakwe, nu wazi umwi wa wila wa cizumila mulandu. Alino apake pa nsongo yi kutwi lya kwilunji, pa cala ca kwi kasa lilunji na pa cikando ca kwi kulu lilunji lya muntu wino akuswefiwa.

¹⁸ Mafuta yano yasyala pi kufi simapepo alinzile kupaka ku mutwe wa muntu wino akuswefiwa. Vii, avili vino simapepo alinzile ukucitila umuntu ulutambi lwa kufuta amaifyo pa manso yakwe Yawe.

¹⁹ Lyene simapepo alinzile ukupeela uwila wa kwelela amaifyo, pakufuta amaifyo ya muntu wiyo wino alinzile kusangululwa ku ukowezya wakwe. Lyene simapepo alinzile kufyula inyama ya wila wakoca.

²⁰ Apeele pamwi nu wila wa cakulya pa kavuwa. Vii, avili vino simapepo alinzile ukucita pa lutambi lwa kufuta amaifyo ya muntu wino wapola ku ndwala yakwe tembwe. Pacisila cakwe vii ala umuntu waswefiwa.

²¹ Muntu mulwale ndu mupina, atangapeela vii vyonsi, lyene alinzile ukuleta sile umwana wa mfwele wenga, suuku wenga wa wila wa cizumila mulandu uwakuswelula kuli Yawe pakufuta amaifyo yakwe. Alinzile ukuleta kilogalamu wenga wa usu utonyoleke kuti uye uwila wa cakulya, utikinkanye na mafuta ya miolivi.

²² Nupya alinzile ukuleta ivipeele viili nanti ana ya nkunda yaili, conga ciye uwila wa kwelela amaifyo ni cuze ciye uwila wakoca.

²³ Pa wanda uwalenga cinani mukuswefiwa kwakwe, mulwale wiyo alinzile ukuleta vyonsi vivyo kuli simapepo, pa mulyango wi Taalu lya Ukongano pa manso yakwe Yawe.

²⁴ Simapepo alinzile kutoola umwana wa mfwele ya wila wa cizumila mulandu alino atoole na mafuta ya miolivi, nga aviswelwile pa manso yakwe Yawe wa wila wakuswelula.

²⁵ Simapepo alinzile kufyula umwana wa mfwele uwa wila wa cizumila mulandu. Alino atoole uwazi wa mfwele apake pa nsongo yi kutwi lya kwilunji na pa cala ca kwi kasa lilunji, alino na pa cikando ca kwi kulu lilunji lya muntu wino akuswefiwa.

²⁶ Simapepo alinzile kwitila amafuta pi kufi lya kwi kasa limani pa manso yakwe Yawe.

²⁷ Mafuta yayo asanse maila cinimbali nu munwe wakwe wa kwi kasa lilunji.

²⁸ Nupya atoole amafuta yamwi yano yali mwi kufi lyakwe nga apake pa nsongo yi kutwi lya kwi kasa lilunji lya muntu kwene wiyo akuswefiwa. Nupya apake ni cala ca kwi kasa lilunji, pamwi na pa cikando ca kwi kulu lilunji, papa kwene pano wali wapaka uwazi wa wila wa cizumila mulandu.

²⁹ Mafuta yano yasyala, yano yali pi kufi lyakwe, simapepo alinzile kupaka ku mutwe wa muntu wino akuswefiwa pakufuta amaifyo yakwe pa manso yakwe Yawe.

³⁰ Lyene alinzile ukupeela ivipeele nanti ana ya nkunda yaili, ukulingana na vino umuntu wino akuswefiwa angapeela.

³¹ Nkunda yonga iye iya wila wa kwelela amaifyo, ni yuze iye uwila wakoca pamwi nu wila wa cakulya. Vii, avili vino simapepo alinzile ukucita pa lutambi lwa kufuta amaifyo ya muntu wino wapola ku ndwala yakwe tembwe.

³² Lii, lili lamulo ku muntu wino wapola ku ndwala yakwe tembwe, wino atangapeela vintu vyapa lutambi lwa kuswefiwa kwakwe kulingana na vino cikalondekwa.

Kuvuvuma kwa mu ng'anda

³³ Yawe anena Mose ati,

³⁴ “Lino mulingila mu mpanga ya Kenani, ino nkupeela kunomuli kuti iye iyakwinu, ndi cakuti umuntu umwi wazana ukuti Yawe watatuma kuvuvuma mu ng'anda yakwe,

³⁵ umwisikulu wa ng'anda iyo alinzile aye kuli simapepo nu kumunena pamulandu wa kuvuvuma mu ng'anda yakwe.

³⁶ Simapepo alinzile ukupeela ilamulo kuti yafumye vintu vyonsi vyamu ng'anda iyo, lino atacili aye kuti akacecete kuvuvuma kuko. Pano limwi vintu vyonsi vyamu ng'anda vingaya vyamifitalila. Lyene alinzile ukuya ku ng'anda,

³⁷ nu kuceceta kuvuvuma kuko. Mu civuvume ndi muli vimwi vyakwe katapakatapa nanti viyenzulukile vino vikuloleka ngati vikulya lung'umba,

³⁸ simapepo alinzile ukusya wayala ing'anda iyo pa manda cinimbali.

³⁹ Pa wanda uwalenga cinimbali simapepo alinzile ukuswilila nu kuya ceceta nupya. Kuvuvuma ndi kwaloleka ukuti kwati kukulilako,

⁴⁰ simapepo alinzile ukupeela ilamulo kuti yafumye mawe yonsi avuvume nu kuya yasumba ku citumba ca kunzi ya musumba.

⁴¹ Pacisila cakwe vii alinzile ukupeela ilamulo kuti yakolole lung'umba lonsi lwa mukasi ka ng'anda. Ivu lyonsi lino yakolola yakalisumbe ku citumba ca kunzi ya musumba.

⁴² Lyene yatole amawe yauze yakuulile muno yafumizye mawe yavuvume. Alino yatole ivu lyuze nu kutakasa ku lung'umba.

⁴³ “Kuvuvuma ndi kwaloleka nupya mu ng'anda iyo, pacisila ca kufumya mawe yavuvume nu kukolola nga nu kutakasa cipya cipya,

⁴⁴ simapepo alinzile ukuyalola. Ndi kuvuvuma kwati kukulilako, ng'anda iyo iye iyamifitalila.

⁴⁵ Ng'anda iyo ilinzile koomolwa. Amawe yonsi, nsondo zya ng'anda iyo, ni ivu lyonsi lyapa citalang'anda, vyonsi visendwe nu kuya visumba ku citumba ca kunzi ya musumba.

⁴⁶ Muntu wensi wino wingila mu ng'anda iyo lino yayalwa, ali nu kuya uwamifitalila kufika nu ku manguzi.

⁴⁷ Muntu wensi uwalambalala pansi mu ng'anda iyo nanti walilamo cakulya, alinzile ukufula insalu zyakwe.

⁴⁸ “Lelo ndi lino simapepo wiza ku kuceceta ing'anda pamulandu wa kuvuvuma, wazana ukuti kuvuvuma kutalolike mu ng'anda pacisila ca kutakasa lung'umba, lyene alinzile ukunena umwisikulu wa ng'anda ukuti ng'anda iiswepe pamulandu wakuti kuvuvuma kwatikusila.

⁴⁹ Pa kuswefya ng'anda umwisikulu wa ng'anda iyo alinzile ukutoola vyunyi viili, musambo wa cimuti ca mukelide, kasalu kayenzu, na kamusambo kakwe isopu, vyonsi atwale kuli simapepo.

⁵⁰ Pa vyunyi viili, simapepo atoole conga acifyulile mu lweso umuli amanzi yano yasemvile mu cifula.

⁵¹ Lyene simapepo alinzile ukutoola musambo wa cimuti ca mukelide, kamusambo kakwe isopu, kasalu kayenzu nga ni cunyi cino yatafyuzile. Vyonsi vivyo avitimpike mu wazi wa cunyi cino yatiyafyula nga nu mu manzi yaku kafukoka. Lyene alinzile kusansa ng'anda maila cinimbali na manzi yano muli wazi.

⁵² Vii, avili vino simapepo alinzile kuswefya ng'anda kuomvya uwazi wa cunyi, amanzi amu kafukoka, icunyi cipuma, musambo wa cimuti ca mukelide, musambo wa isopu nga na kasalu kayenzu.

⁵³ Lyene alinzile ukuta icunyi cipuma cino yatafyuzile kuti cipapuke kunzi ya musumba, cisalale mu vyalo. Vii, avili vino simapepo alinzile ukucita kupitila mu lutambi lwa kuswefiwa kwa ng'anda ino yazanwa nu kuvuvuma. Pacisila cakwe vii, ng'anda nayo ala yaswefiwa.”

⁵⁴ Yaa, ali malamulo yapa ndwala zyakwe tembwe nanti ukusanga,

⁵⁵ nanti kuvuvuma mu vyakuzwala nanti mu ng'anda,

⁵⁶ nanti kuvimba nanti vipuzu nanti iyala liyengese.

⁵⁷ Amalamulo yaa, akulenga kuti mumanye lino icintu cimwi caya ciswepe nanti icamifitalila.