2 Yamwene 4 - Amazwi Yakwe Leza 2013

Elisya wazwilizya mukamfwilwa umwi

¹ Uwanda umwi mukamfwilwa, uwali umuci wakwe wenga uwamuli yakasema, aya kuli Elisya nga amunena ati, “Mwamanya ukuti uwane wafwa, nupya wali umuomvi winu. Lyene fwandi kwati kwiza umuntu umwi wino uwane wakongwile impiya. Lelo ndakai wene akulonda kuti asendele penepo ana yane yaili kuti akayacite azya yakwe, wa malipilo pa nkongole zya wane. Mwamanyile na vino uwane wali umuntu umwi uwoopanga Yawe.”

² Elisya nawe auzya mukamfwilwa wilya ati, “Ale lelo cino ukulonda kuli nene icani, cakuti inkwazwilizye? Uzye utakweti icakuti ungalya uku ng'anda ukwako?” Mukamfwilwa nawe aasuka ati, “Nemo ntakweti nanti cimwi icakulya, nu mu musazi wane muli sile utumafuta tunono sana utwakwelekela.”

³ Elisya ali pakumunena ati, “Pitanga ku inipamba, ukazime imisazi iingi sana, umusi nanti cimwi.

⁴ Alino lyene wewe pamwi na ana yako aonsi mukaiyalile mu ng'anda, ale mukuminzulula amafuta mu misazi ino mwatimwazima. Umusazi uno wazula imufumya zuwazuwa imuwika apambali.”

⁵ Mukamfwilwa wiyo ali vino aya aingila mu ng'anda pamwi na ana yakwe aonsi, nga ayala cisasa. Yamuletela imisazi nga nawe atwalilila kupongolwelamo amafuta.

⁶ Lino imisazi yonsi yazula, mukamfwilwa wilya auzya ana yakwe aonsi ndi cakuti pa misazi ino yaliyazima patipasyala umusazi umwi. Lelo umwana wakwe wenga amwaasuka ati, “Awe, kusi nanti onga uwatiusyala.” Lilyo kwene na mafuta iyata ukwitulukila mu musazi ulya.

⁷ Mukamfwilwa wiyo ali pakuswilila kuli kasema Elisya. Elisya nawe amunena ati, “Pitanga yanga ukakazye amafuta yayo, alino ulipile inkongole zyonsi pyu. Lyene wewe na ana yako aonsi mungaomvya impiya izyasyala.”

Elisya watutulula umwana wa mwanaci umwi uwaku Syunemu

⁸ Uwanda umwi Elisya aya ku Syunemu ukwikalanga umwanaci umwi umukama. Wene wapapatilanga kasema Elisya kuti aalya icakulya uku ng'anda ukwakwe lyonsi lino Elisya wapita inzila kwene iyo.

⁹ Alino umwanaci wiyo anena iya ati, “Manyile vino umuntu wino akaiza kuno lililili akasema wamuzilo.

¹⁰ Leka fwandi tumukuulile akamuputule apapela ya ng'anda yi paala lipapatale, apano tumwikile umusanzi, ni tebulo, nu mupando, nga twikemo ni lampi. Ali muno aiza akwikala lilyo lyonsi lino watutandalila.”

¹¹ Uwanda umwi Elisya waile ku Syunemu, alino akwela nu kwingila mu kamuputule kakwe ka ng'anda ilya nga alambalala mwenemo.

¹² Elisya anena Geazi umuomvi wakwe ati, “Yanga ukaame umwanaci umwina Syunemu.” Acino Geazi aya amwama, nga nawe aiza apali Elisya.

¹³ Elisya anena Geazi kuti auzye umwanaci wilya ati, “Endi, twakucuzya sana pa vintu vyonsi vino waomba pa kutusunga. Uzye icani cino ungatemwa kuti tukucitile? Uzye ukweti amazwi akuti tukanene umwene, nanti musika mukalamba uwa vita?” Nawe aasuka ati, “Nemo ntulilwa cimwi pakasi ka antu yane.”

¹⁴ Elisya auzya Geazi ati, “Uzye icani cino tungamucitila?” Geazi nawe aasuka ati, “Endi, umwanaci wi atakwata umwana umonsi, nga iya nawe umukote.”

¹⁵ Lyene Elisya amunena ati, “Mwame kuno.” Alino amwama, nga nawe aiza aimilila mu mulyango.

¹⁶ Alino Elisya amunena ati, “Mwacizo, pa nsita ndi ikwene, ulafukatila umwana umonsi mu makasa yako.” Umwanaci wilya nawe avwanga ati, “Iye, musambazi! Wewe kasema wakwe Leza. Ala utantumpoka ne muomvi wako!”

¹⁷ Lelo umwanaci wilya asenda indilwa, nga pa nsita kwene ilya, alela umwana umonsi, wakwe muno Elisya wamunenile.

¹⁸ Umwana wilya lino wakula, uwanda umwi apita kuli isi, pa nsita lino isi wali mu calo pamwi na azombozi.

¹⁹ Alino mukupumikizya umwana wiyo atandika kupunda kuli isi ati, “Nafwa umutwe! Nafwa umutwe!” Isi nawe anena umuomvi ati, “Mutwale kuli nyina.”

²⁰ Pacisila lino umuomvi watwala mulumendo kuli nyina, nyina nawe amufukatila mpaka lino ilanzi lyafika umutwe papela, nga afwa.

²¹ Lyene nyina amunyemula nga akwela ku muputule ulya aya amulambalalika pa musanzi wakwe kasema. Alino afuma mwenemo, nga ayala cisasa.

²² Umwanaci wilya ali pakupunda iya, nga amunena ati, “Napapata, tuma zuwa umuomvi wenga aize na punda kuno. Nkasi kuya kuli Elisya kasema. Namaya nkawele zuwa.”

²³ Iya nawe amuuzya ati, “Uzye pacani cino ukasi kuya kunoli ilelo kwene? Ilelo asi wanda wa Mwezi Upya nanti wi Sabata.” Umwanaci wilya aasuka ati, “Utasakamala!”

²⁴ Lyene umwanaci wiyo anyepa icikalilo pali punda nga akwela penepo. Alino anena umuomvi wilya ati, “Cincizya punda, uleke asimulisye. Utaleka apita panono suka sile ndi nakunena kucita cico.”

²⁵ Acino atenuka nu kwiza kuli kasema ku Mwamba wa Kalimeli. Lino kasema Elisya walola kuno umwanaci wilya akwiza ukutali, anena Geazi umuomvi wakwe ati, “Lola! Umwanaci umwina Syunemu awiya akwiza!

²⁶ Simula kamukomenkanye nga umuzye uti, ‘Uzye uli ningo? Uzye uwako apozile? Uzye umwana wako nawe kwene ali ningo?’ ” Umwanaci wilya aasuka ati, “Mukwai ukwacele.”

²⁷ Lino wafika ku mwamba ulya kuli kasema Elisya, umwanaci wilya akontama nga alema ingazo zyakwe Elisya. Geazi nawe aiza kuti amukanke. Lelo Elisya amulesya ati, “Si mute aalali! Uzye utaweni ukuti wene ali mu ulanda ukulu sana? Yawe atacili anene cimwi pali cii.”

²⁸ Alino umwanaci wilya avwanga ati, “Musambazi, uzye nakulenzile umwana umonsi? Uzye ntakunenyile ukuti cisi cakwezya ukundetela amasakamiko?”

²⁹ Elisya ali pakunena Geazi ati, “Zwala ikoti lyako, nga utoole ni ntuwa yane uwapita. Ndi wakomenkanya umuntu umwi munzila, utezya wimilile nanti kumulamuka. Nga ndi umwi wakulamuka, utezya kumwasuka. Wemo yanga ukalambalike intuwa yane pa usyu wa mulumendo.”

³⁰ Nyinamwana pali pakuvwanga ati, “Nalapa umwi zina lyakwe Yawe waumi, nga na pali wewe ukuti ntalakusya.” Acino Elisya akatuka nu kumulondela.

³¹ Geazi akolela aya alambalika intuwa pa usyu wa mulumendo wilya. Lelo umulumendo wilya kusi kupensya nanti panono. Kutali nanti cakulanga upuma foo. Acino Geazi aswilila mwenemo ku kukomenkanya Elisya nu kumunena ati, “Umulumendo wilya atatutulwike awe.”

³² Lino Elisya wafika ku ng'anda, aingila wenga ku muputule. Alolekesya pa mulumendo nga alola vino aizi pa musanzi wakwe ala watafwa.

³³ Elisya ali pakuyala umulyango atandika nu kupepa kuli Yawe.

³⁴ Alino alambalala papela ya mulumendo, iyasimpana utunwa na manso, nga amulema nu mu minwe. Muno Elisya walalambalile vivyo kwene, ale watatambalala nu kutambalala, awe auvwa umwili wa mulumendo watandika ukukaya.

³⁵ Elisya ali pakukatuka atandika kupitana mu muputule. Nupya kwene aswilila aya alambalala pa mulumendo. Umulumendo ali pakwiza tisya amaila cinimbali nga atandika nu kulola.

³⁶ Elisya aama Geazi nga amunena ati, “Yanga ukaame nyinamwana wilya umwina Syunemu.” Nga Geazi nawe aya amwama. Nga lino nyinamwana wiza, Elisya amunena ati, “Umwana wako auwi, musende.”

³⁷ Lilyo kwene nyinamwana aifuntula pa ngazo zyakwe Elisya, akunkula nu kukunkula. Alino atoola umwana nga afuma nu kufuma.

Elisya wacita vinjelengwe navyuze viili

³⁸ Elisya aswilila ku Giligali, nga pa nsita ilya kwali cipowe mu mpanga ilya. Wanda umwi lino Elisya wasambilizyanga iumba limwi lyakwe yakasema, anena umuomvi wakwe ati, “Teka intendo ikulu sana pa moto, kuti welekele yakasema vyakulya.”

³⁹ Kasema wenga aya mu calo ku kusolela umusalu, nga aya azana ivikoline ni myungu ya mpanga. Alino akulula iingi apapezile amaka akusenda. Lino wawela aputola tunono ukwaula kumanya ukuti vikoline ni myungu ya mpanga.

⁴⁰ Lyene apungwila antu yayo kuti yalye. Lelo lino yatandika ukulya, yapunda yati, “We kasema we! Ala mu cakulya cii muli sumu!” Nga yaposiwa ukulya.

⁴¹ Elisya avwanga ati, “Ndetelini kweneko usu umwi.” Elisya ali pakutoola usu awika nu mu ntendo, nga aselenga. Alino ayanena kuti yapungwile antu yalye. Awe lyene mutali sumu nanti umwi mu ntendo ilya.

⁴² Wanda uze kwiza umuntu umwi ukufuma ku Baali Syalisya, aletela Elisya imikate amakumi yaili yapangilwa ku usu wakwe baale, wa vizao vyankolelo. Amuletela ni misakinta ipya ya mbezu. Alino Elisya anena Geazi ati, “Imula antu kuti yalye.”

⁴³ Lelo umuomvi wakwe avwanga ati, “Uzye mwemo mukwelenganya ukuti antu mwanda onga yangakumana cakulya cikwene?” Elisya ali pakwasuka ati, “Imula antu kuti yalye. Pano Yawe wavwanga wati, ‘Yamalya mpaka na cimwi cisyale.’ ”

⁴⁴ Lyene umuomvi wilya aimula antu yaya cakulya, nayo yalya nu kusyala cisyala, wakwe muno Yawe wavwangile.