Aina Levi 13 - Amazwi Yakwe Leza 2013

Masunde yapa ndwala zya nkanda

¹ Yawe anena Mose na Aloni, ati,

² “Muntu ali wensi ndi wakwata icilonda pa nkanda yakwe, nanti cipute nanti cimwi cakuipukila cino cingaomboka ukuya icilonda iciipe, ulwale wa nkanda ukaambukila, alinzile kuletwa kuli simapepo Aaloni nanti ku ana yakwe Aaloni, yasimapepo.

³ Simapepo alolekesye nu kuceceta icilonda. Ndi cakuti ipipi lyamu cilonda ilisanguka ukuya litiswe, nupya icilonda cikuloleka icizike ukuluta inkanda izingulwike icilonda, ale wene ulwale wa nkanda uwipe. Lyene simapepo alinzile ukunena umuntu wiyo ukuti waya uwamifitalila.

⁴ Lelo ndi cakuti cilonda cikuloleka citiswe nupya cisi icizike ukuluta inkanda izingulwike icilonda, nga ni pipi litasangwike litiswe, lyene simapepo wiyo alinzile kusunga mulwale wiyo aikala wenga pa manda cinimbali.

⁵ Simapepo alinzile kulola mulwale nu kumuceceta nupya pa wanda uwalenga cinimbali, ndi cakuti mu kwelenganya kwakwe walola ukuti icilonda cikuloleka icili conga, citaombwike, simapepo alinzile kusuga mulwale aikale wenga nupya pa manda nayauze cinimbali.

⁶ Nupya simapepo alinzile kulola mulwale nu kumuceceta pa wanda uwalenga cinimbali. Ndi cakuti icilonda caloleka cifitokele, nupya citaombwike, lyene simapepo alinzile ukunena mulwale wiyo ukuti wene muswepe, asi uwamifitalila, icilonda sile. Mulwale alinzile ukufula insalu zyakwe nu kuya muswepe.

⁷ Lelo ndi cakuti icilonda caomboka pacisila cakumuceceta nu kunenwa ukuti muswepe, lyene mulwale wiyo alinzile ukuyalolekela kuli simapepo nupya.

⁸ Simapepo alinzile kumuceceta nupya. Ndi cakuti simapepo wazana ukuti cilonda cico caticiomboka, alinzile kumunena ukuti wene uwamifitalila. Indwala ii iyakwe tembwe.”

⁹ “Muntu ali wensi ndi wakwata indwala yakwe tembwe alinzile kuletwa kuli simapepo.

¹⁰ Simapepo amucecete. Ndi cakuti pa nkanda pali icilonda icitiswe, cino cati cisangula ipipi ukuya litiswe, nupya muli nu ufila uvule,

¹¹ icilonda cico indwala ikome yakwe tembwe. Simapepo alinzile kumunena ukuti uwamifitalila, nupya citakulondekwa kumuyalila wenga pano caticimanyika mpiti ukuti uwamifitalila cuze.

¹² Ndi cakuti indwala yalimba inkanda umwili onsi, ukufuma ku mutwe kufika nu kutukando,

¹³ simapepo alinzile kumuceceta nupya. Ndi cakuti simapepo wasininkizya ukuti indwala yatilimba umwili onsi, alinzile ukunena mulwale ukuti muswepe, asi uwamifitalila. Nkanda yakwe yonsi yatiya itiswe, nga asi na mifitalila.

¹⁴ Lelo ukufuma pa nsita ino icilonda cilaloleka pa mwili wakwe, alaya uwamifitalila.

¹⁵ Simapepo alinzile kumuceceta nupya, alino ndi wazana icilonda, alinzile ukunena mulwale ukuti wene uwamifitalila.

¹⁶ Lelo lino icilonda capola, caya icitiswe nupya, mulwale wiyo alinzile ukuya kuli simapepo nupya.

¹⁷ Nupya kwene simapepo alinzile kumuceceta. Ndi cakuti icilonda icisanguka citiswe, ala umuntu wiyo muswepe. Simapepo alinzile kumunena ukuti muswepe.”

¹⁸ Muntu ali wensi ndi walwala cipute nomba capola,

¹⁹ lyene pacisila cimwi citiswe cavimba nanti kaliyala kayenzu nupya kaswepulukile kavimba pano pali cipute, umuntu wiyo alinzile ukuya kuli simapepo.

²⁰ Simapepo alinzile kumuceceta, alino ndi cakuti kaliyala kaloleka uti akazike ukuluta inkanda izingulwike mu mbali, nga ni pipi mu kaliyala ilisanguka litiswe, simapepo alinzile ukunena umuntu wiyo ukuti wene uwamifitalila. Indwala yakwe tembwe alino ikutandika mu cipute.

²¹ Lelo ndi cakuti simapepo waceceta wazana ukuti ipipi mukasi ka kalyaala litasangwike ukuya litiswe, nupya kasi kazike ukuluta inkanda izingulwike kaliyala nomba iswepulukile, simapepo alinzile kusunga umuntu wiyo aikale wenga pa manda cinimbali.

²² Cilonda ndi cakuti caomboka, simapepo alinzile ukunena mulwale ukuti wene uwamifitalila, akweti indwala.

²³ Lelo ndi cakuti icilonda cili wakwe vino cali pakutandika, nupya citaombwike, ale iciyazi sile pano pali cipute. Simapepo alinzile ukunena mulwale wiyo ukuti muswepe.

²⁴ Muntu ndi cakuti ali ni ciyazi cino wapiile nu moto, lyene ciyazi casanguka citiswe nanti ciyenzulukile, nanti ciswepulukile,

²⁵ simapepo alinzile kuceceta umuntu wiyo. Ndi cakuti ipipi mu ciyazi lyatilisanguka litiswe, nupya ciyazi cikuloleka icizike ukuluta inkanda izingulwike ciyazi, ale indwala yakwe atembwe alino ikutandika mu ciyazi cino umuntu wapiile nu moto. Simapepo alinzile ukunena umuntu wiyo ukuti wene uwamifitalila.

²⁶ Lelo ndi cakuti ipipi mu ciyazi litasangwike litiswe, nupya ciyazi citakuloleka icizike ukuluta inkanda izingulwike ciyazi, lelo iswepulukile, simapepo alinzile kusunga umuntu wiyo aikale wenga pa manda cinimbali.

²⁷ Simapepo alinzile kuceceta mulwale nupya pa wanda uwalenga cinimbali. Ndi cakuti cikuombokela, ale ulwale wa nkanda wakwe tembwe. Simapepo alinzile kumunena ukuti wene uwamifitalila.

²⁸ Lelo ndi cakuti ciyazi cili wakwe vino cali pakutandika, citakuombokela, iciswepulukile sile, ala asi tembwe. Simapepo alinzile ukunena umuntu wiyo ukuti wene muswepe. Pano cene iciyazi sile cino wapiile nu moto.

²⁹ Monsi nanti umwanaci ndi walwala icilonda ku mutwe nanti pa cilezu,

³⁰ simapepo alinzile kuceceta icilonda cico. Ndi cakuti cikuloleka icizike ukuluta inkanda izingulwike icilonda, nupya ipipi mu cilonda ilya mutuntulwa nupya linyale, ale atembwe. Simapepo alinzile ukunena mulwale wiyo ukuti wene uwamifitalila.

³¹ Ndi cakuti lino simapepo waceceta mulwale, wazana ukuti icilonda cici icizike ukuluta inkanda izingulwike icilonda, nomba pasi ipipi litifi pa cilonda, simapepo alinzile kumusunga aikale wenga pa manda cinimbali.

³² Simapepo alinzile kuceceta icilonda nupya pa wanda uwalenga cinimbali. Ndi cakuti citaombwike, nupya musi ipipi ilya mutuntulwa, nupya citakuloleka icizike ukuluta inkanda izingulwike icilonda,

³³ umuntu wiyo alinzile ukupela inyele zyonsi suka sile kuzinguluka pa cilonda. Simapepo alinzile kumusunga aikale wenga nupya pa manda nayauze cinimbali.

³⁴ Pa wanda uwalenga cinimbali simapepo alinzile kuceceta icilonda. Ndi cakuti citaombwike, nupya cikuloleka cisi icizike ukuluta inkanda izingulwike icilonda, simapepo alinzile ukunena umuntu wiyo ukuti wene muswepe. Muntu wiyo alinzile ukufula insalu zyakwe, nga amaya muswepe.

³⁵ Lelo ndi cakuti icilonda caomboka pacisila cakunenwa ukuti muswepe,

³⁶ simapepo alinzile kumuceceta nupya. Ndi cakuti icilonda caticiomboka, simapepo atalinzile kulonda visininkizyo vi pipi ilya mutuntulwa. Kwaula kutwisika umuntu wiyo uwamifitalila.

³⁷ Lelo ndi cakuti simapepo walola ukuti icilonda citaomboka, nupya ipipi litifi lyatilimela papela, ale icilonda cico caticipola. Simapepo alinzile ukunena umuntu wiyo ukuti wene muswepe.

³⁸ Monsi nanti umwanaci ndi wakwata indwala yakwe cisongo iitiswe pa nkanda,

³⁹ simapepo alinzile kuceceta umuntu wiyo. Ndi cakuti indwala iyo yakwe cisongo ikuloleka iiutuluke, ale acisongo sile watamufukuka pa nkanda. Muntu wiyo muswepe.

⁴⁰ Muntu ndi wapanyoka inyele, waya ni pala, umuntu wiyo muswepe.

⁴¹ Ndi cakuti inyele zyakwe zyapanyoka ukufuma ku mpumi kufika nu ku nkoto, waya ni pala pa mutwe, umuntu wiyo muswepe.

⁴² Lelo ndi cakuti wakwata icilonda ciyenzulukile nupya ciswepulukile api pala nanti pa mpumi, ale atembwe alino akutandika api pala.

⁴³ Simapepo alinzile kuceceta umuntu wiyo. Ndi cakuti icilonda icivimbe pi pala nanti pa mpumi cikuloleka ciyenzulukile nupya ciswepulukile uti indwala yakwe tembwe,

⁴⁴ umuntu wiyo mulwale, nupya uwamifitalila. Simapepo alinzile ukunena umuntu wiyo ukuti wene uwamifitalila pamulandu wakuti watakwata icilonda pa mutwe wakwe.

⁴⁵ Muntu wino walwala tembwe alinzile kuzwala insalu zilepoke, atalinzile kusakula inyele zyakwe. Alinzile kuvimba pa mulomo, nupya alinzile kupunda ale akuti, “Nene wamifitalila, nene wamifitalila!”

Masunde yakulondela ndi vyakuzwala vyavuvuma

⁴⁶ Mulwale wiyo ali nu kuya uwamifitalila mu nsita yonsi iya ulwale wakwe. Nupya alinzile kusungwa aikale wenga kunzi ya nsakwe.

Masunde yakulondela ndi vyakuzwala vyavuvuma

⁴⁷ Pa nsalu ndi paya icivuvuma, pa nsalu ya mavumbu nanti yakwe pamba,

⁴⁸ nanti pa kasalu kali konsi kakwe pamba, nanti kasalu kali konsi ka mavumbu, nanti pa mukwela nanti pa cintu icili consi capangilwa nu mukwela

⁴⁹ civuvume cico ndi caloleka katapakatapa nanti ciyenzulukile, ale cikukula nupya cilinzile kucilanga kuli simapepo.

⁵⁰ Simapepo alinzile kuciceceta nu kucisunga conga pa manda cinimbali.

⁵¹ Simapepo alinzile kuciceceta nupya pa wanda uwalenga cinimbali. Ndi cakuti civuvume cati cikulilako pa nsalu, insalu iyo yaya iyamifitalila.

⁵² Simapepo alinzile ukoca insalu iyo, pamulandu wakuti civuvume cikukulilako pa nsalu, cico cino cilinzile kononwa mu moto.

⁵³ Lelo ndi cakuti lino simapepo waciceceta, wazana ukuti civuvume citakulileko pa nsalu,

⁵⁴ simapepo alinzile ukupeela ilamulo kuti yacifule, nu kucisunga conga pa manda nayauze cinimbali.

⁵⁵ Lyene alinzile kuciceceta nupya. Ndi cakuti civuvume cico citasenwike mu milolekele, nanti angala citakulolekela pa nsalu, insalu iyo icili iyamifitalila. Ulinzile ukoca insalu iyo nanti angala civuvume cico cili ku nkolelo nanti kucisila.

⁵⁶ Lelo ndi cakuti lino simapepo waciceceta nupya, lyene wazana ukuti civuvume caticicucuka, alinzile kucizezeula nu kucifumya pa nsalu nanti pa mukwela unyuke.

⁵⁷ Lyene ndi cakuti civuvume calolekela pauze ukuti insalu ikuvuvuma nupya, mwine wa nsalu iyo alinzile kuyoca nupya.

⁵⁸ Ndi cakuti wafula icintu cico, lyene civuvume cafumapo, alinzile ukufula insalu iyo nupya, ale yaya iswepe, isi yamifitalila.

⁵⁹ Lii, lili lamulo lyapa vivuvume vyapa vyakuzwala, ciye pa nsalu ya mavumbu nanti yakwe pamba, nanti pa cakuzwala consi capangilwe nu mukwela unyuke. Vii, avili vino mulinzile ukucita pa kumanya insalu isi ni mifitalila ni nsalu yamifitalila.