2 Yoane 1 - Amazwi Yakwe Leza 2013

¹ Kufuma kuli ne Wikolo. Nkumulembela Mangu mukundwe nga na ana yakwe, yao yano natemwa mu cumi. Asi nene nenga nemuno namutemwa. Lelo na yonsi yano amanya icumi nao kwene yamutemwa,

² pano icumi cili mu myenzo itu nupya cimayangamo manda pe.

³ Leza Tata na Yesu Klistu Mwana wakwe yatupele cikuku, yaye na mizu nu kutupela mutende mu cumi nu mukutemwa.

Kulanda pa cumi nu kutemwa

⁴ Nali nu luzango cuze pa kuzana ukuti ana yako yamwi yakayela nu kulondela cumi wakwe vino Tata watupeela ilamulo.

⁵ Acino w e Mangu mukundwe, nkukulenga nkuti twatemwana. Ilamulo lii lino nkumulembela lisi lipya. Lyene ilamulo lino twapilwe kufuma ku utandiko.

⁶ Kutemwa kuno nkulanda kukusenula ukuti tulinzile kuyela malamulo yakwe Leza. Ilamulo lino muvwile kufuma ku utandiko ilyakuti mwensi mwatemwana.

⁷ Asomvi aingi yasalangana konsi mu nsi. Yene yasyazumila ukuti Yesu Klistu wizile avyalwa wa muntu. Muntu uwaya vivyo wene umusomvi nupya umwanisi wakwe Klistu.

⁸ Cenjelini kuti mutaponzya cino mwaombela. Lelo mwezye na maka kuti mukapoke icilambu icipuma.

⁹ Muntu asyakulondela usambilizyo wakwe Klistu, nda kapuzya mwenemo wene asi na Leza. Wino wensi akayela usambilizyo wakwe wene ali na Tata nu Mwana kwene.

¹⁰ Acino lyene ndi umwi wiza kunomuli kwaula kuleta usambilizyo uu, mutamupokelela mu ng'anda inu nanti ukumulamuka.

¹¹ Pano umuntu ali wensi akumulamuka ala nawe kwene wakumako ku viipe vino akacita.

¹² Nkweti vingi ivyakuti munene, lelo ntakulonda kumulembela. Nkulonda kwiza landana namwe nemwisikulu, pano cico mucumi cilatulenga kuya nu luzango.

¹³ Ana yakwe kaci winu mukundwe asolwa yamulamuka.