2 Yamwene 8 - Amazwi Yakwe Leza 2013

Umwanaci umwina Syunemu waweluluka

¹ Elisya walanga wanena umwanaci uwikalanga mu musumba uwamwangwa Syunemu, umwanaci wiya wino Elisya watutulwile umwana wakwe umonsi, ati, “Katuka wapita, wewe pamwi na ang'anda yako, mufume muno nga muye uku kwikala kuze, pamulandu wakuti Yawe alaponya icipowe mu mpanga ii. Icipowe cico cilamala imyaka cinimbali.”

² Umwanaci wilya nawe wacisile vino Elisya wamunenyile. Wene pamwi na ang'anda yakwe ali pakuya ku mpanga ya ina Filisti, akuno yaya yikala imyaka cinimbali.

³ Apacisila ca myaka cinimbali, umwanaci wilya ali pakuweluluka ku mpanga ya ina Filisti. Alino aya umu kuuzya umwene apakuti yamuwezezye ing'anda yakwe ni calo cakwe.

⁴ Wazanyile umwene yakuvwanga na Geazi, umuomvi wakwe Elisya, nga amunena ati, “Ndondolwela ivinjelengwe vyonsi vino Elisya wacita.”

⁵ Lino Geazi acili akulandila umwene vino Elisya watutulwile umuntu uwafwile, alola umwanaci wilya nyina wa mwana kwene wino Elisya watutulwile, nga avwanga ati, “Musambazi, wikwene ali mwanaci wino nkulanda penepo, nga na wii ali mwanakwe umonsi wino Elisya watutulwile!”

⁶ Umwene auzya umwanaci wilya pa cintu cii, nga nawe amulondolwela vino Elisya watutulwile umwanakwe. Alino umwene ali pakwama inkombe yakwe yonga, amunena nu kuti angaya akazwilizyeko umwanaci wilya ukumuwezezya iviya vyakwe vyonsi, ukwika penepo nu kumulipa icuma icingalinga apa myaka cinimbali, cino wali nu kuzombola umu vyalo vyakwe, ukufuma pa wanda uno wene wafumile mu mpanga ilya ukufika na pilelo kwene.

Elisya na Beni Hadadi umwene waku Asilya

⁷ Apa nsita ino Beni Hadadi umwene waku Asilya walwile, Elisya waile uku musumba waku Damasiko. Lino umwene uvwa ukuti Elisya wataiza,

⁸ anena Hazaeli inkombe yakwe ati, “Senda icisapula ntangala, uye ukuuzye kasema Elisya pakuti anganguzizya kweneko kuli Yawe ndi cakuti namapola uku ndwala ii nanti foo.”

⁹ Hazaeli nawe asi mukanyi, asapula ingamila amakumi yani, alonga penepo ni vintu ivisuma sana ivyaya ku Damasiko, alino aya na kuli Elisya. Lino wafika kuli Elisya, Hazaeli amunena ati, “Mukwai umuzya winu, umwene Beni Hadadi ali wino antumile kuti nize nuzye ndi cakuti wene uwakupola nanti foo.”

¹⁰ Elisya nawe ali pakwasuka ati, “Yawe wanena ukuti umwene Beni Hadadi ali nu kufwa! Lelo wemo pita ukamunene ukuti amapola.”

¹¹ Alino Elisya atumbwila Hazaeli amanso nu kumulolekesya, icakuti Hazaeli pasi pantete nu kusakamala, asuka Elisya atandika nu kulila.

¹² Hazaeli nawe asuka auzya ati, “Uzye pacani fwandi cino watandika ukulila vivyo?” Elisya nawe aasuka ati, “Apamulandu wakuti ni ndola ivintu ukwipa vino ulacita ku ina Izlaeli. Wemo uloca amalinga yao, ulakomola alumendo yamaka yonsi, ulapolola utwana twao ni mpungo mpaka tufwe, alino nu kupanza ya mama yonsi anyomelile.”

¹³ Hazaeli ali pakuuzya ati, “Nga amaka akucita vivyo vyonsi ndayafumya kwi? Alino nene weni, uwakucita vivyo ne muntu musulwe?” Elisya ali pakumwasuka ati, “Yawe watanena ukuti wewe ulaya umwene wa ina Asilya.”

¹⁴ Lyene Hazaeli ali pakuswilila kuli Beni Hadadi. Beni Hadadi nawe amuuzya ati, “Uzye Elisya waya watuuli kunuli?” Hazaeli nawe amwaasuka ati, “Waya wanena ndi vino umu cumi uli nu kupola.”

¹⁵ Uwanda uwalondelile penepo Hazaeli wene watozile sile bulanketi, azuwika mu manzi, auno avimba umwene. Alino amutitila nu kumutitila, suka umwene afwa nu kufwa. Hazaeli nawe ali pakupyana apa wene uwa kuteeka aina Asilya.

Umwene Yolamu uwa Ayuda

¹⁶ Mu mwaka wakwe cisano uwa kuteeka kwa mwene Yolamu umwana wakwe Aabu, umwene waku Izlaeli, ali mwaka uno Yolamu umwana wakwe Yeosafati watandike kuteeka impanga ya Yuda.

¹⁷ Wene wali ni myaka yakuvyalwa amakumi yatatu na iili apa nsita ino watandike ukuteeka, nga wateesile mu Yelusalemu imyaka cinani.

¹⁸ Wene wacitanga ivintu iviipe kwati sile ivyacitanga yamwene aku Izlaeli, ndi vino akazi kakwe Aabu yacitanga. Pasi pano wene watwite umwana wakwe Aabu. Wene wifyanga pa manso yakwe Yawe.

¹⁹ Nanti wene wacitanga iviipe, Yawe atalondanga ukulovya Ayuda, apamulandu wakuti walavile Davidi umuomvi wakwe ukuti ana yakwe ali yano yalapyana lyonsi apa wene.

²⁰ Lino Yolamu waya apa wene, aina Edomu nayo ali pakusangukila uteko wa Ayuda, yatandika nu kuisolwela umwene uwakuyateeka.

²¹ Yolamu nawe fwandi ali pakuya ukwali amaceleta yakwe yonsi, uku musumba waku Zaili, kuko ukwali ni vita vya ina Edomu kwene. Fwandi ali pakulilizya Yolamu vyamuzinguluka. Usiku Yolamu na yamusika akalamba ya vita ivyaomvyanga amaceleta, yapuuka ni vita vyakwe ivisaata, ivisalanganila kumwao.

²² Ukutandika sile lilyo kwene mpaka na ndakai kwene, aina Edomu ali kuta ukuteekwa na Ayuda. Pa nsita ili yonga kwene aikazi amu musumba wa Libina nayo kwene ali pakusangukila Ayuda.

²³ Ivintu vyuze vyonsi vino Yolamu wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

²⁴ Yolamu asuka afwa, nga yamuzika mu musumba wakwe Davidi ku nzisi ya vikolwe vyakwe. Na Aaziya umwana wakwe umonsi amupyana pa cilimba ca wene.

Aaziya umwene waku Yuda

²⁵ Mu mwaka uwalenga ikumi na iili uwa kuteeka kwakwe Yolamu umwana umonsi wakwe Aabu umwene waku Izlaeli, Aaziya umwana umonsi wakwe Yeolamu umwene waku Yuda atandika ukuteeka umu Yuda.

²⁶ Aaziya wali ni myaka yakuvyalwa amakumi yaili na iili apa nsita ino watandike ukuteeka, nga wateesile mu Yelusalemu umwaka onga sile. Nyina wali a Ataliya, umwana wakwe Aabu, nupya umwizikulu wakwe Omuli umwene waku Izlaeli.

²⁷ Aaziya kwene wali a citwazi wa mwene Aabu, na uo kwene uli mulandu uno Aaziya wacitilanga ivintu iviipe apa manso yakwe Yawe, umu musango uli onga kwene na uno akazi kakwe Aabu yacitilanga.

²⁸ Umwene Aaziya wasukilile umwene Yolamu, umwene waku Izlaeli nupya umwana wakwe Aabu, uku kulwisya Hazaeli umwene wa ina Asilya. Ivita vyao vyakomenkine ku Lamoti mu mpanga yaku Gileadi. Na pa nsita ya lwete Yolamu yamucisozile sana ivilonda.

²⁹ Yolamu ali pakuswilila ku Yezileele uku kupoziwa ivilonda vyakwe vino aina Asilya yamucisile uku Lamoti lino yalwanga ulwi na Hazaeli. Lyene Aaziya umwana umonsi wakwe Yeolamu umwene waku Yuda atentemukila ku Yezileele ku kufwilizya Yolamu, umwana umonsi wakwe Aabu, pamulandu wakuti wene wacisike.