Aina Levi 1 - Amazwi Yakwe Leza 2013

Mpolelwa zyakoca zipuma

¹ Lino Yawe ali mwi Taalu lya Ukongano, aama Mose nga amunena ati,

² “Nena aina Izlaeli uti, ‘Lino umuntu ali wensi akuleta amawila kuli Yawe, wene alinzile ukuleta ing'ombe nanti imfwele nanti imbuzi.

³ “‘Muntu ndi cakuti akupeela uwila wakoca, apeele cipambasi wa ng'ombe uwaula ulema. Apeelele pa mulyango wi Taalu lya Ukongano pakuti Yawe apokelele uwila uwo.

⁴ Lyene aike ikasa lyakwe pa mutwe uwa wila uwo wakoca, alino Yawe alapokelela uwila uwo pakufuta amaifyo yakwe.

⁵ Alino umuntu wiyo afyule cipambasi pa manso yakwe Yawe. Lyene yasimapepo ana yakwe Aaloni aonsi yatole uwazi wa ng'ombe iyo yaukanyizye ukuzingulusya kavuwa kano kali ulunga nu mulyango wi Taalu lya Ukongano.

⁶ Lyene umuntu wiyo afuwe inyama iyo iya wila wakoca nu kuiputola mu vimpilinsya.

⁷ Lyene ana yakwe Aaloni simapepo yapembe umoto pa kavuwa nga yasonselepo inkwi.

⁸ Lilyo kwene yasimapepo ana yakwe Aaloni aonsi yike vimpilinsya vya nyama iyo, umutwe pamwi na mafuta kwene, pa moto wankwi uno uli pa kavuwa.’”

⁹ “‘Lelo wene alinzile ukufula ivyamunda pamwi ni myendo kwene mu manzi. Alino simapepo aocele inyama yonsi pa kavuwa. Yene uli wila wakoca. Uwila uu uwa mununko usuma ukazanzya Yawe.

¹⁰ Muntu ndi cakuti akupeela uwila wakoca uwa mfwele nanti imbuzi, uwila uwo ulinzile ukuya a suuku nanti sawe uwaula ulema.

¹¹ Alinzile kuifyulila ku katutu ka kavuwa pa manso yakwe Yawe. Lyene yasimapepo ana yakwe Aaloni aonsi yatole uwazi wakweyo yaukanyizye ukuzingulusya kavuwa.

¹² “‘Pacisila cakwe vii ndi waiputola mu vimpilinsya, nga yasimapepo yike vimpilinsya vya nyama iyo, umutwe pamwi na mafuta kwene, pa moto wankwi uno uli pa kavuwa.

¹³ Lelo wene alinzile ukufula ivyamunda pamwi ni myendo kwene mu manzi. Alino simapepo atwale vyonsi vii pa kavuwa nu kuvyoca. Wene uli wila wakoca. Uwila uu uwa mununko usuma ukazanzya Yawe.

¹⁴ “‘Muntu ndi cakuti akupeela kuli Yawe uwila wakoca uwa tunyi, uwila uwo ulinzile ukuya icipeele nanti inkunda.

¹⁵ Simapepo atwale impolelwa ku kavuwa, ainyongotole insingo aputule umutwe nga aoce pa kavuwa. Uwazi aufenelele ku lung'umba lwa kavuwa.

¹⁶ Lyene asisye cizaizyo pamwi na mavumbu. Alino avisumbile pa citumba pano yakasumba itwi, ku nkolelo ya kavuwa, lwaku ufumondaka.

¹⁷ Pacisila cakwe vii, alepule uwila uwo pakasi, lyapa limwi ku, ni lyuze ku. Lelo kusi kufumya maapa. Lyene aoce pa moto wa nkwi pa kavuwa. Cene uli wila wakoca. Uwila uu uwa mununko usuma ukazanzya Yawe.