2 Yamwene 5 - Amazwi Yakwe Leza 2013

Naamani wapoziwa

¹ Lyene Naamani wali a musika mukalamba uwa vita vya ina Asilya. Wene wali umuntu umwi uwacindikwe sana nu mwene wa ina Asilya, pamulandu wakuti kupitila munoli Yawe wapile ucimvyo ku ina Asilya. Wene wali umusilika umukalambane sana, lelo wakweti tembwe.

² Pa nsita imwi lino aina Asilya yaile yazanza aina Izlaeli, yene yasenzile umukazyana umunono umwina Izlaeli, nga umukazyana wiyo aya umuomvi wa muci wakwe Namani.

³ Lyene umukazyana wilya anena umuci wakwe Naamani ati, “Cingazipa kuti umusambazi wane apite ku Samaliya, kuti akalolane na kasema! Wene amaya akamupozye tembwe wino akweti.”

⁴ Naamani aya ku musambazi wakwe nga amunena ati, “Umukazyana wilya wino twalemile ku Izlaeli watanena ukuti ndinzile mpite ku Samaliya, kuti kasema wilya akaikala kweneko akampozye.”

⁵ Umwene wilya nawe avwanga ati, “Pita ku mwene wa ina Izlaeli usende na kalata kwene wii uwakukulondolola kunoli.” Acino Naamani akatuka nga aya ku Samaliya ala asenzile ni mpiya zyakwe siluva amazimbi amakumi yatatu, nga na zaabu amazimbi mutanda, ni vyakuzwala iviyembelo ikumi lyonga.

⁶ Lino wafika ku mwene wa ina Izlaeli, amupeela Kalata wilya wino amazwi ali mwenemo yatangi, “Pokelela kalata wii. Wiyo wino natintuma kunuli ali Naamani umuomvi wane. Acino nkasi kuti umupozye ku ndwala yakwe.”

⁷ Lilyo kwene lino umwene waku Izlaeli wamala kuwelenga kalata wilya, alepola ivyakuzwala vyakwe nga avwanga ati, “Uzye umwene waku Asilya angapaalila uli ukuti nemo ningapozya umuntu wi? Uzye wene akwelenganya ukuti nene indi Leza, wino uwakwata amaka ya kupeela umi ni mfwa? Caloleka apaswe ukuti wene akasi sile kuti twalemanila.”

⁸ Lino Elisya, umuntu wakwe Leza uvwa ukuti kasema wilya watalepola ivyakuzwala vyakwe, atuma akuya nena umwene wilya amazwi yaa ati, “Uzye pacani walepula ivyakuzwala vyako? Leka umwenyi wiyo aize kunondi nga amamanya ukuti umu Izlaeli mwaya kasema.”

⁹ Acino Naamani pali pakukatuka ni mfwalasi zyakwe na maceleta nga aya kweneko. Nga lino wafika, aimilila pa mulyango wa ng'anda yakwe Elisya.

¹⁰ Alino Elisya atuma inkombe yakwe ku kuyanena Naamani iti, “Yanga ukowe amaila cinimbali mu luzi lwa Yodani, alino umapola, uswefiwe.”

¹¹ Lelo Naamani wene apakulola vivyo, asoka sana nu kufumapo nga avwanga ati, “Nemo nali nkwelenganya ukuti amafumila apanzi pakuti tulolane nawe, alino apepe kuli Yawe Leza wakwe nga aswelule ikasa lyakwe pa vilonda vyane, alino ampozye kuli tembwe!

¹² Uzye kwene inguzi Abana na Fapa zyaku Damasiko, ali kuti zitazipa ukuluta inguzi zyonsi izyamu mpanga ya Izlaeli? Uzye nga asi amuno nali naya nowa nu kupola mpole?”

¹³ Aomvi yakwe nayo ali pakumupapata yati, “We musambazi we, kasema akunena ukucita icintu cimwi icicindame, ngano watucicita. Uzye icani cino utange uye ukowe sile wakwe muno avwangile, nu kupola upole?”

¹⁴ Naamani ali pakuya uku luzi lwa Yodani, aitimpika mwenemo amaila cinimbali, wakwe muno Elisya walandile, nu kupola apola. Umwili wakwe Naamani iutelepa sile ningo, kwati akanya akacivyalwa, ali vino wene aswefiwa.

¹⁵ Naamani na antu yakwe ali pakuswilila kuli Elisya. Nga alino avwanga apaswe ati, “Icumi cumi lyene namanya ukuti pano nsi yonsi pataya Leza foo, suka sile wenga mpo uwa muno mpanga ya Izlaeli. Ali cino fwandi ule upokelele uwila uu uno ne muomvi wako napeela.”

¹⁶ Elisya nawe ali pakulapa ati, “Nalapa mwi zina lyakwe Yawe waumi, wino nkatumikila, ukuti nsyakutola uwila uo.” Fwandi Naamani akomapo sana ukuti Elisya atoole uwila uo, lelo nawe ale akukana sile.

¹⁷ Nga alino Naamani asuka avwanga ati, “Apa kukana uwila wane leka fwandi nsende ivu lya muno mpanga pa nyumbu ziili, pasi pano ukutandikila sile apa wanda wi lelo ukuya ku nkolelo nemo ntalatala impeele amawila yakoca nanti impolelwa kuli leza ali wensi suka sile kuli Yawe wenga mpo.

¹⁸ Lelo nkutaila ukuti Yawe amanjelelanga uluse lilyo lyonsi lino namasukililanga umwene wane wa ina Asilya umu ng'anda ikulu yakupepelamo Limoni, kaleza kaluwi ka ina Asilya, lino nani kwene namayanga mwenemo mu kupepa. Icumi nkuti Yawe Leza anjelela kweneko uluse.”

¹⁹ Elisya ali pakupakasya Naamani ati, “Pita ulumi.” Ali vino Naamani apita nu kupita. Lelo walanga sile Naamani wafika apatantalile panono,

²⁰ Geazi, umuomvi wakwe Elisya umuntu wakwe Leza, asyala akwelenganya ati, “Mutaweni vino musambazi wane wapanya isyuko pali Namani, wakana kuti amulifye nanti kamwi akanono! Vino ngano waliwapokelela sile vya mawila vino umwina Asilya wilya walakumupeela. Nalapa mwi zina lyakwe Yawe waumi, ukuti nkamulondelele uleke nkatole nanti sile akantu kamwi.”

²¹ Geazi ali pakulondelela Namani. Lino Naamani walola ukuti umuntu umwi akumulondelela pacisila, aikila pansi ukufuma mwi celeta. Alino amukomenkanya, nga amuuzya ati, “Uzye kuno wafuma ukwacele?”

²² Geazi nawe aasuka ati, “Kuli cele. Umusambazi wane Elisya aliwe wantuma kwiza kunena ukuti watapokelela aenyi yaili, yakasema ukufuma ku mpanga yakwe Efulemu iya myamba. Ali cino akupapata kunuli kuti ungamupeela ulupiya lwakwe siluva ukulingana amazimbi yatatu, ukwika penepo na mataaka yaili a nsalu.”

²³ Naamani nawe asi mukanyi, avwanga sile ati, “Mukwai impiya zyakwe siluva amazimbi mutanda, tolini aizi.” Naamani apatikizya Geazi kuti azitoole, azipakila mu mifuko iili, alino atoola na mataaka yaili a nsalu zyakuzwala izisuma wakwe cimwi, nga ayapeela ku yaomvi yakwe yaili nu kuyanena kuti yasendele Geazi.

²⁴ Lino Geazi na aomvi yalya yafika pa mwamba pano Elisya wikalanga, Geazi atoola imifuko ilya ya mpiya nga ayingizya mu ng'anda. Alino anena aomvi yakwe Naamani kuti yapita yaswilile mwenemo, nga nayo yapita.

²⁵ Geazi wiyo aya ku musambazi wakwe Elisya, nga Elisya nawe amuuzya ati, “We yame, uzye waluiile kwi?” Geazi nawe aasuka ati, “Mukwai nemo kusi nanti kumwi kuno nalinjiile.”

²⁶ Elisya ali pakuvwanga ati, “Nemo nalindi nawe umu mupasi wane, lino umuntu umwi wali wafuma umwi celeta, wikila pansi, nga watandika nu kukukomenkanya. Insita ii mwine isi yakuzumila ukupoka ulupiya ni vyakuzwala kumwi ni vyalo vya miolivi ni vya matingi. Ukwika sile penepo nanti iviteekwa na aomvi foo!

²⁷ Ali cino fwandi yame, tembwe wiya wino Naamani walwile amaiza kuli wewe nu ku amu mupanda wako kwene. Alalematila amu mupanda wako amanda yonsi ya umi wao!” Lino Geazi akufuma sile penepo, awe papo kwene alwala tembwe. Umwili wakwe iuwuutuluka na wuu kwati akungwi.