Aina Levi 10 - Amazwi Yakwe Leza 2013

Iifyo lyakwe Nadabu na Abiu

¹ Ana yakwe Aaloni aonsi, Nadabu na Abiu, cila muntu atoola icifutikilo, aikapo umoto nga asumbilamo ubani nu kupeela kuli Yawe. Lelo umoto uu, utali wamuzilo pamulandu wakuti Yawe atapiile ilamulo kunoyali kuti yapeele.

² Mukupumikizya Yawe atuma umoto nu kuyoca mpaka yafwa papo kwene.

³ Lyene Mose anena Aaloni ati, “Walola! Vii, avili vino Yawe wavwanzile lino watile, ‘Onsi yano yakuntumikila yalinzile kucindika muzilo wane. Ndasokolola ululumbi ku antu yane.’ ” Lelo Aaloni aimilila myaa!

⁴ Mose aama Misyaeli na Elizafani, ana aonsi yakwe Uzieli, nyinalume wakwe Aloni, nga ayanena ati, “Ndangini kuno mwize musende ivyala vya avyala inu, muvisisye pi Taalu lya Ukongano. Kavikini kunzi ya nsakwe.”

⁵ Caleka yiiza yalema ku nsalu zyazwite ivyala, nga yavitwala kunzi ya nsakwe, wakwe vino Mose wapeezile ilamulo.

⁶ Lyene Mose anena Aaloni na ana yakwe aonsi, Eleaza na Itamali ati, “Mutikala ni nyele zyaula kusakula nanti kulepula ivyakuzwala vinu, kulanga ukuti mukulosya. Ndi mwacita vivyo, mumafwa, nupya Yawe angasokela iuvi lyonsi lya ina Izlaeli. Lelo auzo aina Izlaeli yangalosya imfwa ii, iyalenzilwe nu moto uno Yawe watumile.

⁷ Mutafuma mwi Taalu lya Ukongano, pano mungafwa pamulandu wakuti mwapaatulwa pa kumupaka amafuta akusolwela yakwe Yawe.” Caleka iyacita wakwe vino Mose wavwanzile.

Amasunde akumile yasimapepo

⁸ Yawe anena Aaloni ati,

⁹ “Wewe pamwi na ana yako aonsi mutalinzile kwingila mwi Taalu lya Ukongano pacisila ca kumwa waini nanti cimwi cikakola. Ndi mulacita cii, mulafwa. Isunde lii, lili nu kusungwa na amu mupanda wako onsi.

¹⁰ Ulinzile kupusanya pakasi ka vintu vyakwe Leza ni vintu vyakuomvya pasilesile, pakasi ka vintu vyamuzilo ni vintu vyamifitalila.

¹¹ Ulinzile kusambilizya aina Izlaeli amasunde yonsi yano napeela kunomuli kupitila muli Mose.”

¹² Mose anena Aaloni na ana yakwe aonsi asile yaili, Eleaza na Itamali ati, “Tolini uwila wa usu uno watiusyala pa mawila akocela Yawe. Mupange umukate usi na citutumusi, alino muliile pipi na kavuwa, pamulandu wakuti uwila uwo uwamuzilo cuze.

¹³ Mukate uu, muulile mu Ncende Yamuzilo, pamulandu wakuti cico kwene cili ciputulwa cino capeelwa kunuli pamwi na ana yako aonsi, ica pa mawila akocela Yawe. Pano avino napezilwe ilamulo.

¹⁴ Lelo wewe pamwi na amu ng'anda yako, mungalya inganga nu mwendo vino vyapeelwa wa mawila kuli Yawe, vyakwe yasimapepo. Mungavilila mu ncende ili yonsi yamuzilo. Amawila yaa, yapeelwa kunuli pamwi na ana yako aonsi na anaci. Ciputulwa cii capeelwa kunuli ukufuma pa mawila autandano yano aina Izlaeli yakapeela.

¹⁵ Yalinzile ukuleta umwendo ni nganga pamwi ni viputulwa vya mafuta vya mawila akoca akuswelula pa manso yakwe Yawe wa wila wakuswelula. Cii cili ciputulwa cako na ana yako wakwe vino Yawe wapeezile ilamulo.”

¹⁶ Mose alondelezya imbuzi ya wila wa kwelela amaifyo. Lyene auvwa ukuti yatiyayoca mpiti. Mose akalipila Eleaza na Itamali, ayuzya ati,

¹⁷ “Uzye pacani cino mutalilile uwila wa kwelela amaifyo mu Ncende Yamuzilo? Uzye mutamanya ukuti uwila uu uwamuzilo cuze? Nupya mumanyile ukuti Yawe watapeela kunomuli kuti mucite ulutambi lwa kufuta amaifyo pakuti afumye maifyo yi uvi.

¹⁸ Mulandu wakuti uwazi wakweyo utalesilwe mwi Taalu lya Ukongano, cange cizipe muliile mumu kwene, wakwe vino napiile ilamulo.”

¹⁹ Aaloni aasuka ati, “Ilelo ndi ndya uwila wa kwelela amaifyo uzye ngani cali cazanzya Yawe? Ilelo antu yaliyapeela pa manso yakwe Yawe amawila yao akwelela amaifyo nga na mawila yao akoca, lelo na ndakai kwene vintu vii viipisye vyativincitikila.”

²⁰ Lino Mose uvwa cii, cimuzipila.