Aina Levi 11 - Amazwi Yakwe Leza 2013

Inyama ni vyunyi vino vyazumiliziwa kuliwa

¹ Yawe anena Aaloni na Mose ati,

² “Nenini aina Izlaeli ukuti inyama zino mungalya pa nyama zyonsi zyamu nsi aizi.

³ Inyama zyonsi zino zyakwata inkamba zipanduke, na zino zikalukizya, zyene mungalya.

⁴ Lelo pa nyama kwene izikalukizya nanti pa nyama zino zyakwata inkamba zipanduke, mutakezye ukulya ingamila pano yene iya mifitalila kunomuli, pamulandu wakuti nanti angala ikalukizya, yene itakwata inkamba zipanduke.

⁵ Mutakezye ukulya piimbi pano wene uwamifitalila kunomuli, pamulandu wakuti nanti angala akalukizya, wene atakwata inkamba zipanduke.

⁶ Mutakezye ukulya kalulu pano wene uwamifitalila kunomuli, pamulandu wakuti nanti angala akalukizya, wene atakwata inkamba zipanduke.

⁷ Mutakezye ukulya kapoli pano wene uwamifitalila kunomuli, pamulandu wakuti nanti angala wakwata inkamba zipanduke, wene asilukizya.

⁸ Mutakezye ukulya inyama zii nanti ku kumya ivitumbi vyakwezyo. Inyama zii izyamifitalila kunomuli.

⁹ “Mu vyaumi vyonsi vino vikaikala mu manzi muli yemba nanti mu luzi, mungalya icintu consi icakwata tunkupili na mamba.

¹⁰ Lelo icintu consi cino cikaikala mu manzi, icitakwata tunkupili na mamba, mutalinzile kucilya.

¹¹ Viumbwa vyamusango uu, ivyamifitalila kunomuli. Mutakezye ukulya vintu vii nanti kukumya ivitumbi vyakwevyo.

¹² Mutakezye ukulya icintu consi icikaikala mu manzi icitakwata tunkupili na mamba.

¹³ “Lyene pa vyunyi vino mutalinzile ukulya ivyamifitalila aivi: Cipungu, inkwazi, amakozi,

¹⁴ pululwe, mweye,

¹⁵ utukozi, utunga,

¹⁶ mwankole, mikanga, makolongo, totwe,

¹⁷ namakungwe, ming'omba,

¹⁸ kong'onta, lukoma, zwanga,

¹⁹ nanti tususu.

²⁰ “Vizizi vyonsi vyakwata maapa na makulu ukuluta yaili ivya mifitalila kunomuli,

²¹ suka sile vino vikatoloka.

²² Mungalya musango uli onsi wakwe makanta, yenza, inyenze nanti yambala.

²³ Lelo vizizi vyonsi ivyakwata maapa nomba vikasela sile pansi, ivyamifitalila kunomuli.

²⁴ “Wino wensi uwalema ivitumbi vya nyama zii, aye uwamifitalila kufika lino ilanzi lyawa.

²⁵ Wino wensi uwatola icitumbi ca nyama iyo alinzile kufula insalu zyakwe nu kusyala uwamifitalila kufika lino ilanzi lyawa.

²⁶ Inyama yonsi itakwata inkamba zipanduke nupya isisyetulula, mumanye ukuti iyamifitalila, na wensi uwaikumya ale waya uwamifitalila.

²⁷ Inyama izyakwata amakulu yani lelo zyamfumbi, mumanye ukuti izyamifitalila, nu muntu wensi uwakumya ku vitumbi vyakwezyo wasyala uwamifitalila kufika lino ilanzi lyawa.

²⁸ Na wiyo wensi uwatola citumbi caziko ali nu kufula insalu zyakwe, nupya wasyala wamifitalila kufika lino ilanzi lyawa. Fwandi mumanye ukuti izyamifitalila kunomuli.

²⁹ “Lyene pa nyama izikasela pansi, izyamifitalila aizi: tunko, kuuza, ni misango yonsi yakwe mumbulwe,

³⁰ celecemba, insamba, mususwe, nkulumusi, na lumvu.

³¹ Wino wensi uwakumya ivitumbi vya nyama zii, aye uwamifitalila kufika lino ilanzi lyawa.

³² Nupya ndi cakuti icitumbi ca nyama zii caponela pa cintu icili consi, icintu cico ciye icamifitalila, cingaya nanti pa mbao, pa nsalu, mukwela unyuke nanti pi saaka, usi mulandu ni milimo ino icintu cico cikaomviwa. Cilinzile kuciombeka mu manzi, lelo cilaya icamifitalila kufika lino ilanzi lyawa, alino lyene cilasangululwa.

³³ Nupya ndi cakuti icitumbi ca nyama zii caponela mu nyungu imate, vyonsi vino vili mu nyungu iyo vyaya ivyamifitalila, nupya inyungu iyo mulinzile muitamole.

³⁴ Ndi cakuti pali ivyakulya vino mwalimukulya nomba amanzi ukufuma mu nyungu iyo yitikilapo, ivyakulya vivyo vyaya ivyamifitalila. Nanti cakumwa icili consi camu nyungu iyo icamifitalila.

³⁵ Cintu icili consi pano paponela icitumbi ca nyama zii ciye icamifitalila. Usi mulandu icakwelekela cingaya icitofu nanti impoto, cene cilinzile kutamolwa.

³⁶ Lelo ndi vyaponela mu kafukoka nanti mu cifula, vyene vitangaya ivyamifitalila. Nomba icintu icili consi icingakumya ku vitumbi vya nyama zii, cimaya icamifitalila.

³⁷ Citumbi ca nyama ya muli zii ndi caponela pa mbezu zino zili nu kukomelwa, zyene zitangaya izyamifitalila.

³⁸ Lelo ndi pa mbezu zizyo yitilapo amanzi alino icitumbi caponelapo, imbezu zizyo izyamifitalila kunomuli.

³⁹ “Muntu ndi wakumya ku nyama ino antu yakalya nomba iyatiifwila, umuntu wiyo aye uwamifitalila kufika lino ilanzi lyawa.

⁴⁰ Nupya umuntu wensi ndi walya inyama iyo alinzile ukufula insalu zyakwe, lelo aye uwamifitalila kufika lino ilanzi lyawa. Nupya umuntu wensi wino wapinga inyama iyatiifwila alinzile ukufula insalu zyakwe nu kuya uwamifitalila kufika lino ilanzi lyawa.

⁴¹ “Utakezye ukulya kanyama kanono kali konsi akakasela pansi,

⁴² nanti vikasela nanti vikapita na makulu yani, nanti vyakwata amakulu avule.

⁴³ Mutailenga ukuya amifitalila pakulya inyama imwi yamuli zii.

⁴⁴ Nene Yawe Leza winu, nupya mulinzile kuisunga amuzilo, pano nene wamuzilo.

⁴⁵ Nene Yawe wino wamufumizye mu Eguputo, pakuti ningaya Leza winu. Mulinzile ukuya amuzilo pano nene wamuzilo.

⁴⁶ “Fwandi lii, lili lamulo lyapa nyama napa vyunyi, lyapa cintu icili consi cino cikaikala mu manzi, nupya lyapa cintu icili consi cino cikaikala ku mulundu.

⁴⁷ Mulinzile ukuya atekele pakupusanya pakasi ka vintu vino visi vyamifitalila ni vintu vyamifitalila, nupya pakasi ka vintu vya umi vino mungalya na vino mutangalya.”