2 Yamwene 9 - Amazwi Yakwe Leza 2013

Yeu walasikwa pa cilimba ca wene wa ina Izlaeli

¹ Walanga papita akasita, kasema Elisya aama wenga wa muli yakasema nga amunena ati, “Iteyanye ukuya ku Lamoti mu mpanga yaku Gileadi, usende nu musazi wa mafuta.

² Lino wafika kweneko, uye ukalonde Yeu umwana umonsi wakwe Yeosafati, nupya umwizikulu wakwe Nimisyi. Uye ukamwingizye mu muputule umwi umu umfisolo. Ataleka auze yaye yakamulondele.

³ Alino lyene uye ukamupongolwele amafuta pa mutwe, nga uvwange uti, ‘Yawe wavwanga wati, Nene nakulasika pa cilimba ca wene wa ina Izlaeli.’ Alino lyene uyule umulyango, nga uutuke ukwaula kuwayawaya.”

⁴ Ali vino umulumendo wiyo, kasema, wakatwike nu kuya ku Lamoti Gileadi.

⁵ Waile azana na ikolo ya vita yatiyakongana. Alino avwanga ati, “Mukwai munguvwe! Nemo nkweti amazwi akukunena, we musika mukalamba uwa vita.” Yeu nawe amuuzya ati, “Uzye ukasi ukunena weni pali sweswe?” Kasema wilya aasuka ati, “Musambazi, awewe kwene we musika mukalamba uwa vita.”

⁶ Lyene Yeu akatuka nu kuyaingila mu ng'anda. Alino kasema wilya apongolwela amafuta pa mutwe wakwe Yeu nga avwanga ati, “Yawe, Leza wa ina Izlaeli, wavwanga wati, ‘Nakulasika pa cilimba ca wene wa antu yane aina Izlaeli.

⁷ Uce ukome umwene, umwana wakwe Aabu, pakuti ince impezye namwene Yezebele apa kukoma yakasema na aomvi yane.

⁸ Akazi kakwe Aabu yalalowa yonsi pyu! Nene ndi nu kupekesa umonsi wensi uwamu akazi kakwe Aabu, umuzya nanti umuntungwa.

⁹ Akazi kakwe indi nu kuyacitila vino nacitile akazi kakwe Yeloboamu umwana umonsi wakwe Nebati, na vino nacitile Baasya umwana umonsi wakwe Aiya.

¹⁰ Alino namwene Yezebele, wene yatalamuzika foo. Lelo yasimbwa ali yano yali nu kuliila icala cakwe mu musonso wakwe Yezileele.’ ” Lino kasema wilya wamala kuvwanga, afuma nga apuuka nu kupuuka.

¹¹ Alino Yeu aswilila ku ikolo yauze, nga nayo yamuzya yati, “Uzye kunufumile ukwacele? Uzye cipena wilya walaizile cani kunuli?” Yeu nawe aasuka ati, “Mwamanya umuntu wilya kumwi ni mvwango zyakwe.”

¹² Nayo yati, “Awe, wemo tunene sile. Tutamanyile penepo nanti cimwi.” Yeu nawe ayanena ati, “Wene waliwanena amazwi yakwe Yawe akuti Yawe watavwanga ati, ‘Nene nakulasika pa cilimba ca wene wa ina Izlaeli.’ ”

¹³ Papo kwene wensi uwa munoyali asenda ikoti lyakwe nga alyanza papela ya masitepu apakuti apano Yeu aize aimilile penepo. Nga yatandika nu kulizya intandala yapunda yati, “Yeu ali mwene!”

Yakoma Yolamu umwene waku Izlaeli

¹⁴ Yeu umwana wakwe Yeosafati umwizikulu Nimisyi ali pakupangila Yolamu. Apa nsita ilya ale Yolamu pali pamwi na ina Izlaeli yonsi ala yakucingilila Lamoti umusumba uwamu Gileadi kuti yalwisyanye na Hazaeli umwene waku Asilya.

¹⁵ Lelo pa nsita ilya umwene Yolamu waswilile ku Yezileele, kuti ivilonda vipole, vino aina Asilya yamucisile lino yalwanga na Hazaeli umwene waku Asilya. Yeu wene wavwanzile ati, “Ndi cakuti avino mungatemwa, mutaleka umuntu nanti umwi afume muno musumba nu kutwala amazwi uku Yezileele.”

¹⁶ Lyene Yeu akwela mwi celeta lyakwe apita nu ku Yezileele, pamulandu wakuti Yolamu walanga akupuza kweneko nga na Aaziya umwene waku Yuda watentemukile kweneko ku kumufwilizya.

¹⁷ Kalinda uwalindanga kuku kwene apa lupungu mu musumba wa Yezileele papela alola Yeu na antu yakwe yakupalamila. Alino atandika kupunda ati, “Nalola antu yamwi yakwiza!” Yolamu nawe amwaasuka ati, “Tuma umwi pa mfwalasi pakuti amanye ndi cakuti antu yayo yatiyiza umu mutende.”

¹⁸ Nga inkombe ilya iyali pali kavwalo, ipita ku kukomenkanya Yeu nga ivwanga iti, “Umwene akuuzya ati, ‘Uzye mwatimwiza kuno mu mutende?’ ” Yeu nawe aasuka ati, “Umulandu uwo utakukumile! Wemo ule undondele sile.” Kalinda wilya uwali papela ya lupungu alanda ati, “Inkombe ino twatitutuma yatifika mpiti, lelo ntaweni kuno ikuwela kuno.”

¹⁹ Umwene Yolamu pali pakutuma inkombe nayuze. Nayo lino yafika kunoyali iyanena iti, “Umwene akuuzya ati, ‘Uzye mwatimwiza kuno mu mutende?’” Yeu nawe aasuka ati, “Umulandu uwo utakukumile! Wemo ule undondele sile.”

²⁰ Nupya kalinda uwali pa lupungu alaizya ati, “Inkombe yatifika kunoyali mpiti, lelo nayo kwene isikuwela awe. Intunguluzi yi umba lili ikupisya iceleta kwati acipena, ndi vivi kwene vino Yeu umwana wakwe Nimisyi akapisya.”

²¹ Yolamu nawe ali pakuvwanga ati, “Mukwai yanteyanyizizye sile iceleta.” Alino antu yayo yamuteyanyizizya iceleta lyakwe. Lyene Yolamu umwene waku Izlaeli akwela mwi celeta lyakwe, nga Aaziya, umwene waku Yuda nawe akwela mwi celeta lyakwe umwisikulu, yaya ku kukomenkanya Yeu. Yamukomenkanya mu musonso uwali wakwe Naboti umwina Yezileele wilya.

²² Lino Yolamu walola Yeu, amuuzya ati, “We Yeu, uzye wizile kuno mu mutende?” Yeu nawe amwaasuka ati, “Uzye pangaya uli umutende lino tucikweti utuluwi nu wanga uno nyoko Yezebele watandike?”

²³ Alino Yolamu apetula iceleta lyakwe apakuti autuke, ale akupunda Aaziya ati, “We Aaziya, ala antu yaa yatusangukila!”

²⁴ Yeu nawe ali pakusokela uluceto mu ulapwa wakwe, atinta nu kutinta nga alasa Yolamu mwi tundu. Nalo uluceto ilupuzinkanya mu mwenzo. Yolamu apona na pansi na mpu, aponela umwi celeta amuno afwila.

²⁵ Yeu ali pakunena Bidikali, umuomvi wakwe wino yapitanga nawe umwi celeta ati, “Tola icala cakwe ucisumbe mu calo cakwe Naboti. Wiusye ukuti lino wewe nani twapitanga na Aabu, isi wakwe Yolamu, Yawe aliwe wavwanzile ivilacitikila Aabu ati,

²⁶ ‘Mutondo naweni kuno wewe Aabu wakomile Naboti na ana yakwe. Ivyalanda ne Yawe. Ali cino nani kwene nalaya ukuti kankucitile icili cimwi kwene mu calo icili conga kwene.’ Alino Yeu anena kalinda wakwe kuti anyemule icala cakwe Yolamu nu kucisumbila mu calo cica cakwe Naboti, ndi muno Yawe wavwangile.”

²⁷ Lino Aaziya umwene waku Yuda walola icacitika, autuka atumbela umuseo waku Beti Hagani. Yeu nawe amucocovya, ale akulasa inceto nu kupunda ati, “Nawe kwene mulasini sile!” Ali vino nayo yamulasa, ale ali mwi celeta lyakwe mu museo uwalungama ku Guli, pipi nu musumba wa Ibeleamu. Lelo wene autukila ku Megido, akuno aya afwila.

²⁸ Inkombe zyakwe zyaswilizya icala cakwe ku Yelusalemu mwi celeta, nga yacizika mwi cele lyakwe umwazikwa ivikolwe vyakwe mu musumba wakwe Davidi.

²⁹ Mu mwaka walenga ikumi na onga lino Yolamu umwana umonsi wakwe Aabu wateekanga, Aaziya yamulasike pa cilimba ca wene waku Yuda.

Yakoma Yezebele

³⁰ Lino Yeu wafika ku Yezileele, Yezebele auvwa ukuti watafika nga apenta ivipa, aluka ni vikuti nga asungamila ukunzi apa nzota.

³¹ Lino Yeu akwingila sile apa mpongolo, alaizya nu kulaizya ati, “We Zimuli we! Uzye wizile mu mutende? Cicikoma we, we muno wakomile umusambazi wako!”

³² Yeu alingamila mupela lwa pa nzota nga apunda ati, “Aweni ali ku lusansa lwakwe nene?” Yacilolo yaili nanti yatatu akwisano nayo yasungamila pa nzota yalola Yeu.

³³ Yeu ali pakuyanena ati, “Fwantini umwanaci wiyo pansi.” Nayo ali pakumuzukuza pansi na mpa! Awe mukwai papo kwene nu wazi iusantokela uku lung'umba nu ku mfwalasi. Vyonsi ivikandana. Yeu ali pakupisya ni celeta apa cala cakwe.

³⁴ Alino lyene aingila nu mwisano mukasi atandika nu kulya ivyakulya vya mwenemo. Alino ayanena ati, “Sendini umwanaci wiyo umutipwe, nga mukamuzike, pamulandu wakuti wene wali umwana uwa mwene.”

³⁵ Lelo antu aile ku kumuzika, yatazanyile nanti cimwi suka sile akapanga kakwe, na mafupa yaku ngazo zyakwe na aku vizanza vyakwe.

³⁶ Lino yaswilila mwenemo yaya yalandila Yeu, Yeu avwanga ati, “Yakwene ali mazwi yakwe Yawe yano wavwanzile kupitila muli Eliya, umuomvi wakwe umwina Tisyibe, ati, ‘Yasimbwa yalalya icala cakwe Yezebele ku musonso wakwe Yezileele.

³⁷ Ivyasyala kweneko vilasyala wakwe citindi, pakuti kutakaye nanti wenga uwa kuvimanya ukuti ivyakwe Yezebele.’ ”