2 Yamwene 7 - Amazwi Yakwe Leza 2013

¹ Elisya amwaasuka ati, “We! Tala uvwa vino Yawe akulanda. Yawe wavwanga wati, ‘Mutondo apa nsita ndi ikwene, papa kwene apa mpongolo ya musumba wa Samaliya, makilogalamu yatatu ya usu wa ngano yalakalwa nu mutengo wa lupiya longa lwakwe siluva. Nga nu usu wakwe baale nao ulakalwa nu mutengo wa mpiya mutanda zyakwe siluva.’ ”

² Lyene inkombe iyasukilile umwene inena kasema wilya iti, “Cico citange citale cicitike nanti panono, nanti sile Yawe umwisikulu angatuponyezya imvula.” Lelo Elisya aasuka ati, “Wemo ulailolela na manso yako kuno icintu cii cikucitika, lelo utalalya nanti kamwi apa cakulya cico!”

Ivita vya ina Asilya vyapuuka

³ Lyene pa wingililo wa mpongolo ya musumba ulya pali antu yani alwile tembwe. Yene yavwanzyanya yati, “Uzye pacani cino tukalu kuzingota pano mpaka tusuke tufwe?

⁴ Ndi twati katuswilile mu musumba, tumaya tukafwe uku nzala. Vyonsi nga twikala kuno, nalyo kwene tuli nu kufwa. Si katule twapita sile umu nsakwe zya ina Asilya. Pasi nacuze cino yangaya yakatucite ukuluta ukutukoma sile. Lelo limwi yatanga yakatukome.”

⁵ Lino kakuku katola, antu yao pali pakusokelela umu nsakwe zya ina Asilya. Lelo lino yafisile mwenemo, yazanyile musi nanti wenga.

⁶ Yawe umwisikulu uwalesile ukuti aina Asilya yuvwe icongo. Umu kuvwa kwao cuvwisile ungati icongo ca vita ivingi sana ivisenzile imfwalasi na maceleta. Aina Asilya ali pakuvwanga yati, “Uvwini icongo, umwene waku Izlaeli watalalika umwene wa ina Hiti nu waku Eguputo pamwi ni vita vyao apakuti yize yatulwisye!”

⁷ Fwandi antu yaya alwile tembwe yalanga yuvwa vivyo, iyapuuka mu manguzi, yasya ni nsakwe zyao, kumwi ni mfwalasi na yapunda yao kwene. Insakwe izisyala sile pwanku!

⁸ Lino antu yaya yafika umu mbalimbali ya nsakwe yonga, yatandika ukulya nu kumwa ivyali mwenemo. Alino iyakusa siluva na zaabu ni vyakuzwala ivyali mwenemo, nga iyaya iyavifisa. Lino yaweluluka nupya yiingila mu nsakwe yuze. Namo kwene iyalya nu kumwa vino yazanyile mwenemo.

⁹ Alino yatandika ukunenana iyati, “Awe yayame tutacita vii foo! Ilyasi lii ilisuma sana. Tutange tumanye sile swenga foo. Ndi cakuti twalolela ukufika akatondo ukwaula ukulanda ilyasi lii, icumi kwene tulavunukwa. Katwapita likwene tukanene inkombe zya mwene!”

¹⁰ Acino yafuma mu nsakwe zya ina Asilya, iyaswilila ku musumba, nga yatandika ukulaizya yakalinda ali pa mpongolo yati, “Uvwini kuno mwe! Swemo twali twaya umu nsakwe zya ina Asilya, ali pakuzana musi umuntu nanti wenga. Tutalituvwa izwi nanti lyonga. Yapunda ni mfwalasi viyelile mumu kwene muno vinyepilwe. Ni nsakwe zili sile pwanku ndi muno aina Asilya yazisile.”

¹¹ Yakalinda ya mpongolo pali pakusalanganya ilyasi, ilisuka lifika nu kwisano kwene.

¹² Insita iyo cali usiku, lelo kwene umwene wakatwike atandika nu kunena inkombe zyakwe ati, “Lekini imunene vino aina Asilya yateinye! Yatiyamanya ukuti mu musumba muli inzala iyakulumanya incecete. Ali cino yatiyafuma umu nsakwe, yakuteyamila umu mpanga. Yakwelenganya ukuti tumafumanga umu musumba, ale tukuya tukulonda indya. Lyene alino yatuleme apuma, nu kupokolola umusumba.”

¹³ Inkombe yonga iya mwene ali pakuvwanga iti, “Ala nanti aasile muno umu musumba icili cimwi sile nu kufwa. Fwandi katutume antu yamwi, yasende imfwalasi zii zisano izyatizisyala, apakuti tumanye ivikucitika.”

¹⁴ Caleka yasolola amaceleta yaili ni mfwalasi zyakweyo, nga umwene ayatuma kuti yalondelele ivita vya ina Asilya. Alino apeela ilamulo kuli yakapisya ya maceleta yaya ati, “Pitini mukalondelezye icaticicitika.”

¹⁵ Antu yalya yayalondelela mpaka nu ku Yodani kwene. Lyene mu museo monsi yazana ivyakuzwala kumwi ni viombelo vino aina Asilya yasile yasumba lino yutwike kantapepela vyativisansantika. Acino inkombe ziswilila mwenemo, nga ziya zinena umwene.

¹⁶ Lyene antu amu Samaliya yafumila ukunzi nu kuyasampa ivyali mu nsakwe zya ina Asilya. Acino, ndi muno Yawe wavwangile, amakilogalamu yatatu ya usu wa ngano yakaziwa pa mutengo wa lupiya longa lwakwe siluva, nga na makilogalamu yasano ya usu wa mbezu zyakwe baale nayo yakaziwa pa mutengo uli umwi kwene.

¹⁷ Umwene waku Izlaeli wasonsile inkombe iya iyamusukilile pakuya kuli Elisya, ukuti aliwe angaya kangalila wa mpongolo ya musumba. Lelo antu yene ku mufulo wao sile yamulyatola asuka afwa, wakwe muno Elisya wavwangile lino umwene watentemukile ukwakwe ku kumulola.

¹⁸ Umulandu wali auwa uno Elisya wavwanzile ati, “Apa mpongolo ya musumba wa Samaliya palakaziwa amakilogalamu a usu wa ngano pa mutengo wa lupiya lwakwe siluva longa, nga na makilogalamu yasano ya usu wa mbezu zyakwe baale, nayo yalakaziwa pa mutengo uli umwi kwene.”

¹⁹ Ali papa pano inkombe ya mwene yene yakanyile iti, “Awe cumi cico cene citange citale cicitike, nanti sile Yawe angaleka imvula itonye!” Elisya nawe ali pano wamwaswike ati, “Kwene wemo uli nu kuilolela na manso yako ntontonto kuno cilacitika. Lelo wemo utalalya kweneko vyakulya vivyo, foo.”

²⁰ Vivyo kwene ali vino camucitikile, pasi pano antu yamulyatozile umu mpongolo kwene ilya, nga afwila papa kwene.