3 Yoane 1 - Amazwi Yakwe Leza 2013

¹ Kufuma kuli ne Wikolo. Nkulembela Gayusi mukundwe wane, wino mu cumi namutemwa.

² We mukundwe, nkupepa kuti vintu vyonsi vikuzipile nga na kuti uye nu umi wa mpomvu ku mwili ndi vino uli ningo ku mupasi.

³ Nali nu luzango cuze lino aina Klistu yanji yafisile nu kutunena vino mwemo mukayela icumi wakwe vino mukacita lyonsi.

⁴ Kusi cuze icikanzanzya kuluta pakuvwa ukuti ana yane yakayela icumi.

⁵ We mukundwe, wemo wewe wacumi mu mulimo uno ukaombela aina Klistu yauzo, nanti yene yali ainamasi.

⁶ Yene yavwanzile kwi uvi lya kuno pa kutemwa kwako. Nkupapata kuti uyazwe kutwalilila ulwendo lwao mu musango uno ukazanzya Leza.

⁷ Pano yene yakatwike yaya pa lwendo mu kutumikila Klistu kwaula kuzumila ukwazwiliziwa na yao atataila.

⁸ Swe ina Klistu, lyene tulinzile ukwazwa antu yaa pakuti tukumeko ku mulimo wao uwa kusalanganya ilandwe.

Ivya pali Diotilefe na Demetiliyo

⁹ Nalemvile kalata mwipi kwi uvi. Lelo Diotilefe wino uwatemwa kuya intunguluzi yao wene atangasumba mano kuli vino nkulanda.

¹⁰ Lyene lino nemo ndiza, ndamwiusya vintu vyonsi vipisye vino wene wavwanzile nga ni ntumpu zino watutumpwila. Asi cii conga cino wene wacisile. Lelo akakana kuzengela aina Klistu yanji lino iiza. Na lino yauze yakulonda kuzengela wene akayalesya nga nu kwezya kuyazinga mwi uvi.

¹¹ We mukundwe utezya kuya namalolela ya vintu viipe. Lelo uye namalolela ya vintu visuma. Wino akacita visuma wene uwakwe Leza. Wino akacita viipe wene atatala walola Leza.

¹² Cila muntu akavwangila Demetiliyo visuma. Ni landwe kwene ilya cumi lino akakosola likacita cili conga. Naswe kwene tukulundapo umboni pali aliwe, nupya mumanyile ukuti vino tukulanda ivya cumi.

Kulamuka kwakusyalikizya

¹³ Nkweti vingi cuze ivya kukunena, lelo ntakulonda kuti nkulembele.

¹⁴ Inkupaalila kwiza kulola zuwa, nga alino tulalanzyanya.

¹⁵ Mutende uye namwe. Yacuza yako yonsi yakulamuka. Wemwisikulu utulamukile yacuza itu onsi.